ନୂଆଦିଲ୍ଲୀ,୨୨।୫: ପ୍ରମୁଖ ଇ-କର୍ମସ କମ୍ପାନୀ ଆମାଜନ ପକ୍ଷରୁ ବର୍ତ୍ତମାନ ଏହାର ଗ୍ରାହକଙ୍କୁ ଫୁଡ୍ ଡେଲିଭରି ସେବା ପ୍ରଦାନ କରିବା ପାଇଁ ଯାଉଛି। ପ୍ରଥମ ପର୍ଯ୍ୟାୟରେ ବେଙ୍ଗାଲୁରୁ ସହରରେ ପରୀକ୍ଷାମୂଳକ ଭାବରେ ଏହି ସେବା ଯୋଗାଇବ ବୋଲି କମ୍ପାନୀ ପକ୍ଷରୁ ସୂଚନା ଦିଆଯାଇଛି। ବର୍ତ୍ତମାନ ଦେଶରେ ଦେଖାଦେଇଥିବା କୋଭିଡ୍-୧୯ ମହାମାରୀ ସମୟରେ ସରକାର କେବଳ ଅତ୍ୟାବଶ୍ୟକ ସେବା ଓ ସାମଗ୍ରୀ ପ୍ରଦାନ ସେବାକୁ ଛାଡି ଆଉ ସବୁଥିରେ କଟକଣା ଲାଗୁ କରିଥିଲେ। ମହାମାରୀ ସମୟରେ ଗ୍ରାହକମାନେ ମଧ୍ୟ କମ୍ପାନୀକୁ ଫୁଡ୍ ଡେଲିଭରି ସେବା ବିଷୟରେ ନାନା ପ୍ରଶ୍ନ ଓ ପ୍ରସ୍ତାବ ଦେଇଥିଲେ। କମ୍ପାନୀ ଗ୍ରାହକଙ୍କ ଆଗ୍ରହକୁ ନଜରରେ ରଖି ଏହି ସେବା ପ୍ରଦାନ କରିବାକୁ ସ୍ଥିର କରିଛି। ଦେଶର ପ୍ରମୁଖ ଫୁଡ୍ ଡେଲିଭରି ସଂସ୍ଥା ଜମାଟୋ ଓ ସ୍ବିଗି ଏହି କ୍ଷେତ୍ରରେ ଭଲ ରାଜସ୍ବ ସହ ବ୍ୟବସାୟରେ ମଧ୍ୟ ନିଜକୁ ପ୍ରତିଷ୍ଠିିତ କରି ସାରିଛନ୍ତି। ପରୀକ୍ଷଣ ଭିତ୍ତିରେ ସେବା ପ୍ରଦାନ ସଫଳ ହେଲେ ତାହା ଆମାଜନ ପାଇଁ ନୂଆ ଉପଲବ୍ଧି ହେବ। ସାରା ଦେଶରେ ଯେକୌଣସି ପରିସ୍ଥିତି ପଡିଲେ ମଧ୍ୟ ସରକାର ଅତ୍ୟାବଶ୍ୟକ ସେବା ଯୋଗାଇବେ, ଯାହା କୋଭିଡ୍-୧୯ ମହାମାରୀ ସମୟରେ ଦେଖିବାକୁ ମିଳିଲା । କମ୍ପାନୀ ଯେକୌଣସି ସମୟରେ ପ୍ରଥମ ଦଫାରେ ବେଙ୍ଗାଲୁରୁ ସହରରୁ ଏହି ସେବାର ଶୁଭାରମ୍ଭ କରିବ। ଫୁଡ୍ ଡେଲିଭରି ସେବାର ପ୍ରମୁଖ ଅଂଶ ହେଉଛି ସ୍ବଚ୍ଛତା ଓ ଶୁଦ୍ଧତା। ଏଭଳି ପ୍ରସଙ୍ଗଗୁଡିକୁ ପ୍ରାଥମିକତା ଦିଆଯିବ ବୋଲି କମ୍ପାନୀ ପକ୍ଷରୁ ସୂଚନା ଦିଆଯାଇଛିି।
