ନୂଆଦିଲ୍ଲୀ,୧୧।୯: ପ୍ରତିବର୍ଷ ପ୍ଲାଷ୍ଟିକ ଖାଇବାରୁ ଦେଶରେ ହଜାର ହଜାର ସଂଖ୍ୟାରେ କଥା କହିପାରୁ ନ ଥିବା ପ୍ରାଣୀଙ୍କ ମୃତ୍ୟୁ ହେଉଛି। ପ୍ଲାଷ୍ଟିକ ଆବର୍ଜନା ସ୍ଥଳଚର ପ୍ରାଣୀଙ୍କ ସହ ଜଳଚର ପ୍ରାଣୀଙ୍କ ମୃତ୍ୟୁର ପ୍ରମୁଖ କାରଣ ପାଲଟିଛି। ୟୁନାଇଟେଡ ନେଶନ ରିପୋର୍ଟ ଅନୁସାରେ ସାରା ବିଶ୍ୱରେ ପ୍ରତିବର୍ଷ ୫ଶହ ବିଲିୟନ ପ୍ଲାଷ୍ଟିକ ବ୍ୟାଗ ବ୍ୟବାହାର କରାଯାଉଛି। ଏହି ପ୍ଲାଷ୍ଟିକ (ପଲିଥିନ) ଖାଇ ମରୁଥିବା ଗାଈଙ୍କ ସଂଖ୍ୟା ମଧ୍ୟ ଅଧିକ ରହିଛି। ଏହି ତାଲିକାରେ ବହୁ ରାଜ୍ୟର ନଁା ରହିଛି। ହେଲେ ଏହି ରାଜ୍ୟ ଭିତରୁ ଉତ୍ତରପ୍ରଦେଶ ଓ ରାଜସ୍ଥାନର ପରିସ୍ଥିତି ସବୁଠାରୁ ଅଧିକ ଖରାପ ରହିଛି। ୨୦୧୭ରେ ଉତ୍ତରପ୍ରଦେଶର ପ୍ରାଣୀ ଚିକିତ୍ସକ ବିଭାଗର ରିପୋର୍ଟ ଅନୁସାରେ କେବଳ ଲକ୍ଷ୍ନୌରେ ପଲିଥିନ ଖାଇ ପ୍ରାୟ ହଜାରେ ଗାଈଙ୍କ ମୃତ୍ୟୁ ହୋଇଛି। ସେହିପରି ରାଜସ୍ଥାନରେ ପ୍ରାଣୀମାନଙ୍କ ସ୍ଥିତି ଖରାପ ଥିବା ବେଳେ ଗତ ୪ବର୍ଷ ମଧ୍ୟରେ ଏଠାରେ ପ୍ଲାଷ୍ଟିକ ଯୋଗୁ ୧ ହଜାର ପ୍ରାଣୀଙ୍କ ମୃତ୍ୟୁ ହୋଇଛି। ତେବେ ୨୦୫୦ ବେଳକୁ ସମୁଦ୍ରରେ ମାଛ ବଦଳରେ ପ୍ଲାଷ୍ଟିକ ଆବର୍ଜନା ଅଧିକ ଦେଖିବାକୁ ମିଳିବ ବୋଲି ୟୁନାଇଟେଡ ନେଶନ କହିଛି। ପ୍ଲାଷ୍ଟିକ ଆବର୍ଜନା ଯୋଗୁ ପ୍ରତିବର୍ଷ ସାମୁଦ୍ରିକ ଜୀବଙ୍କ ପ୍ରାୟ ୭ଶହ ପ୍ରଜାତି ପ୍ରଭାବିତ ହେଉଛନ୍ତି। ସାମୁଦ୍ରିକ ପ୍ରଜାତି ପ୍ଲାଷ୍ଟିକକୁ ଖାଦ୍ୟ ଭାବି ଗ୍ରହଣ କରିବାର କିଛି ସମୟ ମଧ୍ୟରେ ହିଁ ସେମାନଙ୍କର ମୃତ୍ୟୁ ହୋଇଥାଏ। ସେହିପରି ରାସ୍ତାରେ ବୁଲୁଥିବା ପ୍ରାଣୀ ପ୍ଲାଷ୍ଟିକକୁ ଖାଦ୍ୟ ଭାବି ଖାଇଥାନ୍ତି। କାରଣ ସେଥିରେ ଥିବା କେମିକାଲ ଖାଦ୍ୟ ଭଳି ବାସ୍ନା ହୋଇଥାଏ। ଫଳରେ ପ୍ରାଣୀମାନେ ଏହାକୁ ଖାଦ୍ୟ ଭାବି ନେଇଥାନ୍ତି। ପ୍ରାଣୀମାନଙ୍କୁ ଏହା ହଜମ କରିବା ଅସମ୍ଭବ ହୋଇଥିବା ବେଳେ ସଂକ୍ରମଣ ଯୋଗୁ ସେମାନଙ୍କର ମୃତ୍ୟୁ ହୋଇଥାଏ ବୋଲି ରିପୋର୍ଟରୁ ଜଣାପଡ଼ିଛି।
