ଭୁବନେଶ୍ୱର, ୬।୧୨(ବ୍ୟୁରୋ):ପ୍ରେମିକା ଘରୁ ପ୍ରେମୀଯୁଗଳଙ୍କ ଝୁଲନ୍ତା ମୃତଦେହ ମିଳିଛି। ରାଜଧାନୀ ଭୁବନେଶ୍ୱରର ସାଲିଆ ସାହିରେ ରବିବାର ଏଭଳି ଘଟଣା ସାମ୍ନାକୁ ଆସିଛି। ମୃତକ ଦ୍ୱୟ ହେଲେ ଗଞ୍ଜାମ ଜିଲା କେ. ନୂଆଗାଁ ଥାନା ଅନ୍ତର୍ଗତ ନାରାୟଣପୁର ଗ୍ରାମର ଚିତ୍ରସେନ ଗୌଡ଼ (୨୦) ଏବଂ ଭୁବନେଶ୍ୱର ଶ୍ରୀରାମନଗର ସାଲିଆ ସାହିରେ ରହୁଥିବା ଦିଗପହଣ୍ଡି ଅଞ୍ଚଳର ପି. ବର୍ଷା ରେଡ୍ଡୀ (୧୬)। ଖବର ପାଇ ନୟାପଲ୍ଲୀ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଘରର କାନ୍ଥ ଭାଙ୍ଗି ମୃତଦେହ ଜବତ କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଥିଲା। ସୋମବାର ମୃତଦେହ ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି। ଏ ନେଇ ପୋଲିସ ଏକ ଅପମୃତ୍ୟୁ ମାମଲା (ନଂ. ୧୦୯/୨୨) ରୁଜୁ କରି ପରିବାର ଲୋକଙ୍କୁ ପଚରାଉଚରା କରିବା ସହ ତଦନ୍ତ ଚଳାଇଛି। ପ୍ରାଥମିକ ତଦନ୍ତରୁ ଏହା ଆତ୍ମହତ୍ୟା ଘଟଣା ବୋଲି ପୋଲିସ କହିଛି। ଉଭୟଙ୍କ ପ୍ରେମକୁ ପାରିବାରିକ ସ୍ବୀକୃତି ନ ମିଳିବାରୁ ଦୁହେଁ ଏଭଳି ଚରମ ପଦକ୍ଷେପ ନେଇଥିବା ଶୁଣିବାକୁ ମିଳୁଛି।
ଚିତ୍ରସେନ୍ ବିଜୟୱାଡ଼ାରେ କାମ କରନ୍ତି। ସେ ରବିବାର ସନ୍ଧ୍ୟାରେ ଭୁବନେଶ୍ୱରର ସାଲିଆସାହିରେ ରହୁଥିବା ତାଙ୍କ ପ୍ରେମିକା ବର୍ଷାଙ୍କୁ ଭେଟିବାକୁ ଆସିଥିଲେ। ଏହି ସମୟରେ ବର୍ଷାଙ୍କ ବାପା ମାଧବ ଓ ତାଙ୍କ ମାଆ କାମକୁ ଯାଇଥିଲେ। ବର୍ଷା ଏକାକୀ ଘରେ ଥିଲେ। ତାଙ୍କୁ ଚିତ୍ରସେନ ଭେଟି କଥାବାର୍ତ୍ତା ହୋଇଥିଲେ। ତେବେ ଏହି ସମୟରେ କୌଣସି କାରଣକୁ ନେଇ ବର୍ଷା ଏକ ରଶି ଏବଂ ଚିତ୍ରସେନ ତାଙ୍କ ପ୍ରେମିକାଙ୍କ ଓଢଣି ଦ୍ୱାରା ଲୁହାପାଇପରେ ଝୁଲି ପଡ଼ିଥିଲେ। କାମରୁ ଫେରି ବର୍ଷାଙ୍କ ମା, ବାପା ଘରକୁ ଆସି କବାଟ ବାଡ଼େଇଥିଲେ। ହେଲେ ଭିତର ପଟୁ କବାଟ ବନ୍ଦ ଥିଲା। ସେମାନେ ଝିଅକୁ ଯେତେ ଡାକିଥିଲେ ବି କୌଣସି ଉତ୍ତର ମିଳି ନ ଥିଲା। ତେଣୁ ସେମାନେ ଝରକା ପଟେ ଦେଖିଥିଲେ। ଘର ଭିତରେ ବର୍ଷା ଓ ଜଣେ ଯୁବକଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ। ଏନେଇ ସେମାନେ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି କବାଟ ଖୋଲିପାରି ନ ଥିଲା। ତେଣୁ କବାଟ ଭାଙ୍ଗିବାକୁ ଚେଷ୍ଟା କରିଥିଲା। ସ୍ଥାନୀୟ କର୍ପୋରେଟର ଓ ଭଦ୍ରଲୋକଙ୍କ ଉପସ୍ଥିତିରେ ଘରର କାନ୍ଥକୁ ଭଙ୍ଗାଯାଇଥିଲା। ଏହାପରେ ପୋଲିସ ଘରେ ପଶି ମୃତଦେହ ଜବତ କରିଥିଲା।
