ଭୋପାଳ,୧୮।୮: ଭୋପାଳରେ ଛୋଟା ତାଳାବ କୂଳରୁ ପୋଲିସ ଜଣେ ଯୁବକଙ୍କ ମୃତଦେହ ଉଦ୍ଧାର କରିଥିଲା। ଏହାପରେ ପୋଲିସ ମୃତ ଯୁବକଙ୍କ ସମ୍ପର୍କରେ ତଦନ୍ତ ଆରମ୍ଭ କରିଥିଲା। ଧୋବି ଘାଟରୁ ମିଳିଥିବା ୧୬ ବର୍ଷୀୟ କିଶୋରଙ୍କ ମୃତଦେହ ମାମଲା ୧୧ ଦିନ ମଧ୍ୟରେ ସମାଧାନ ହୋଇଛି। ଏହି ମାମଲାରେ ପୋଲିସ ଏକ ବଡ଼ ଖୁଲାସା କରିଛି, ଯାହା ସମସ୍ତଙ୍କୁ ଚକିତ କରିଦେଇଛି। ପୋଲିସ ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତମାନେ ଏକ ରିଲରେ ଦେଖିଥିଲେ ଯେ ଶରୀରର ପ୍ରାଇଭେଟ ପାର୍ଟ ବିକ୍ରି କଲେ ୧.୨୦ କୋଟି ଟଙ୍କା ମିଳିଥାଏ। ଏହି ରିଲରୁ ପ୍ରଭାବିତ ହୋଇ ଅଭିଯୁକ୍ତମାନେ ରେହାନଙ୍କ ହତ୍ୟା କରିଥିଲେ।
ସୂଚନା ଅନୁଯାୟୀ, ରେହାନ ଅଞ୍ଚଳରେ ପେନ ଏବଂ ଚାବିରିଙ୍ଗ ବିକ୍ରି କରି ନିଜର ଗୁଜୁରାଣ ମେଣ୍ଟାଉଥିଲେ। ଅଭିଯୁକ୍ତମାନେ କିଶୋରଙ୍କୁ ହତ୍ୟା କରିବା ପରେ ତାଙ୍କ ଶରୀରରୁ ଗୁପ୍ତାଙ୍ଗ ବାହାର କରି ବିକ୍ରି କରିବାକୁ ଚେଷ୍ଟା କରିଥିଲେ। ତେବେ ଏହି ଡିଲ ସଫଳ ହୋଇପାରିନଥିଲା। ଏହି ମାମଲାରେ ପୋଲିସ ଦୁଇ ଅଭିଯୁକ୍ତ ୧୮ ବର୍ଷୀୟ ଆମିର କୁରେଶୀ ଏବଂ ୨୦ ବର୍ଷୀୟ ଜୋହେବ ଖାନଙ୍କୁ ଗିରଫ କରିଛି।
ରେହାନଙ୍କୁ ଅଗଷ୍ଟ ୬ ତାରିଖରେ ହତ୍ୟା କରାଯାଇଥିଲା ଏବଂ ଚାରି ଦିନ ପରେ, ଅଗଷ୍ଟ ୧୦ ତାରିଖରେ ପ୍ରେମ ମନ୍ଦିର ନିକଟସ୍ଥ ଧୋବି ଘାଟରୁ ତାଙ୍କ ମୃତଦେହ ମିଳିଥିଲା। ରିପୋର୍ଟ ଅନୁଯାୟୀ, ପୋଷ୍ଟମର୍ଟମରେ ପେଟ ଓ ଗୋଡ଼ରେ ଗୁରୁତର ଆଘାତ ଯୋଗୁ ହତ୍ୟା ହୋଇଥିବା ନିଶ୍ଚିତ ହୋଇଥିଲା। ରେହାନଙ୍କ ଗୁପ୍ତାଙ୍ଗ ନଥିବା ଜଣାପଡ଼ିଥିଲା। ମୃତଦେହର ପରିଚୟ ମଧ୍ୟ ହୋଇପାରୁନଥିଲା। ପରେ ତାଙ୍କ ମା’ ହାତରେ ଥିବା ‘ଏସ୍କେ-ଶଙ୍କର’ ଟାଟୁ ଦେଖି ନିଜ ପୁଅଙ୍କୁ ଚିହ୍ନଟ କରିଥିଲେ।
ଅଭିଯୁକ୍ତମାନେ ରେହାନଙ୍କୁ ହତ୍ୟା କରିବା ପରେ ଗୁପ୍ତାଙ୍ଗଗୁଡ଼ିକୁ ଅଲଗା କରି ଏକ ପ୍ଲାଷ୍ଟିକ ବ୍ୟାଗରେ ରଖିଥିଲେ। ଜୋହେବ ସେଗୁଡ଼ିକୁ ବିକ୍ରି କରିବାରେ ସଫଳ ହୋଇପାରିନଥିଲା। ପରେ ସେଗୁଡ଼ିକ ଅଭିଯୁକ୍ତମାନଙ୍କୁ ଫେରାଇ ଦିଆଯାଇଥିଲା ଏବଂ କିଛି ଦିନ ପରେ ସେଗୁଡ଼ିକୁ ତାଳାବରେ ଫିଙ୍ଗି ଦିଆଯାଇଥିଲା।
ନିଜକୁ ମେଡିକାଲ ଛାତ୍ର ବୋଲି ପରିଚୟ ଦେଉଥିବା ଅଭିଯୁକ୍ତ ଜୋହେବଙ୍କୁ ପାକିସ୍ତାନ-ସାଉଦି ସମ୍ପର୍କିତ ଏକ ରିଲ ଦେଖାଇଥିଲେ। ଏଥିରେ ପ୍ରାଇଭେଟ ପାର୍ଟ ବିକ୍ରି କଲେ ବହୁତ ଟଙ୍କା ମିଳିବ ବୋଲି କୁହାଯାଇଥିଲା। ଏହାପରେ ରେହାନଙ୍କୁ ୧୦୦ ଟଙ୍କାର ଲୋଭ ଦେଖାଇ ତାଙ୍କ ସହ ନେଇଯାଇଥିଲେ ଏବଂ ପରେ ତାଙ୍କୁ ହତ୍ୟା କରିଥିଲେ। ଏହି କଥିତ ଷଡ଼ଯନ୍ତ୍ରରେ ଆଉ କେଉଁମାନେ ସାମିଲ ଥିଲେ, ସେନେଇ ପୋଲିସ ବର୍ତ୍ତମାନ ତଦନ୍ତ ଜାରି ରଖିଛି।
Odisha’s No.1 Odia Daily
