ଢେଙ୍କାନାଳ ଅଫିସ, ୨୯।୭: ଢେଙ୍କାନାଳ ପୌରାଞ୍ଚଳରେ ଅଚଳ ହୋଇପଡ଼ିଥିବା ସିସିଟିଭିଗୁଡ଼ିକୁ ପୁନର୍ବାର କାର୍ଯ୍ୟକ୍ଷମ କରାଇବାକୁ ପ୍ରକାଶ ପାଇଛି ପ୍ରଶାସନିକ ତତ୍ପରତା। ଜନଗହଳିପୂର୍ଣ୍ଣ ସ୍ଥାନରେ ଲାଗିଥିବା ସିସିଟିଭିଗୁଡ଼ିକର ମରାମତି ଆରମ୍ଭ ହୋଇଛି। ଏହା ଆପରାଧିକ କାର୍ଯ୍ୟକଳାପ ରୋକିବାରେ ସହାୟକ ହେବ ବୋଲି ଆଶାବ୍ୟକ୍ତ କରିଛନ୍ତି ସହରବାସୀ।
ସହରରେ ବଢୁଥିବା ଦୁର୍ଘଟଣା, ଅପରାଧ ଏବଂ ଅସାମାଜିକ କାର୍ଯ୍ୟକଳାପ ଉପରେ ଅଙ୍କୁଶ ଲଗାଇବାକୁ ୨୦୧୭ ଅକ୍ଟୋବର ୬ରେ ସହରର ୫ଟି ସ୍ଥାନରେ ଖଞ୍ଜାଯାଇଥିଲା ସିସିଟିଭି। ଉଦ୍ଦେଶ୍ୟ ଥିଲା ଜନଗହଳିପୂର୍ଣ୍ଣ ସ୍ଥାନ ଉପରେ କଡ଼ା ନଜର ରଖିବା। ହେଲେ କିଛିଦିନ ପରେ ପରିଚାଳନାଗତ ତ୍ରୁଟିରୁ ଏହା ଅଚଳ ହୋଇପଡ଼ିଥିଲା। ଜିଲା ପୋଲିସ ମୁଖ୍ୟ କାର୍ଯ୍ୟାଳୟରେ ଏହାର ମନିଟରିଂ ବ୍ୟବସ୍ଥା ରହିଥିବାବେଳେ ଲାଗିଥିବା ମେଶିନ୍ଗୁଡ଼ିକ କାମ କରିବା ବନ୍ଦ ହୋଇଯାଇଥିଲା। ଏପରି କି ଯନ୍ତ୍ରପାତିଗୁଡ଼ିକ କେହି ନେଇଯାଇଥିବା ଚର୍ଚ୍ଚା ମଧ୍ୟ ଜୋର୍ ଧରିଥିଲା। ପରବର୍ତ୍ତୀ ସମୟରେ ସେଗୁଡ଼ିକର ମରାମତି ଦିଗରେ ନଜର ଦେଇ ନ ଥିଲା ପୋଲିସ ପ୍ରଶାସନ। ଏହାର ସୁଯୋଗରେ ପୁଣିଥରେ ସକ୍ରିୟ ହୋଇଉଠିଛନ୍ତି ଅସାମାଜିକ ବକ୍ତି। ଦ୍ରୁତ ଗତିରେ ଗାଡ଼ି ଚଳାଇ ଆତଙ୍କ ସୃଷ୍ଟି କରୁଥିବା ଚାଳକ ଅନାୟାସରେ ଖସିଯିବାରେ ସଫଳ ହେଉଛନ୍ତି। ଫଳରେ ସିସିଟିଭି ବ୍ୟବସ୍ଥାକୁ ପ୍ରହସନ ବୋଲି ତାତ୍ସଲ୍ୟ କରିଥିଲେ ସହରର ବୁଦ୍ଧିଜୀବୀ। ବିଭିନ୍ନ ମହଲରେ ସମାଲୋଚନାର ଶିକାର ହେବା ପରେ ସଡ଼କ ସୁରକ୍ଷା କମିଟି ବୈଠକରେ ଅଚଳ ସିସିଟିଭି କ୍ୟାମେରା ତୁରନ୍ତ କାର୍ଯ୍ୟକ୍ଷମ କରିବାକୁ ପ୍ରସ୍ତାବ ଦେଇଥିଲେ ଏସ୍ପି ଅନୁପମା ଜେମ୍ସ। ଏ ନେଇ ଜିଲାପାଳ ଭୂମେଶ ଚନ୍ଦ୍ର ବେହେରା ବିଭାଗୀୟ ଅଧିକାରୀଙ୍କ ସହ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ। ତଦନୁଯାୟୀ ରବିବାର ଜିଲା କାର୍ଯ୍ୟାଳୟ ସମ୍ମୁଖ, ଗଣେଶ ବଜାର, ମହାବୀର ବଜାର ଟ୍ରାଫିକ ପୋଷ୍ଟ, ପୁରୁଣା ବସ୍ଷ୍ଟାଣ୍ଡ ଏବଂ ବାଜିଚୌକ ଆଦି ସ୍ଥାନରେ ଲଗାଯାଇଥିବା ସିସିଟିଭି କ୍ୟାମେରାଗୁଡ଼ିକର ମରାମତି ଆରମ୍ଭ ହୋଇଛି। ଦିନେ ଦୁଇଦିନ ମଧ୍ୟରେ ଏହା ପୂର୍ଣ୍ଣ କାର୍ଯ୍ୟକ୍ଷମ ହେବା ସମ୍ଭାବନା ରହିଥିବା ବିଭାଗ ସୂତ୍ରରୁ ସୂଚନା ମିଳିଛି।
