ଚମ୍ପୁଆ ୧୮ା୬(ଡି.ଏନ.ଏ.)-କେନ୍ଦୁଝର ଜିଲା ଚମ୍ପୁଆ ଉପଖଣ୍ଡର ଦୁବୁନାଠାରେ ଥିବା ଏସ୍ଆର୍ ଷ୍ଟିଲ୍ କମ୍ପାନୀ ଦେଇଥିବା ପ୍ରତିଶ୍ରୁତି ପୂରଣ ନ କରିବାରୁ ବଡକାଳୀମାଟି ଗ୍ରାମବାସୀ ଚମ୍ପୁଆ ଉପଜିଲାପାଳ କାର୍ଯ୍ୟାଳୟଠାରେ ଧାରଣା ଦେଇଛନ୍ତି। କମ୍ପାନୀ ନିର୍ମାଣ ହେବା ଦିନଠାରୁ ସ୍ଥାନୀୟ ଲୋକଙ୍କୁ ନିଯୁକ୍ତି, ପାନୀୟଜଳ, ଶିକ୍ଷା, ରାସ୍ତାଘାଟ ସହିତ ମୌଳିକ ସମସ୍ୟାର ସମାଧାନ କରିବାର ପ୍ରତିଶ୍ରୁତି ଦେଇଥିଲେ ମଧ୍ୟ ଆଜିଯାଏ ତାହା ପୂରଣ କରିନାହିଁ। ବାରମ୍ବାର ଦାବି ସତ୍ତ୍ୱେ କମ୍ପାନୀ ଶୁଣୁ ନ ଥିବାରୁ ବଡକାଳୀମାଟି ଗ୍ରାମବାସୀ ଧାରଣାରେ ବସିଛନ୍ତି।
ଅଭିଯୋଗ ଅନୁଯାୟୀ, ବେକାର ଯୁବକ ଯୁବତୀଙ୍କୁ ନିଯୁକ୍ତି ଦେଇ ବିକାଶ ଦିଗରେ ବଦ୍ଧପରିକର ବୋଲି କମ୍ପାନୀ ପ୍ରତିଶ୍ରୁତି ଦେଇ ପୂରଣ କରିନାହିଁ। ଏପରିକି ଜମିହରା ଲୋକଙ୍କୁ ମଧ୍ୟ ଆଜି ପର୍ଯ୍ୟନ୍ତ କମ୍ପାନୀ କୌଣସି ପ୍ରକାର ଥଇଥାନ ବ୍ୟବସ୍ଥା କରିପାରିନାହିଁ। ତା ପରିବର୍ତ୍ତେ ପରିବେଶକୁ ନଷ୍ଟ କରିବା, ପ୍ରଦୂଷଣ ସୃଷ୍ଟି କରିବା ସହିତ ରାସ୍ତାଘାଟ ନଷ୍ଟ କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ନିଜ ହକ୍ ପାଇଁ ଲଢେଇ କରୁଥିବା ଏହି ଗ୍ରାମବାସୀ ନ୍ୟାୟ ପାଇଁ ଗତ ୨୩ା୭ା୨୦୧୮ ତାରିଖରେ ଉପଜିଲାପାଳଙ୍କ ନିକଟରେ ଅନଶନରେ ବସିଥିଲେ। ଉପଜିଲାପାଳ ୧୦ ଦିନ ମଧ୍ୟରେ ନୂତନ ଶାନ୍ତି କମଟି ଗଠନ କରି ସମସ୍ୟାର ସମାଧାନ କରାଯିବ ବୋଲି ଲିଖିତ ପ୍ରତିଶ୍ରୁତି ଦେବା ପରେ ଗ୍ରାମବାସୀ ଅନଶନରୁ ହଟିଥିଲେ। ୧ା୮ା୨୦୧୮ରେ ଗ୍ରାମବାସୀ ଅନୁଷ୍ଠିତ ବୈଠକରେ ଉପସ୍ଥିତ ହୋଇଥିଲେ ମଧ୍ୟ ପ୍ରତିପକ୍ଷ ଉପସ୍ଥିତ ହୋଇ ନ ଥିଲେ। ଫଳରେ ବୈଠକ ୨୧ା୮ା୨୦୧୮ ରିଖରେ ଅନୁଷ୍ଠିତ ହୋଇଥିଲା। ୭ ଦିନ ମଧ୍ୟରେ ସମସ୍ତ କାଗଜପତ୍ର ପୈଠ କରିବାକୁ ପ୍ରଶାସନ ପକ୍ଷରୁ ନିର୍ଦ୍ଦେଶ ଥିଲେ ମଧ୍ୟ କମ୍ପାନୀ ତାହା କରି ନ ଥିଲା। ମାତ୍ର ପ୍ରଶାସନ ପକ୍ଷରୁ କମ୍ପାନୀକୁ ଅନୁକମ୍ପା ଦେଖାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ପୂର୍ବ ବୈଠକରେ କମିଟି ପକ୍ଷରୁ ୧୭ା୬ା୨୦୧୯ ସୁଦ୍ଧା ସମାଧାନର ପନ୍ଥା ବାହାର କରାଯିବ ବୋଲି ସୂଚନା ରହିଥିଲେ ମଧ୍ୟ କୌଣସି ସମାଧାନ ହୋଇପାରି ନ ଥିଲା। ଫଳରେ ବଡକାଳୀମାଟି ଗ୍ରାମବାସୀ ସୋମବାର ମଧ୍ୟରାତ୍ରିରୁ ଆମରଣ ଅନଶନ ଆରମ୍ଭ କରଛନ୍ତି।
