ନୂଆଦିଲ୍ଲୀ,୧୭।୫: ସରକାର ପ୍ରତିରକ୍ଷା କ୍ଷେତ୍ର ମାନୁଫାକଚରିଂକୁ ପ୍ରୋତ୍ସାହିତ କରିବା ଲାଗି ପଦକ୍ଷେପ ନେଇଛନ୍ତି। ୨୦ ଲକ୍ଷ କୋଟି ଟଙ୍କାର ଆର୍ଥତ୍କ ପ୍ୟାକେଜ ଅଧୀନ ୪ର୍ଥ ପର୍ଯ୍ୟାୟ ଘୋଷଣାରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ଏ ସମ୍ପର୍କରେ ଘୋଷଣା କରିଛନ୍ତି। ଏହି କ୍ଷେତ୍ର ଲାଗି ବିଦେଶୀ ପ୍ରତ୍ୟକ୍ଷ ପୁଞ୍ଜିନିବେଶ ନିୟମକୁ କୋହଳ କରାଯାଇଛି। ସୀତାରାମନ କହିଛନ୍ତି ଯେ, ଡିଫେନ୍ସ ମାନୁଫାକଚରିଂରେ ସରକାର ଅଟୋମେଟିକ ରୁଟ୍ରେ ଏଫ୍ଡିଆଇ ସୀମାକୁ ୪୯%ରୁ ୭୪%କୁ ବଢ଼ାଇଛନ୍ତି। ଦେଶ ମଧ୍ୟକୁ ବିଦେଶୀ କମ୍ପାନୀଗୁଡିକୁ ଆକୃଷ୍ଟ କରିବା ଲାଗି ସରକାର ଏଭଳି ପଦକ୍ଷେପ ନେଇଛନ୍ତି। ଏଫ୍ଡିଆଇ ନୀତି ଅନୁସାରେ ଉକ୍ତ କ୍ଷେତ୍ରରେ ନିବେଶ କରିବାକୁ ହେଲେ ବର୍ତ୍ତମାନ ଅଟୋମେଟିକ ରୁଟ୍ର ସୀମା ୪୯% ରହିଛି। ଏହାଠାରୁ ଅଧିକ ପରିମାଣର ନିବେଶ କରିବାକୁ ଚାହୁଁଥିଲେ ସରକାରଙ୍କ ମଞ୍ଜୁରର ଆବଶ୍ୟକତା ରହିଛି। ଡିସେମ୍ବର ୨୦୧୯ଠାରୁ ଏପ୍ରିଲ ୨୦୨୦ ମଧ୍ୟରେ ଭାରତର ପ୍ରତିରକ୍ଷା ମାନୁଫାକଚରିଂ କ୍ଷେତ୍ର ପ୍ରାୟ ୫୧.୯୩ କୋଟି ଟଙ୍କାର ଏଫ୍ଡିଆଇ ଲାଭ କରିଛି।
ଯୋଜନା ସମ୍ପର୍କରେ ସୂଚନା ରଖି ସେ କହିଛନ୍ତି ଯେ, ଏହାକୁ କାର୍ଯ୍ୟକାରୀ କରାଇବା ଲାଗି ସରକାର ଏବେ ପ୍ରସ୍ତୁତ ହେଉଛନ୍ତି। ୨୦୧୮ ଜୁଲାଇରେ ଏହି କ୍ଷେତ୍ର ଲାଗି ଅଟୋମେଟିକ ରୁଟ୍ରେ ଏଫ୍ଡିଆଇ ସୀମା ୪୯%କୁ ବଢ଼ାଯାଇଥିଲା। ମିଲିଟାରି ହାର୍ଡଓ୍ବେର ଆମଦାନୀକୁ କମାଇବା ଦିଗରେ ସରକାର ବର୍ତ୍ତମାନ ଯତ୍ନବାନ ଅଛନ୍ତି। ଆମଦାନୀକୁ ହ୍ରାସ କରିବା ତଥା ଘରୋଇ ଶିଳ୍ପକୁ ପ୍ରୋତ୍ସାହନ ଦିଗରେ ଏଭଳି ପଦକ୍ଷେପ ଘୋଷଣା କରାଯାଇଛି। ଏହି ଦିଗରେ ଭାରତରେ ଉତ୍ପାଦନ ହେଉଥିବା ସାମଗ୍ରୀକୁ କ୍ରୟ କରିବା ଏବଂ ସମାନ ସାମଗ୍ରୀ ବାହାରୁ ନ ମଗାଇବା ଲାଗି ସରକାର ବିଜ୍ଞପ୍ତି ଜାରି କରିବେ। ମିଲିଟାରି ବ୍ୟାପାର ବିଭାଗ ସହ ଆଲୋଚନା କରିବା ପରେ ଚୂଡ଼ାନ୍ତ ରୋଡ୍ମ୍ୟାପ ଗ୍ରହଣ କରାଯିବ ବୋଲି ଜଣାପଡିଛି। ଡିଫେନ୍ସ ଆମଦାନୀ ବିଲ୍କୁ ମଧ୍ୟ କମ୍ କରିବା ଦିଗରେ ପଦକ୍ଷେପ ନିଆଯାଇଛି। ଏହାବାଦ ବଜେଟରେ ଡୋମେଷ୍ଟିକ କ୍ୟାପିଟାଲ ପ୍ରୋକ୍ୱୋରମେଣ୍ଟ ବ୍ୟବସ୍ଥା କରାଯିବ। ଏହାବାଦ ଅର୍ଡନାନ୍ସ ଫ୍ୟାକ୍ଟ୍ରି ବୋର୍ଡର ନିଗମୀକରଣ, ଷ୍ଟକ୍ ବଜାରରେ ସୂଚୀଭୁକ୍ତ କରାଇବା, ଡିଫେନ୍ସ ପ୍ରୋକ୍ୱୋରମେଣ୍ଟକୁ ସମୟ ନିର୍ଦ୍ଧାରିତ କରିବା ଭଳି ଯୋଜନା ଉପରେ ସରକାର ବର୍ତ୍ତମାନ ଫୋକସ କରିଛନ୍ତି।
