ବନ୍ତଳା,୩୦।୧୦(ଡି.ଏନ.ଏ.)-ଅନୁଗୋଳ ଜିଲା ପୁରୁଣାକୋଟ ଥାନା ଜଗନ୍ନାଥପୁର ପଞ୍ଚାୟତ ଟାକରିଶିଙ୍ଗା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ମଙ୍ଗଳବାର ଅସୁସ୍ଥ ହୋଇପଡ଼ିଥିବା ୧୨ ଛାତ୍ରୀଛାତ୍ରଙ୍କୁ ଝଡ଼ାଫୁଙ୍କା କରିଛନ୍ତି ଗୁଣିଆ। ଶିକ୍ଷକମାନଙ୍କ ବାରଣ ସତ୍ତ୍ୱେ କେତେଜଣ ଅଭିଭାବକ ଏପରି ଅନ୍ଧବିଶ୍ୱାସର ସାହାରା ନେବା ଚର୍ଚ୍ଚାର ବିଷୟ ହୋଇଛି। ସେହିପରି ପଲାଙ୍କୁ ମଧ୍ୟାହ୍ନଭୋଜନ ନ ଦେଇ ଫିଙ୍ଗାଯାଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ପୂର୍ବାହ୍ନ ୧୦ଟା ୩୦ରେ ଚତୁର୍ଥ, ପଞ୍ଚମ, ଷଷ୍ଠ ଓ ସପ୍ତମ ଶ୍ରେଣୀର ୧୨ ଜଣ ଛାତ୍ରୀଛାତ୍ରଙ୍କ ମୁଣ୍ଡ ବୁଲାଇବା ସହିତ ଗୋଡ଼ ହାତ ଅତ୍ୟଧିକ ଥଣ୍ଡା ହୋଇଯାଇଥିଲା। କେତେଜଣ ପେଟ ଦରଜ ହେଉଥିବା କହି ଅସୁସ୍ଥ ଅନୁଭବ କରିଥିଲେ। ଖବରପାଇ ଅଭିଭାବକମାନେ ବିଦ୍ୟାଳୟରେ ପହଞ୍ଚି ଥିଲେ। ସେମାନଙ୍କ ମଧ୍ୟରୁ କେତେଜଣ ଅନ୍ଧବିଶ୍ୱାସର ବଶବର୍ତ୍ତୀ ହୋଇ ଭୂତ ଲାଗିଥିବା ସନ୍ଦେହ କରି ଗୁଣିଆ ଡକାଇ ସ୍କୁଲ ପରିସରରେ ଝଡାଫୁଙ୍କା କରିଥିଲେ। କେତେଜଣ ଅଭିଭାବକ ଛାତ୍ରୀଛାତ୍ରଙ୍କୁ ଘରକୁ ନେଇ ସେଠାରେ ମଧ୍ୟ ଝଡ଼ାଫୁଙ୍କା କରିଥିଲେ। ତେବେ ଶିକ୍ଷକ ପ୍ରକାଶ ଚନ୍ଦ୍ର ଦେହୁରୀ, ଅଭିଭାବକ ମମତା ପ୍ରଧାନ, ସେଚ୍ଛାସେବୀ ଟିକିଲି ପ୍ରଧାନ ଓ ବବୁଲ ପ୍ରଧାନ ପ୍ରମୁଖ ଏକ ଅଟୋରେ ପାଞ୍ଚ ଜଣଙ୍କୁ ଜଗନ୍ନାଥପୁର ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ଡାକ୍ତର ବିଶ୍ୱଜିତ ନାଏକ, ଡାକ୍ତର ବିଜୟ ପ୍ରଧାନ ଓ ଫାର୍ମାସିଷ୍ଟ ଅଜିତ କୁମାର ସାହୁ ପ୍ରମୁଖ ସେମାନଙ୍କୁ ଚିକିତ୍ସା କରି ଘରକୁ ପଠାଇ ଦେଇଥିଲେ। ପରେ ଶିକ୍ଷା କମିଟି ଓ ଗ୍ରାମବାସୀଙ୍କୁ ନେଇ ଏକ ବୈଠକ ସ୍କୁଲ ପରିସରରେ ଅନୁଷ୍ଠିତ ହୋଇଥିଲା। ଗ୍ରାମ ସଭାପତି ଭଗବାନ ପ୍ରଧାନ, ଶିକ୍ଷା ପରିଚାଳନା କମିଟି ସଭାପତି ତ୍ରୈଲୋକ୍ୟ ପ୍ରଧାନ, ଉପ ସଭାପତି ବବିତା ନାଏକ, ୱାର୍ଡମେମ୍ବର ମୂଳିଆ ଦେହୁରୀ, ସରପଞ୍ଚ ବିନୋଦ ସାହୁ, ଅନନ୍ତ ପ୍ରଧାନ, ମମତା ସାହୁ, ଲିଲି ସାହୁ, ଚିତା ଦାସଙ୍କ ସହିତ ସମସ୍ତ ଅଭିଭାବକ ଉପସ୍ଥିତ ଥିଲେ। କାଳେ ପିଲାଙ୍କର କିଛି ଅସୁବିଧା ହେବ ସେଥିପାଇଁ ରୋଷେଇ ହୋଇଥିବା ମଧ୍ୟାହ୍ନ ଭୋଜନ ପିଲାଙ୍କୁ ଖାଇବାକୁ ନ ଦେଇ ଫୋପାଡ଼ି ଦେବାକୁ ଗ୍ରାମବାସୀ କହିଥିଲେ।
ଏ ସମ୍ପର୍କରେ ସିଆର୍ସିସି ଗୋବର୍ଦ୍ଧନ ନାଏକ କୁହନ୍ତି, ପ୍ରଧାନ ଶିକ୍ଷକ ସୌରିଆ ପ୍ରଧାନ ଏ ନେଇ ଜଣାଇବା ପରେ ବିଇଓ ଏବଂ ଡିପିସିଙ୍କୁ ଅବଗତ କରାଯାଇଛି। ବ୍ଲକ ଶିକ୍ଷା ଅଧିକାରୀ ଲୋପମୁଦ୍ରା ପଟ୍ଟନାଏକ କୁହନ୍ତି, ଘଟଣାସ୍ଥଳକୁ ଯାଇ ତଦନ୍ତ କରିବା ପାଇଁ ବିଆର୍ସିସିଙ୍କୁ ନିର୍ଦ୍ଦେଶ ଦିଆଯାଇଛି। ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଘନଶ୍ୟାମ ବେହେରା କୁହନ୍ତି, ବୁଧବାର ଉକ୍ତ ବିଦ୍ୟାଳୟକୁ ଏକ ଡାକ୍ତରୀ ଦଳ ପଠାଇ ଘଟଣା ବିଷୟରେ ବୁଝିବା ସହିତ ଅସୁସ୍ଥ ହୋଇଥିବା ଛାତ୍ରୀଛାତ୍ରଙ୍କ ସ୍ବାସ୍ଥ୍ୟ ପରୀକ୍ଷା ନିମନ୍ତେ ବ୍ୟବସ୍ଥା କରାଯିବ।
