ଅନୁଗୋଳ ଅଫିସ, ୨୪।୯
ଅନୁଗୋଳ ବ୍ଲକ ଓ ପୌରପାଳିକାର କାର୍ଯ୍ୟ ସମୀକ୍ଷା କରିଛନ୍ତି ଢେଙ୍କାନାଳ ଏମ୍ପି ମହେଶ ସାହୁ। ପ୍ରଥମେ ସେ ପୌରପାଳିକା କାର୍ଯ୍ୟାଳୟରେ ପହଞ୍ଚି ଏକ ବୈଠକରେ ଯୋଗ ଦେଇଥିଲେ। ପରେ ୨ନଂ ୱାର୍ଡ ପରିଦର୍ଶନ କରି ସହରର ପରିମଳ ବ୍ୟବସ୍ଥା ସୁଧାରିବାକୁ କର୍ତ୍ତୃପକ୍ଷଙ୍କୁ ତାଗିଦ କରିଥିଲେ। ଏହାପରେ ବ୍ଲକ କାର୍ଯ୍ୟାଳୟରେ ବିଭିନ୍ନ ଉନ୍ନୟନ କାର୍ଯ୍ୟର ସମୀକ୍ଷା କରିଥିଲେ। ତେବେ ବହୁ ପ୍ରକଳ୍ପ ଅଧପନ୍ତରିଆ ଅବସ୍ଥାରେ ପଡ଼ିଥିବା ଜାଣି ଏମ୍ପି ବିରକ୍ତି ପ୍ରକାଶ କରିଥିଲେ।
ଅପରାହ୍ନରେ ଏମ୍ପି ଅନୁଗୋଳ ପୌରପାଳିକାରେ କାର୍ଯ୍ୟ ସମୀକ୍ଷା କରିବା ପରେ ରାଜକିଶୋରପଡ଼ାରେ ଥିବା ୨ ନମ୍ବର ୱାର୍ଡରେ ବୁଲି ପରିମଳ ସମସ୍ୟାର ଅନୁଧ୍ୟାନ କରିଥିଲେ। ଉକ୍ତ ଓ୍ବାର୍ଡରେ ଡ୍ରେନ ବ୍ୟବସ୍ଥା ବିପର୍ଯ୍ୟସ୍ତ ଅବସ୍ଥାରେ ଥିବା ଦେଖିବା ପରେ ଏମ୍ପି ତୁରନ୍ତ ତାହାକୁ ମରାମତି କରିବାକୁ ନୂତନ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ଏବଂ ଜେଇଙ୍କୁ ନିର୍ଦ୍ଦେଶ ଦେଇଥିଲେ। ଏହାପରେ ସହରରୁ ତୁରନ୍ତ ଆବର୍ଜନା ସଫା କରିବା ପାଇଁ ସେ ତାଗିଦ କରିଥିଲେ। ପରେ ବ୍ଲକ କାର୍ଯ୍ୟାଳୟରେ ବିଡିଓ ମାୟାଧର ବେହେରା ଓ ଅନ୍ୟ ଅଧିକାରୀଙ୍କୁ ନେଇ ବୈଠକରେ ବିଭିନ୍ନ କାର୍ଯ୍ୟ ସମୀକ୍ଷା କରିଥିଲେ। କେଉଁ ଯୋଜନାରେ କେତେ କାର୍ଯ୍ୟ କରାଯାଇଛି ଓ କେତେ ପ୍ରକଳ୍ପ ଶେଷ ହୋଇପାରି ନାହିଁ ତାହା ପଚାରି ବୁଝିଥିଲେ। ତେବେ ସରକାର କରିଥିବା ଯୋଜନାର ସୁଫଳ ଯେପରି ସମସ୍ତ ଲୋକ ପାଇପାରିବେ ସେଥିପାଇଁ କାର୍ଯ୍ୟ କରିବାକୁ ଏମ୍ପି ବିଡିଓଙ୍କୁ ନିର୍ଦ୍ଦେଶ ଦେଇଥିଲେ। ବିଶେଷକରି ବ୍ଲକ କାର୍ଯ୍ୟାଳୟକୁ ଅଭିଯୋଗ କରିବାକୁ ଆସୁଥିବା ବୃଦ୍ଧାବୃଦ୍ଧ, ଦିବ୍ୟାଙ୍ଗ ଓ ବିଧବାମାନେ ଯେପରି ଭତ୍ତା ସହ ଅନ୍ୟାନ୍ୟ ସହାୟତା ପାଇପାରନ୍ତି ସେଥିପ୍ରତି ଧ୍ୟାନ ଦେବାକୁ ଏମ୍ପି ବିଡିଓଙ୍କ ସହ କର୍ମଚାରୀଙ୍କୁ ପରାମର୍ଶ ଦେଇଥିଲେ। ଏହି ସମୀକ୍ଷା ବୈଠକରେ ଉପଜିଲାପାଳ ବାସୁଦେବ ଶତପଥୀ, ବ୍ଲକ ଚେୟାରମ୍ୟାନ ନିରଞ୍ଜନ ଦେହୁରୀ, ଭାଇସ୍ ଚେୟାରମ୍ୟାନ ମମତା ପ୍ରଧାନ, ବିଡିଓ ମାୟାଧର ବେହେରାଙ୍କ ସମେତ ସମସ୍ତ କର୍ମଚାରୀ ଉପସ୍ଥିତ ଥିଲେ।
