ଅନୁଗୋଳ ଅଫିସ, ୫।୧ – ଅନୁଗୋଳ ପୌର ପରିଷଦ ପକ୍ଷରୁ ଶନିବାର ଚଢ଼ାଉ କରାଯାଇ ଲକ୍ଷ୍ମୀ ବଜାରରୁ ଏକ କୁଇଣ୍ଟାଲ ପଲିଥିନ ଓ ପ୍ଲାଷ୍ଟିକ ଜବତ କରାଯାଇଛି। ଏହାର ମୂଲ୍ୟ ପ୍ରାୟ ୫୦ ହଜାର ଟଙ୍କା ହେବ ବୋଲି ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ସୂଚନା ଦେଇଛନ୍ତି। ତେବେ ଉକ୍ତ ଅଞ୍ଚଳର ଅନ୍ୟ ଏକ ଘରେ ବିପୁଳ ପରିମାଣର ପଲିଥିନ ଥିବା ନେଇ ସୂଚନା ଥିଲେ ମଧ୍ୟ ଉକ୍ତ ଘରର କୌଣସି ଲୋକଙ୍କୁ ନ ପାଇବାରୁ ଚଢ଼ାଉ କରାଯାଇ ପାରି ନ ଥିବା ନିର୍ବାହୀ ଅଧିକାରୀ ସୂଚନା ଦେଇଛନ୍ତି।
ପ୍ରକାଶ ଯେ, ଲକ୍ଷ୍ମୀ ବଜାରର ଏକ ଗୋଦାମ ଘରେ ବିପୁଳ ପରିମାଣରେ ପଲିଥିନ ଓ ପ୍ଲାଷ୍ଟିକ ଥିବା ନେଇ ପୌରପାଳିକା ନିକଟରେ ସୂଚନା ରହିଥିଲା। ଶନିବାର ପୂର୍ବାହ୍ନରେ ସେଠାରେ ଚଢ଼ାଉ ସମୟରେ ଗୋଦାମ ଘରେ ଥିବା ଲୋକେ ବିରୋଧ କରିଥିଲେ। ତଥାପି ପୌର ସ୍କ୍ବାଡ୍ ଘର ଭିତରେ ପଶି ପଲିଥିନ ଓ ପ୍ଲାଷ୍ଟିକ ମହଜୁଦ ଥିବା ଦେଖିଥିଲେ। ପରେ ନିର୍ବାହୀ ଅଧିକାରୀ ଓ ଅନ୍ୟ ଅଧିକାରୀମାନେ ପହଞ୍ଚତ୍ ଗୋଟିଏ କୁଇଣ୍ଟାଲ ପଲିଥିନ ଓ ପ୍ଲାଷ୍ଟିକ ଜବତ କରିଥିଲେ। ଉକ୍ତ ଘର ମାଲିକଙ୍କୁ ଚିହ୍ନଟ କରାଯାଇ ନ ଥିବାରୁ ଜରିମାନା ଆଦାୟ କରାଯାଇନାହିଁ। ଘର ମାଲିକଙ୍କ ସନ୍ଧାନ ମିଳିବା ପରେ ନୋଟିସ୍ ଜାରି କରାଯିବ ବୋଲି ନିର୍ବାହୀ ଅଧିକାରୀ ପଣ୍ଡା କହିଛନ୍ତି। ଏହା ପୂର୍ବରୁ ମଧ୍ୟ ପୌରପାଳିକା ଉକ୍ତ ଗୋଦାମରୁ ପଲିଥିନ ଓ ପ୍ଲାଷ୍ଟିକ ଜବତ କରିଥିଲା।
