ବାଲେଶ୍ୱର ଅଫିସ, ୩୦।୫- ପ୍ରବାସୀ ଶ୍ରମିକଙ୍କୁ ନେଇ କେରଳରୁ ପଶ୍ଚିମବଙ୍ଗ ଯାଉଥିବା ଏକ ବସ ଶନିବାର ସକାଳ ସାଢ଼େ ୬ଟାରେ ବାଲେଶର ଶିଳ୍ପାଞ୍ଚଳ ଥାନା ୧୬ ନଂ ଜାତୀୟ ରାଜପଥ ମଙ୍ଗଳପୁରଠାରେ ଦୁର୍ଘଟଣାଗ୍ରସ୍ତ ହୋଇଛି। ବସ୍ଟି ଭାରସାମ୍ୟ ହରାଇ ଏକ ପୋଲକୁ ପିଟି ହୋଇ ତଳକୁ ଖସିପଡିଥିଲା। ଏଥିରେ ୭ଜଣ ଶ୍ରମିକ ଆହତ ହୋଇଛନ୍ତି। ଆହତ ଶ୍ରମିକ ମାନେ ହେଲେ ପଶ୍ଚିମବଙ୍ଗ କ୍ରିଷ୍ଣା ନଗର ଅଞ୍ଚଳର। ଘଟଣାସ୍ଥଳରେ ଶିଳ୍ପାଞ୍ଚଳ ପୋଲିସ ପହଞ୍ଚି ଆହତଙ୍କୁ ଉଦ୍ଧାର କରିବା ସହ କ୍ରେନ ଯୋଗେ ବସ୍କୁ ମଧ୍ୟ ଉଦ୍ଧାର କରିଛି। ସୂଚନା ଅନୁସାରେ, ଗତ ୨୭ତାରିଖରୁ ଏକ ବସ କେରଳରୁ ୨ଜଣ ଗାଡିଚାଳକ ୨୮ଜଣ ଶ୍ରମିକଙ୍କୁ ଧରି ପଶ୍ଚିମବଙ୍ଗ ଯାତ୍ରା କରୁଥିଲା। ସେଥିରେ ମୋଟ ୩୦ଜଣ ଯାତ୍ରୀ ଥିଲେ। ବସ୍ଟି ୧୬ ନମ୍ବର ଜାତୀୟ ରାଜପଥ ମଙ୍ଗଳପୁର ନିକଟରେ ଏକ ପୋଲ ଉପରେ ଯାଉଥିବା ସମୟରେ ଉକ୍ତ ବସକୁ ଓଭରଟେକ କରି ଅନ୍ୟ ଏକ ଟ୍ରକ ଯାଉଥିଲା। ସେହିସମୟରେ ଉକ୍ତ ବସ୍ଟି ଭାରସାମ୍ୟ ହରାଇ ପୋଲରେ ପିଟି ହେଇଯିବା ସହ ତଳକୁ ଖସିପଡିଥିଲା। ଶିଳ୍ପାଞ୍ଚଳ ପୋଲିସ ଘଟଣାସ୍ଥଳରେ ପହଞ୍ଚି ଆହତଙ୍କୁ ୧୦୮ ଆମ୍ବୁଲାନ୍ସ ରେ ବାଲେଶର ମୁଖ୍ୟ ଚିକିତ୍ସାଳୟ କୁ ପଠାଇଛି।
