ଭଦ୍ରକ ଅଫିସ, ୩୦।୮- ଭଦ୍ରକ ଚରମ୍ପା ପଥରଆଡ଼ି ରାସ୍ତାର ଏକ ଘରୋଇ ନର୍ସିଂହୋମ ନିକଟରେ ଶୁକ୍ରବାର ଅପରାହ୍ନରେ ସ୍ପଷ୍ଟ ଦିବାଲୋକରେ ନିଜକୁ ପୋଲିସ ଅଧିକାରୀ ପରିଚୟ ଦେଇ ଜଣେ ୭୦ ବର୍ଷୀୟା ବୃଦ୍ଧାଙ୍କଠାରୁ ସୁନାଚେନ୍ ଲୁଟି ନେଇଛନ୍ତି ଲୁଟେରା। ଉକ୍ତ ସୁନାଚେନ୍ର ମୂଲ୍ୟ ୧ ଲକ୍ଷ ଟଙ୍କାରୁ ଊର୍ଦ୍ଧ୍ୱ ହେବ ବୋଲି ବୃଦ୍ଧା ଜଣଙ୍କ କହିଛନ୍ତି। ସେ ଜଣେ ଖବରଦାତାଙ୍କ ମା’ ବୋଲି ଜଣାପଡ଼ିଛି। ଏ ନେଇ ଟାଉନ ଥାନାରେ ଅଭିଯୋଗ କରାଯାଇଛି।
ଲୁଟ୍ର ଶିକାର ହୋଇଥିବା ବୃଦ୍ଧା ଚରମ୍ପା କଣ୍ଟାପାଳ ଗଁାର କୁସୁମଲତା ଦାସ ଅଭିଯୋଗରେ ଦର୍ଶାଇଛନ୍ତି ଯେ, ସେ ଚରମ୍ପା ବଜାରରରୁ ଏକୁଟିଆ ଚାଲି ଚାଲି ଘରକୁ ଫେରୁଥିଲେ। ଦୁଇଜଣ ଯୁବକ ତାଙ୍କୁ ଅଟକାଇ ନିଜକୁ ପୋଲିସର ପରିଚୟ ଦେଇଥିଲେ। ସୁନାଚେନ୍ ପିନ୍ଧି ବଜାରରେ ବୁଲିଲେ ଲୁଟେରାମାନେ ଲୁଟ୍ ପାଇଁ ହତ୍ୟା କରିପାରନ୍ତି ବୋଲି କହି ସେମାନେ ତାଙ୍କୁ ଭୟଭୀତ କରାଇଥିଲେ। ସୁନାଚେନ୍ ବେକରୁ ଓହ୍ଲାଇ ଦିଅ ବୋଲି କହି ଚେନ୍ଟି କାଢ଼ିନେଇ ତାଙ୍କ ବ୍ୟାଗ୍ରେ ରଖିବା ଆଳରେ ଲୁଟି ନେଇ ଫେରାର ହୋଇଯାଇଥିଲେ। ସେ ଘରକୁ ଆସି ଘଟଣା ସମ୍ପର୍କରେ ପରିବାର ଲୋକଙ୍କୁ କହିଥିଲେ। ଉଲ୍ଲେଖନୀୟ ଯେ, ଭଦ୍ରକ ସହରରେ ଏହିଭଳି ଏକାଧିବାର ପୋଲିସର ପରିଚୟ ଦେଇ ଲୁଟ୍ ଘଟଣା ଘଟିସାରିଛି। ଗୁରୁବାର ସନ୍ଥିଆ ଅଞ୍ଚଳରେ ଜଣେ ମହିଳାଙ୍କଠାରୁ ସୁନା ଅଳଙ୍କାର ସଫା କରିବା ବାହାନାରେ ଅନୁରୂପ ଲୁଟ୍ ହୋଇଥିବା ଜଣାପଡ଼ିଛି।
