ଜୁନାଗଡ଼,୧୬।୪(ଡି.ଏନ୍.ଏ.)-କଳାହାଣ୍ଡି ଜିଲା ଜୁନାଗଡ ବ୍ଲକ ଚାରବାହାଲ ପଞ୍ଚାୟତ କାର୍ଯ୍ୟାଳୟ ସମ୍ମୁଖ ୨୬ନଂ. ଜାତୀୟ ରାଜପଥ ପାର୍ଶ୍ୱରେ ଗୁରୁବାର ପୋଲିସ ଉପସ୍ଥିତି ସତ୍ତ୍ୱେ ସାମାଜିକ ଦୂରତା ନିୟମ ଲୋକମାନେ ଉଲ୍ଲଂଘନ କରିଥିବା ଦେଖିବାକୁ ମିଳିଥିଲା। ସାମାଜିକ ଦୂରତା ଉପରେ ସଚେତନ ଥିବା ପୋଲିସ ଅଧିକାରୀ ଏହି ଘଟଣାରେ ନୀରବ ଦ୍ରଷ୍ଟା ସାଜିବା ଘଟଣା ଏଠାରେ ଚର୍ଚ୍ଚାର ବିଷୟ ହୋଇଛି ା
ମିଳିଥିବା ସୁଚନା ଅନୁଯାୟୀ, ଚାରବାହାଲ ଅଧୀନ ଥିବା ମୋଟେର ଫାଣ୍ଡି ଅଧିକାରୀ ଶେଖର ଜେନାଙ୍କ ବଦଳି ଯୋଗୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା ା ଫାଣ୍ଡି ଅଧିକାରୀ ଜେନାଙ୍କ ବଦଳି ପଛରେ ସ୍ଥାନୀୟ ସରପଞ୍ଚଙ୍କ ସ୍ବାମୀଙ୍କ ହାତ ଥିବା ଅଭିଯୋଗ କରି ଗୁରୁବାର ସ୍ଥାନୀୟ ଲୋକେ ଚାରବାହାଲ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ରୁଣ୍ଡ ହୋଇ ପ୍ରତିବାଦ କରିଥିଲେ। ପରେ ସରପଞ୍ଚଙ୍କ ସ୍ବାମୀ ମୀନକେତନ ଦଳପତି ଘଟଣା ସ୍ଥଳକୁ ଆସି ଏଥିରେ ମୋର ହାତ ନ ଥିବା ଲୋକଙ୍କୁ କହିଥିଲେ। ଏ ସମ୍ପର୍କରେ ଖବର ପାଇ ମୋଟେର ନୂଆ ଫାଣ୍ଡି ଅଧିକାରୀ ଅଜୟ କୁମାର ନାଏକ ଘଟଣାସ୍ଥଳରେ ପହଞ୍ଚତ୍ ଲୋକଙ୍କୁ ବୁଝାସୁଝା ପାଇଁ ଚେଷ୍ଟା କରିଥିଲେ। ଏହି ସମୟରେ ଲୋକମାନେ ସାମାଜିକ ଦୂରତ୍ୱ ନିୟମକୁ ଭୁଲିଯାଇ ଗୋଟିଏ ସ୍ଥାନରେ ରୁଣ୍ଡ ହୋଇଥିଲେ। ପରେ ଜୁନାଗଡ଼ ବିଡିଓ ଦୁଲାରାମ ମାରାଣ୍ଡି ଓ କୋକସରା ଆଇଆଇସି ବାସୁଦେବ ଛତ୍ରିଆ ଘଟଣା ସ୍ଥଳକୁ ଆସି ଲୋକଙ୍କୁ ଘରକୁ ଯିବା ପାଇଁ କହିଥିଲେ। ଏ ସଂକ୍ରାନ୍ତରେ କଳାହାଣ୍ଡି ଏସ୍ପି ବି.ଗଙ୍ଗାଧର କହିଛନ୍ତି ଉକ୍ତ ଘଟଣା ତଦନ୍ତ କରାଯାଇ ପଦକ୍ଷେପ ନିଆଯିବ ।
