ଖଇରା, ୨୮।୬(ଡି.ଏନ.ଏ.)-ଖଇରା ବ୍ଲକର କେତେକ କର୍ମଚାରୀ ଓ ଖଇରା ଷ୍ଟେଟ ବ୍ୟାଙ୍କ ଶାଖାର ପରିଚାଳକ ବିଷ୍ଣୁ ମୋହନ ମହାପାତ୍ରଙ୍କ ମଧ୍ୟରେ ବୁଧବାର ହୋଇଥିବା ଗଣ୍ଡଗୋଳ ପୋଲିସ ଓ ଗଣମାଧ୍ୟମ ପ୍ରତିନିଧିଙ୍କ ଉପସ୍ଥିତିରେ ସମାଧାନ ହୋଇଛି ା ଗରୁବାର ପୂର୍ବାହ୍ନରେ ପ୍ରଥମେ ଖଇରା ଥାନା ଏଏସ୍ଆଇ ବାସୁଦେବ ମହାନ୍ତି ବ୍ୟାଙ୍କ ଶାଖା ପରିସରକୁ ଯାଇ ବୁଧବାର ଘଟଣାର ସିସିଟିଭି ଫୁଟେଜ ଯାଞ୍ଚ କରିଥିଲେ ା ଏଥିରେ ପ୍ରଥମେ ୨ଟା ୦୧ ମିନିଟରେ ବ୍ଲକ କ୍ୟାଶିୟର ମାନଭଞ୍ଜନ ମହାପାତ୍ର ଅନ୍ୟ ବ୍ୟାଙ୍କର ପାସ୍ବୁକ ନେଇ ପ୍ରିଣ୍ଟ କରିବାକୁ ଚାହୁଁଥିବା ବେଳେ ବ୍ୟାଙ୍କ କର୍ମଚାରୀ ଓ ପରିଚାଳକ ମହାପାତ୍ରଙ୍କ ମଧ୍ୟରେ ଯୁକ୍ତତର୍କ ହେଉଥିବାର ଦେଖାଯାଇଥିଲା ା ପରେ ୨ଟା ୩୦ମିନିଟରେ କ୍ୟାଶିୟରଙ୍କ ସହିତ ଅନ୍ୟ ୨ କର୍ମଚାରୀ ବ୍ୟାଙ୍କ ଭିତରକୁ ଆସି ପ୍ରଥମେ ଶାଖା ପରିଚାଳକଙ୍କୁ ଘେରି ପାଟିତୁଣ୍ଡ ଗଣ୍ଡଗୋଳ କରିବାକୁ ଉଦ୍ୟମ କରୁଥିବା ବେଳେ ଶାଖା ପରିଚାଳକ ସେମାନଙ୍କୁ ଠେଲି ବାହାରକୁ ବାହାର କରିବାକୁ ଚେଷ୍ଟା କରୁଥିବା ଦୃଶ୍ୟ ଦେଖିବାକୁ ମିଳିଥିଲା। ପରେ ଅପରାହ୍ନରେ ସମାଧାନ ପାଇଁ ବ୍ଲକ ପରିସରରେ ଅନୁଷ୍ଠିତ ବୈଠକରେ ଘଟଣାରେ ସମ୍ପୃକ୍ତ ଥିବା ବ୍ଲକ କର୍ମଚାରୀ ମାନଭଞ୍ଜନ ମହାପାତ୍ର, ରୋହିଣିନନ୍ଦନ ସେନ, ମାଧବ ଦାଶ, ବିଡିଓ ମହେଶ ଚୌଧୁରୀ, ଶାଖା ପରିଚାଳକ ମହାପାତ୍ର, ଖଇରା ଥାନା ଆଇଆଇସି ଲୋପାମୁଦ୍ରା ନାୟକ, ଡବ୍ଲ୍ୟୁଇଓ ତ୍ରିଦେବ ବରାଳ ଓ କେତେକ ଗଣମାଧ୍ୟମର ପ୍ରତିନିଧି ପ୍ରମୁଖ ଉପସ୍ଥିତିରେ ବିବାଦର ସମାଧାନ କରାଯାଇଥିଲା।
