ନୂଆଦିଲ୍ଲୀ,୭।୫: ବର୍ତ୍ତମାନ ରାଜକୋଷ ଉପରେ ଖର୍ଚ୍ଚଜନିତ ଚାପ ବଢ଼ିଥିବା ବେଳେ ସରକାର ଏହାକୁ ନେଇ ବିକଳ୍ପ ପନ୍ଥା ବାହାର କରିଛନ୍ତି। ଏହାକୁ ଧ୍ୟାନରେ ରଖି ସରକାର ମଙ୍ଗଳବାର ସନ୍ଧ୍ୟାରେ ପେଟ୍ରୋଲ ଏବଂ ଡିଜେଲ ଉପରେ ଏକ୍ସାଇଜ ଡ୍ୟୁଟି ବା ଉତ୍ପାଦ ଟିକସରେ ରେକର୍ଡ ବୃଦ୍ଧି କରିଛନ୍ତି। ଫଳରେ ଏହି ଟିକସ ପେଟ୍ରୋଲ ଏବଂ ଡିଜେଲ ଉପରେ ଯଥାକ୍ରମେ ୧୦ ଟଙ୍କା ଓ ୧୩ ଟଙ୍କାକୁ ବୃଦ୍ଧି ଘଟିଛି। ଇନ୍ଧନ ଉପରେ ଟିକସ କଥା ବିଚାର କଲେ ଉତ୍ପାଦ ଟିକସ ଏବଂ ଭାଟ୍ ବାବଦ ଅଂଶ ମୋଟ ମୂଲ୍ୟର ପ୍ରାୟ ୭୦% ଛୁଇଁଛି। ବର୍ତ୍ତମାନ ଅନ୍ତର୍ଜାତୀୟ ଅଶୋଧିତ ତୈଳ ବଜାରରେ ମୂଲ୍ୟ ପ୍ରାୟ ୨ ଦଶନ୍ଧି ତଳକୁ ଖସିଛି। ଏଥିରୁ ତୈଳ ବିପଣନ କମ୍ପାନୀଗୁଡିକ ଲାଭ ଉଠାଉଛନ୍ତି। କାରଣ ପେଟ୍ରୋଲ ଡିଜେଲ ଦରର ରିଟେଲ ମୂଲ୍ୟରେ କୌଣସି ହ୍ରାସ ଘଟିନାହିଁ। କମ୍ପାନୀଗୁଡ଼ିକର ଏହି ସ୍ଥିତିକୁ ବିଚାରକରି ସରକାର ଉତ୍ପାଦ ଟିକସ ବଢାଇଛନ୍ତି। ଫଳରେ ରାଜକୋଷକୁ ୧.୬ ଲକ୍ଷ କୋଟି ଟଙ୍କାର ରାଜସ୍ବ ଆସି ପାରିବ ବୋଲି ସୂଚନା ରହିଛି।
ଉତ୍ପାଦ ଟିକସ ବୃଦ୍ଧି କରାଯାଇଥିଲେ ମଧ୍ୟ ପେଟ୍ରୋଲ ଡିଜେଲ ଦର ଉପରେ ଏହାର ପ୍ରଭାବ ପଡିନାହିଁ। ବୁଧବାର ପେଟ୍ରୋଲ ଦର ଅପରିବର୍ତ୍ତିତ ୭୧.୨୬ ଟଙ୍କା ଏବଂ ଡିଜେଲ ୬୯.୩୯ ଟଙ୍କା ରହିଛି। ଉତ୍ପାଦ ଟିକସ ବଢ଼ିଥିଲେ ମଧ୍ୟ ଅନ୍ତର୍ଜାତୀୟ ବଜାରରେ ଦର ନିମ୍ନରେ ଥିବା ଗ୍ରାହକଙ୍କ ଉପରେ ତୈଳ ବିପଣନ କମ୍ପାନୀଗୁଡିକ କୌଣସି ବୋଝ ନ ଦେଇ ନିଜ ମଧ୍ୟରେ ବର୍ଦ୍ଧିତ ମୂଲ୍ୟକୁ ବ୍ୟବସ୍ଥିତ କରିଛନ୍ତି। ଦୁଇ ମାସରୁ କମ୍ ସମୟ ମଧ୍ୟରେ ସରକାର ଲଗାତର ଭାବେ ଦ୍ୱିତୀୟ ଥର ଲାଗି ଏଭଳି ଟିକସ ବୃଦ୍ଧି କରିଛନ୍ତି। ଏହି ଯୋଜନା ଦ୍ୱାରା ରାଜକୋଷକୁ ପ୍ରାୟ ୧.୭ ଲକ୍ଷ କୋଟି ଟଙ୍କା ରାଜସ୍ବ ଆସିପାରିବ ବୋଲି ତୈଳ ବିପଣନ କମ୍ପାନୀର ଜଣେ ବରିଷ୍ଟ ଅଧିକାରୀ ସୂଚନା ଦେଇଛନ୍ତି। ଏହା ପୂର୍ବରୁ ମାର୍ଚ୍ଚ ୧୪ରେ ସରକାର ପେଟ୍ରୋଲ ଡିଜେଲ ଉପରେ ଲିଟର ପିଛା ୩ ଟଙ୍କା ଉତ୍ପାଦ ଟିକସ ବୃଦ୍ଧି କରିଥିଲେ। ଏହା ଦ୍ୱାରା ରାଜକୋଷକୁ ୩୯ ହଜାର କୋଟି ଟଙ୍କା ଆସିବ ବୋଲି ଆକଳନ କରାଯାଇଥିଲା। ଲଗାତର ଭାବେ ଏଭଳି ୨ଥର ମୂଲ୍ୟ ବୃଦ୍ଧି କରାଯିବା ଫଳରେ ରାଜକୋଷକୁ ପ୍ରାୟ ୨ ଲକ୍ଷ କୋଟି ଟଙ୍କା ଆସିବ ବୋଲି କୁହାଯାଉଛି।
