ଅନୁଗୋଳ ଅଫିସ, ୧।୪: କରୋନା ମୁକାବିଲା ପାଇଁ ସୋମବାର ଅନୁଗୋଳ ଜିଲାରେ ପାରା ମେଡିକାଲ ଷ୍ଟାଫ ନିଯୁକ୍ତି କରାଯାଇଥିଲା। ମଙ୍ଗଳବାର ସେମାନଙ୍କୁ ନିଯୁକ୍ତିପତ୍ର ବଣ୍ଟନ କରାଯିବାର ଥିଲା। ଏଥିପାଇଁ ପୂର୍ବାହ୍ନରେ ମେଡିକାଲ ପରିସରରେ ଷ୍ଟାଫ୍ମାନେ ପହଞ୍ଚି ଯାଇଥିଲେ। ହେଲେ ନବନିଯୁକ୍ତ କର୍ମଚାରୀଙ୍କ ମଧ୍ୟରେ ସାମାଜିକ ଦୂରତ୍ୱ ରଖିବାକୁ କର୍ତ୍ତୃପକ୍ଷ ଯେପରି ଭୁଲିଯାଇଥିଲେ। ତେବେ ଗହଳି ଦେଖି ଉପଜିଲାପାଳ ବାସୁଦେବ ଶତପଥୀ କର୍ତ୍ତୃପକ୍ଷଙ୍କୁ ତାଗିଦ୍ କରିଥିଲେ। ଏହାପରେ ମେଡିକାଲ କର୍ତ୍ତୃପକ୍ଷ କର୍ମଚାରୀମାନଙ୍କୁ ଫେରିଯିବାକୁ କହିବା ସହ ଅପରାହ୍ନରେ ଡାକି ନିଯୁକ୍ତିପତ୍ର ପ୍ରଦାନ କରିଥିଲେ।
ପ୍ରକାଶ ଯେ, ନିଯୁକ୍ତିପତ୍ର ପାଇଁ ପାରାମେଡିକାଲ ଷ୍ଟାଫ୍ମାନେ ମେଡିକାଲ ପରିସରରେ ଭିଡ଼ ଲଗାଇଥିବା ସମ୍ପର୍କରେ ଉପଜିଲାପାଳ ଶତପଥୀଙ୍କୁ ସୂଚନା ମିଳିଥିଲା। ତୁରନ୍ତ ସେ ପହଞ୍ଚି ଜିଲା ମୁଖ୍ୟ ଚିକିତ୍ସାଧିକାରୀଙ୍କ ସହ ଅନ୍ୟମାନଙ୍କୁ ତାଗିଦ୍ କରିଥିଲେ। ଖବରପାଇ ଅନୁଗୋଳ ଏସ୍ଡିପିଓ ଅଶ୍ୱନୀ ସାହୁ, ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ଓ ଏସ୍ଆଇ ପ୍ରକାଶ ଚନ୍ଦ୍ର ମାଝି ପହଞ୍ଚତ୍ ନବନିଯୁକ୍ତ କର୍ମଚାରୀମାନଙ୍କୁ ସାମାଜିକ ଦୂରତା ବଜାୟ ରଖିବାକୁ ପରାମର୍ଶ ଦେଇଥିଲେ। କିନ୍ତୁ ସେମାନେ କଟକଣାକୁ ବେଖାତିର କରିବାରୁ ସମସ୍ତଙ୍କୁ ଫେରାଇ ଦିଆଯାଇଥିଲା। ଅପରାହ୍ନ ୩ଟାରେ ସେମାନଙ୍କୁ ଡକାଯାଇ ସାମାଜିକ ଦୂରତା ରକ୍ଷା କରିବାକୁ କୁହାଯିବା ସହ ସହ ୩୦ ଜଣ ଫାର୍ମାସିଷ୍ଟ, ୪୧ ଜଣ ଷ୍ଟାଫ୍ ନର୍ସ, ୧୨ ଜଣ ଟେକ୍ନିସିଆନ, ୨ ଜଣ ରେଡିଓ ଗ୍ରାଫର, ୧୯ ଜଣ ମଲ୍ଟି ପ୍ରପୋଜ ହେଲ୍ପ ୱାର୍କର (ପୁରୁଷ) ଓ ୪୨ ଜଣ ମଲ୍ଟି ପ୍ରପୋଜ ହେଲ୍ପ ୱାର୍କର (ମହିଳା)ଙ୍କୁ ନିଯୁକ୍ତିପତ୍ର ପ୍ରଦାନ କରାଯାଇଥିଲା।
