ପିପିଲି,୧୮।୫(ଡି.ଏନ୍.ଏ.): ପିପିଲିରେ ଦ୍ୱିତୀୟ କରୋନା ସଂକ୍ରମିତ ରବିବାର ରାତିରେ ଚିହ୍ନଟ ହୋଇଛନ୍ତି। ସେ ବୀରପୁରୁଷୋତ୍ତମପୁର ପଞ୍ଚାୟତ ଅଞ୍ଚଳର ୨୨ବର୍ଷ ଯୁବକ ହୋଇଥିବାବେଳେ ନିକଟରେ ତାମିଲନାଡୁରୁ ଆସିଥିଲେ। ମେ ୧୩ତାରିଖରେ ସେ ଓ ତାଙ୍କର ଜଣେ ସାଥୀ ସେଠାରୁ ଏକ ବସ ଯୋଗେ ଆସି କୌଶଲ୍ୟାଗଙ୍ଗସ୍ଥିତ ଜିଲା ସ୍କ୍ରିନିଂ ସେଣ୍ଟରରେ ପହଞ୍ଚତ୍ଥିଲେ। ସେଠାରେ ପ୍ରାଥମିକ ଯାଞ୍ଚ ପରେ ତାଙ୍କୁ ମଙ୍ଗଳପୁର ପଞ୍ଚାୟତର ଏକ ସ୍କୁଲରେ ଖୋଲାଯାଇଥିବା ସରକାରୀ କ୍ୱାରାଣ୍ଟାଇନ ସେଣ୍ଟରରେ ରଖାଯାଇଥିଲା। ସେଠାରେ ସେ ଅସୁସ୍ଥ ହେବାରୁ ଗତ ଶୁକ୍ରବାର ତାଙ୍କର ସ୍ବାବ ପରୀକ୍ଷା ହୋଇଥିଲା। ରିପୋର୍ଟ ପଜିଟିଭ୍ ଆସିବାରେ ରବିବାର ବିଳମ୍ବିତ ରାତିରେ ସ୍ବାସ୍ଥ୍ୟ ବିଭାଗର ଏକ ସ୍ବତନ୍ତ୍ର ଟିମ ତାଙ୍କୁ କୋଭିଡ୍ ହସ୍ପିିଟାଲ ନେଇଛି। ଏହି ସେଣ୍ଟରରୁ ସଂକ୍ରମିତ ଚିହ୍ନଟ ହେବା ପରେ ଅନ୍ୟ ଅନ୍ତେବାସୀମାନେ ଚିନ୍ତିତ ହୋଇପଡିଛନ୍ତି। ସୋମବାର ଏହି ସେଣ୍ଟରକୁ ସାନିଟାଇଜ କରାଯାଇଛି। ସୂଚନାଯୋଗ୍ୟ, ଗତ ମାସରେ ପିପିଲି ବ୍ଲକର ତଥା ପୁରୀ ଜିଲାର ପ୍ରଥମ କରୋନା ସଂକ୍ରମିତ ଚିହ୍ନଟ ହୋଇଥିଲେ। ସେ ହାଟସାହି ପଞ୍ଚାୟତର ଦାନଗହୀର ଗ୍ରାମର ହୋଇଥିବାବେଳେ ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରିଛନ୍ତି।
