ଭୁବନେଶ୍ୱର,୧ା୬(ବ୍ୟୁରୋ): ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢୁଥିବାବେଳେ ଏମାନଙ୍କ ଚିକିତ୍ସା କରୁଥିବା ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କ ସୁରକ୍ଷା ପାଇଁ ପର୍ସନାଲ ପ୍ରୋଟେକ୍ଟିଭ୍ ଇକ୍ୟୁପ୍ମେଣ୍ଟ(ପିପିଇ) କିଟ୍ ଜରୁରୀ ହୋଇପଡିଛି। ତେବେ ଉଚ୍ଚକୋଟୀର ପିପିଇ କିଟ୍ ପାଇବା ଏବେ ରାଜ୍ୟଗୁଡ଼ିକ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ଏଭଳିସ୍ଥଳେ କିନ୍ତୁ ହାତକୁ ଆସିଥିବା ପିପିଇ କିଟ୍ ରଖୁନି ଓଡ଼ିଶା। ଏକାଧିକ ସଂସ୍ଥାକୁ ଲକ୍ଷାଧିକ ପିପିଇ କିଟ୍ ପାଇଁ ଅର୍ଡର ଦିଆଯାଇଥିଲେ ମଧ୍ୟ ଏବେ ତାହାକୁ ରଖିବାକୁ ମନା କରିଦେଇଛି ଓଡ଼ିଶା ରାଜ୍ୟ ମେଡିକାଲ କର୍ପୋରେଶନ ଲିମିଟେଡ୍ (ଓଏସ୍ଏମ୍ସିଏଲ୍)। ଫଳରେ ରାଜ୍ୟ ବାହାରୁ କିଟ୍ ନେଇ ଆସିଥିବା ୪୦ରୁ ଊର୍ଦ୍ଧ୍ୱ ଟ୍ରକ୍ ଏବେ ରାମମନ୍ଦିର ନିକଟ ଓଏସ୍ଏମ୍ସିଏଲ୍ ଓ୍ବେର୍ହାଉସ୍ ସାମ୍ନାରେ ୭ଦିନରୁ ଊର୍ଦ୍ଧ୍ୱ ହେବ ଅଟକି ରହିଛି। ଯଥାର୍ଥ କାରଣ ନ ଦର୍ଶାଇ ଓଡ଼ିଶା ସରକାର କିଟ୍ଗୁଡ଼ିକ ଗ୍ରହଣ କରିବାକୁ ମନା କରିଦେଇଥିବା କିଟ୍ ନିର୍ମାଣକାରୀ ଏମ୍ଏସ୍ଏମ୍ଇଗୁଡ଼ିକ ଅଭିଯୋଗ କରିଛନ୍ତି।
କରୋନା ମୁକାବିଲା କ୍ଷେତ୍ରରେ ଓଏସ୍ଏମ୍ସିଏଲ୍ ପ୍ରମୁଖ ଭୂମିକା ଗ୍ରହଣ କରିଛି। କୋଭିଡ୍ ଟେଷ୍ଟ୍ କିଟ୍ରୁ ଆରମ୍ଭ କରି ପିପିଇ ପର୍ଯ୍ୟନ୍ତ ସବୁକିଛି ଆଣିବା ଦାୟିତ୍ୱ କର୍ପୋରେଶନ ଉପରେ ନ୍ୟସ୍ତ ରହିଛି। ନିକଟରେ ଓଏସ୍ଏମ୍ସିଏଲ୍ ପ୍ରାୟ ୧୫ଲକ୍ଷ ୭୦ ହଜାର ପିପିଇ କିଟ୍ ପାଇଁ ରାଜ୍ୟ ବାହାରର ଏକାଧିକ ବିତରକ ସଂସ୍ଥାକୁ ଅର୍ଡର ଦେଇଥିଲା। ଏହାସହ ୨.୨ କୋଟି ଟ୍ରିପଲ୍-ଲେୟାର ମାସ୍କ, ୭ ଲକ୍ଷ ୫୦ ହଜାର ଏନ୍୯୫ ମାସ୍କ, ୧.୭ କୋଟି ନୋଜ୍ କ୍ଲିପ୍ ଆଡପ୍ଟେବୁଲ୍ ମାସ୍କ ଏବଂ ସ୍ବାସ୍ଥ୍ୟକର୍ମୀଙ୍କ ପାଇଁ ଆବଶ୍ୟକ ଅନ୍ୟ ସାମଗ୍ରୀ ଲାଗି ଅର୍ଡର ଦିଆଯାଇଥିଲା। ଅର୍ଡର ନେଇଥିବା ଏକ କମ୍ପାନୀର ଜଣେ ଅଧିକାରୀ କହିଛନ୍ତି, ଟେଣ୍ଡର ଅନୁଯାୟୀ ଜୁଲାଇ ଶେଷ ତାରିଖ ରହିଥିଲେ ମଧ୍ୟ ପରେ ଏହାକୁ ପରିବର୍ତ୍ତନ କରି ମେ’ ୨୬ ତାରିଖ ପରେ ଡେଲିଭରି ଗ୍ରହଣ କରିବୁନି ବୋଲି ଓଏସ୍ଏମ୍ସିଏଲ୍ କହିଥିଲା। ହେଲେ ନିର୍ଦ୍ଧାରିତ ସମୟରେ ଟ୍ରକ୍ଗୁଡ଼ିକ ସମସ୍ତ ଅର୍ଡର ନେଇ ଓ୍ବେର୍ହାଉସ୍ରେ ପହଞ୍ଚତ୍ଥିଲେ ବି କେହି ଏହାକୁ ରଖୁ ନ ଥିବା ସେ କହିଛନ୍ତି। ଉତ୍ତରାଖଣ୍ଡରୁ ସାମଗ୍ରୀ ଧରି ଆସିଥିବା ଜଣେ ଟ୍ରକ୍ ଡ୍ରାଇଭର ରୋଶନ କହିଛନ୍ତି, ଲକ୍ଡାଉନ୍ ସମୟରେ ଅନ୍ୟ ଏକ ରାଜ୍ୟରେ ଆସି ସପ୍ତାହେରୁ ଅଧିକ ଦିନ ହେବ ଫସି ରହିବା କଷ୍ଟଦାୟକ। ଖାଇବା ପିଇବାରେ ଆମକୁ ବହୁ ସମସ୍ୟା ହେଉଛି। ନା କମ୍ପାନୀ ଏଠାରୁ ଯିବାକୁ ଦେଉଛି ନା ଏମାନେ ଆମ ଅର୍ଡର ରଖୁଛନ୍ତି। ଟ୍ରକ୍ରେ ସେମିତି ପଡ଼ିରହିଛୁ।
ଏ ସମ୍ପର୍କରେ ସ୍ବାସ୍ଥ୍ୟ ବିଭାଗ ଅତିରିକ୍ତ ସଚିବ ପ୍ରଦୀପ୍ତ କୁମାର ମହାପାତ୍ର କହିଛନ୍ତି, ଆମ ପାଖରେ ପର୍ଯ୍ୟାପ୍ତ ସଂଖ୍ୟାରେ ପିପିଇ କିଟ୍ ଗଚ୍ଛିତ ଅଛି। ତେଣୁ ଆମେ ଆଉ କିଟ୍ ନ ପଠାଇବାକୁ ବିତରକମାନଙ୍କୁ କହିଥିଲୁ। ହେଲେ ଏହାମଧ୍ୟରେ ଅନେକ ଟ୍ରକ୍ ସାମଗ୍ରୀ ନେଇ ପହଞ୍ଚତ୍ସାରିଛନ୍ତି। ସୋମବାରଦିନ ଚୂଡାନ୍ତ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି। ତେବେ ଏନେଇ ଆମେ ଓଏସ୍ଏମ୍ସିଏଲ୍ ଏମ୍ଡି ଯାମିନୀ ଷଡ଼ଙ୍ଗୀଙ୍କୁ ଯୋଗାଯୋଗ କରିଥିଲେ ମଧ୍ୟ ସେ ଫୋନ୍ ଉଠାଇ ନ ଥିଲେ।
