ଭେରୋନିକା ଡକ୍! ସେ ବିଜ୍ଞାନ, ଇଂଲିଶ ଏବଂ ସ୍ପାନିଶ ଭାଷାର ଶିକ୍ଷୟିତ୍ରୀ। ତେବେ ସେ ଏମିତି ଜଣେ ମହିଳା ଯିଏ ଚାହାନ୍ତି ତାଙ୍କର ଛାତ୍ରୀଛାତ୍ରମାନେ ଭଲଭାବରେ ଜ୍ଞାନ ହାସଲ କରନ୍ତୁ। କୌଣସି ବି ବିଷୟରେ ତ୍ରୁଟିପୂର୍ଣ୍ଣ ଶିକ୍ଷା ଦେବାକୁ ସେ ପ୍ରୟାସ କରନ୍ତି ନାହିଁ। ସେଦିନ କ୍ଲାସ୍ରେ ତାଙ୍କର ହ୍ୟୁମାନ ଆନାଟୋମି (ମଣିଷ ଶରୀର ସମ୍ବନ୍ଧୀୟ ଶିକ୍ଷା) ପଢ଼େଇବାର ଥିଲା। ସେ ମଧ୍ୟ ଯାଇ ପାଠ ପଢ଼େଇଲେ। ମାତ୍ର ତାଙ୍କର ହୃଦ୍ବୋଧ ହେଲା ଯେ, ପିଲାମାନେ ମଣିଷ ଶରୀରର ଅଙ୍ଗପ୍ରତ୍ୟଙ୍ଗ ବିଷୟରେ ଠିକ୍ ଭାବରେ ବୁଝିପାରୁ ନାହାନ୍ତି। ସେ ପାଠ ପଢ଼ଉଥିବା ପିଲାମାନଙ୍କର ବୟସ ଥିଲା ୮ରୁ ୯ବର୍ଷ ମଧ୍ୟରେ। ପାଠ ହେଉଛି ହ୍ୟୁମାନ୍ ଆନାଟୋମି। ତେଣୁ ସେ ଏକ ଉପାୟ ବାହାର କଲେ। ଏକ ସ୍ବତନ୍ତ୍ର ଧରଣର ପୋଷାକ ପ୍ରସ୍ତୁତ କଲେ, ଯେଉଁଥିରେ ମଣିଷ ଶରୀର ଭିତରର ସମସ୍ତ ଅଙ୍ଗ ପ୍ରତ୍ୟଙ୍ଗକୁ ଚିତ୍ରିତ କରାଯାଇଥିଲା। ଯେଉଁଠି ହାର୍ଟ ରହିବା କଥା ସେଠାରେ ହାର୍ଟର ଚିତ୍ର କରାଯାଇଥିଲା। ଯେଉଁଠି ଅନ୍ତ୍ରନଳୀ ରହିବା କଥା ସେଠାରେ ଅନ୍ତ୍ରନଳୀର ଚିତ୍ର ଅଙ୍କା ଯାଇଥିଲା। ସେହି ପୋଷାକ ପିନ୍ଧି ଭେରୋନିକା କ୍ଲାସ୍ରୁମ୍ରେ ପହଞ୍ଚତ୍ଲେ। ଆଉ ପିଲାମାନଙ୍କୁ ହ୍ୟୁମାନ ଆନାଟୋମି ପଢ଼େଇଲେ। ଏଥର ପିଲାମାନଙ୍କୁ ଆଉ ହ୍ୟୁମାନ ଆନାଟୋମି ବୁଝିବାରେ କୌଣସି ଅସୁବିଧା ହୋଇ ନ ଥିଲା। ତେବେ କଥା ସେତିକିରେ ସୀମିତ ରହିଲା ନାହିଁ। ତାଙ୍କର ଏପରି ପାଠପଢ଼ା ସମ୍ବନ୍ଧରେ ଲୋକମାନେ ଜାଣନ୍ତୁ ବୋଲି ଚାହିଁଲେ ତାଙ୍କ ସ୍ବାମୀ ଏବଂ ତାଙ୍କର ଫଟୋକୁ ସେ ଫେସ୍ବୁକ୍ରେ ଅପଲୋଡ଼ କରିଦେଲେ। ଫେସ୍ବୁକ୍ରେ ଭେରୋନିକାଙ୍କର ଏପରି ଉଦ୍ୟମକୁ ବହୁଭାବରେ ପ୍ରଶଂସା କରାଯାଇଛି।
