ଝାରସୁଗୁଡା ଅଫିସ,୨୭ା୪- ଓଡିଶାରେ ବଢ଼ୁଥିବା କରୋନା ପଜିଟିଭର ମୁଖ୍ୟ କାରଣ ପଶ୍ଚିମବଙ୍ଗ ଲିଙ୍କ୍ ଦର୍ଶାଯାଉଛି। ଏମିତି ଜଣେ କଲିକତାରୁ ଝାରସୁଗୁଡା ଫେରନ୍ତା ବ୍ୟକ୍ତିଙ୍କୁ ନେଇ ବ୍ରଜରାଜନଜରରେ ସୋମବାର ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି। ପରେ ଜିଲାପାଳ ସରୋଜ କୁମାର ସାମଲଙ୍କ ହସ୍ତକ୍ଷେପ ପରେ ମାମଲାର ସମାଧାନ ହୋଇଛି।
ସୂଚନା ମୁତାବକ ଝାରସୁଗୁଡା ପୂର୍ତ୍ତ ବିଭାଗରେ କାର୍ଯ୍ୟରତ ଜଣେ କର୍ମଚାରୀ କିଛି ଦିନ ତଳେ ପଶ୍ଚିମବଙ୍ଗ ଯାଇଥିଲେ। ସେଠାରେ ତାଙ୍କ ନିଜ ଘର ଥିବା ବେଳେ ତାଙ୍କ ମା’ଙ୍କ ସ୍ବାସ୍ଥ୍ୟବସ୍ଥା ଠିକ ନ ଥିଲା। ସମ୍ପୃକ୍ତ କର୍ମଚାରୀ ରବିବାର ରାତି ଝାରସୁଗୁଡାକୁ ଫେରିଥିଲେ। ଏ ନେଇ ଜିଲା ପ୍ରଶାସନ ଅବଗତ ହେବା ପରେ ରବିବାର ବିଳମ୍ବିତ ରାତିରେ ସମ୍ପୃକ୍ତ କର୍ମଚାରୀ ଏବଂ ତାଙ୍କ ଦୁଇ ଝିଅ ଓ ସ୍ତ୍ରୀଙ୍କୁ ବ୍ରଜରାଜନଗରସ୍ଥିତ ପୂର୍ତ୍ତ ବିଭାଗର ବଙ୍ଗଳାକୁ ନେଇ କ୍ୱାରାଣ୍ଟାଇନରେ ରଖାଯାଇଥିଲା। ଅନ୍ୟପକ୍ଷେ ଏହି ବଙ୍ଗଳା ଦାଇତ୍ୱରେ ଥିବା ଜଣେ କର୍ମଚାରୀଙ୍କୁ ସେଠାରୁ ଅନ୍ୟତ୍ର ଯିବା ପାଇଁ କୁହାଯାଇଥିଲା। ସୋମବାର ସକାଳେ ଏ ନେଇ ସ୍ଥାନୀୟ ଲୋକେ ଜାଣିବା ପରେ ଏହାକୁ ବିରୋଧ କରି ଜିଲା ପ୍ରଶାସନ ପକ୍ଷରୁ ତିଆରି କରାଯାଇଥିବା କ୍ୱାରାଣ୍ଟାଇନ ସେଣ୍ଟର ରଖିବାକୁ ଦାବି କରିଥିଲେ। ଝାରସୁଗୁଡାରେ କ୍ୱାରାଣ୍ଟାଇନ ସେଣ୍ଟର ଥିବା ସତ୍ତ୍ୱେ ଏଠାକୁ କାହିଁକି ଅଣାଯାଇଥିଲା ବୋଲି ବିରୋଧ କରିଥିଲେ। ଘଟଣା ସ୍ଥଳରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହେବାରୁ ବ୍ରଜରାଜନଗର ଏସ୍ଡିପିଓ ଦିଲୀପ ଦାସ ଆସି ଲୋକଙ୍କ ସହିତ ଆଲୋଚନା କରିଥିଲେ। ଜିଲାପାଳ ସାମଲଙ୍କ ହସ୍ତକ୍ଷେପ ପରେ ଓ ଲୋକଙ୍କ ଦାବି ମୁତାବକ ସମ୍ପୃକ୍ତ ସରକାରୀ କର୍ମଚାରୀ ଓ ତାଙ୍କ ପରିବାରକୁ ବ୍ରଜରାଜନଗରରେ ଥିବା ଏକ କ୍ୱାରାଣ୍ଟାଇନ ସେଣ୍ଟରକୁ ସ୍ଥାନାନ୍ତର କରାଯାଇଥିଲା। ସେହିପରି ଏହି ବଙ୍ଗଳାକୁ ଜିଲା ପ୍ରଶାସନ କୋଭିଡ ମୁକାବିଲାରେ ବ୍ୟବହାର କରିବା ପାଇଁ ପଦକ୍ଷେପ ନେଇଛି। ତେବେ ଏହି ସରକାରୀ କର୍ମଚାରୀଙ୍କୁ ପଶ୍ଚିମବଙ୍ଗରୁ ଝାରସୁଗୁଡା ଫେରିବା ପାଇଁ ଅନୁମତିପତ୍ର କେଉଁ ସ୍ତରରୁ ପ୍ରଦାନ କରାଯାଇଥିବା ତାହା ତଦନ୍ତ ସାପେକ୍ଷ ବୋଲି ଲୋକେ ଦାବି କରିଛନ୍ତି।
