ଦାରିଙ୍ଗବାଡି,୨୨।୭(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଚାରି ଛକରେ ରହିଥିବା ଏକ ମାତ୍ର ବିଶ୍ରାମାଗାର ଏବେ ପରିତ୍ୟକ୍ତ ଅବସ୍ଥାରେ ରହିଛି। ପୁତ୍ତିମୟ ଗନ୍ଧରେ ନାକ ଫାଟି ଯାଉଛି। ଚାରିଆଡେ ଗଦା ଗଦା ଅଳିଆ ସାଙ୍ଗକୁ ପାନ ଛେପ ପରିବେଶକୁ ଅଧିକ ଦୂଷିତ କରୁଛି। ଯାତ୍ରୀ ବିଶ୍ରାମଗାରର ଗେଟ ଗୁଡିକ ଭାଙ୍ଗିରୁଜି ଯିବାରୁ ଗୋରୁ ଗାଈ, କୁକୁରର ଏବେ ମୁଖ୍ୟ ଆଡ୍ଡା ସ୍ଥଳୀ ପାଲଟିଛି। ସେମାନଙ୍କ ଗହଣରେ ଯାତ୍ରୀ ମାନେ ବସକୁ ଅପେକ୍ଷା କରିବା ପାଇଁ ବାଧ୍ୟ ହେଉଛନ୍ତି।
ସେହିପରି ଯାତ୍ରୀ ବିଶ୍ରାମାଗାରରେ ଯାତ୍ରୀଙ୍କ ପାଇଁ କୌଣସି ମୌଳିକ ସୁବିଧା ନାହିଁ। ବିଶେଷ କରି ପିଇବା ପାଣି ପାଇଁ ବ୍ୟବସ୍ଥା ନ ଥିବାରୁ ଦୁର୍ଗମ ଗ୍ରାମରୁ ଆସିଥିବା ଗରିବ ଅସହାୟ ଲୋକମାନେ ବଜାରରେ ମିଳୁଥିବା ପାଣି କିଣିବାକୁ ପଡୁଥିବା ଗ୍ରୀନବାଡି ଗ୍ରାମର ବିକାଶ ନାୟକ, ସିକପାଟା ଗ୍ରାମର ଅକ୍ଷୟ ପରିଛା, ସାଗର ନାୟକ ପ୍ରମୁଖ ଅଭିଯୋଗ କରିଛନ୍ତି। ଲୋକଙ୍କ ବହୁ ଦିନର ଦାବି ପରେ ୨୦୨୩ ମସିହାରେ ସ୍ଥାନୀୟ ପ୍ରଶାସନ ପକ୍ଷରୁ ଯାତ୍ରୀ ବିଶ୍ରାମାଗାର ନିର୍ମାଣ ଓ ଲୋକାର୍ପଣ କରାଯାଇଥିଲା।
ଇତି ମଧ୍ୟରେ ମାତ୍ର ୩ ବର୍ଷ ବିତିଥିବା ବେଳେ ଏହାର ଅବସ୍ଥା ଶୋଚନୀୟ ହୋଇପଡିଛି। ଉକ୍ତ ବିଶ୍ରାମାଗାର ଉପରେ ଦାରିଙ୍ଗବାଡି ବ୍ଲକର ୨୫ ପଞ୍ଚାୟତବାସୀ ନିର୍ଭର କରୁଥିବା ବେଳେ ବାଲିଗୁଡାରୁ ବ୍ରହ୍ମପୁର, ଦାରିଙ୍ଗବାଡିରୁ ଗଜପତି ଜିଲା ମୋହନା ଦେଇ ବ୍ରହ୍ମପୁର, ଦାରିଙ୍ଗବାଡିରୁ ଫୁଲବାଣୀ, ଭୁବନେଶ୍ୱର ଆଦି ଅଞ୍ଚଳକୁ ଯାତାୟାତ କରୁଥିବା ଯାତ୍ରୀବାହୀ ବସକୁ ଯାତ୍ରୀମାନେ ଉକ୍ତ ବିଶ୍ରାମାଗାର ଉପରେ ନିର୍ଭର କରି ବିଶ୍ରାମ କରନ୍ତି।
କିନ୍ତୁ ତାର ରକ୍ଷଣବେକ୍ଷଣ ଅଭାବ ଯୋଗୁ ଯାତ୍ରୀମାନଙ୍କ ପାଇଁ ଆଉ କୌଣସି ବିକଳ୍ପ ନ ଥିବାରୁ ସେହି ପରିତ୍ୟକ୍ତ ବିଶ୍ରାମାଗାର ଉପରେ ନିର୍ଭର କରନ୍ତି ବୋଲି ଅଞ୍ଚଳର ଉପେନ୍ଦ୍ର ନାୟକ, ଆଶିଷ ନାୟକ, ପ୍ରିୟଞ୍ଜନ ନାୟକ, ଆକାଶ ମହାପାତ୍ର ପ୍ରମୁଖ ଉଦବେଗର ସହ କହିଛନ୍ତି। ସେମାନେ ଆହୁରି କହିଛନ୍ତି ଯେ, ଦାରିଙ୍ଗବାଡି ବିଶ୍ୱସ୍ତରୀୟ ପର୍ଯ୍ୟଟନକ୍ଷେତ୍ର କରିବାକୁ ସରକାର ପଦକ୍ଷେପ ନେଉଥିବା ବେଳେ ପର୍ଯ୍ୟଟକ ଓ ଯାତ୍ରୀଙ୍କ ପାଇଁ ଭଲ ବିଶ୍ରାମ କକ୍ଷଟିଏ ନାହିଁ ତେଣୁ ଏହାକୁ ଗୁରୁତ୍ୱ ଦେବାକୁ ଅଞ୍ଚଳବାସୀ ଦାବି କରିଛନ୍ତି।
Dharitri – Odisha’s No.1 Odia Daily
