ନୂଆଦିଲ୍ଲୀ,୧୫।୪: କଂଗ୍ରେସ ନେତା ପବନ ଖେରାଙ୍କୁ ସୁପ୍ରିମକୋର୍ଟରୁ ବଡ଼ ଝଟକା ଲାଗିଛି। ସୁପ୍ରିମକୋର୍ଟ ତେଲଙ୍ଗାନା ହାଇକୋର୍ଟଙ୍କ ଅନ୍ତରୀଣ ଜାମିନ ପ୍ରଦାନ ଆଦେଶ ଉପରେ ସ୍ଥଗିତାଦେଶ ଲଗାଇଛନ୍ତି। କୋର୍ଟ କହିଛନ୍ତି, ତେଲଙ୍ଗାନା ହାଇକୋର୍ଟ ପୂର୍ବ କ୍ଷେତ୍ରାଧିକାର ନିଷ୍ପତ୍ତିକୁ ଅବମାନନା କରିଛନ୍ତି। ଖେରା ଆସାମ କୋର୍ଟରୁ ଆଗୁଆ ଜାମିନ ମାଗିବା ଉଚିତ। ସୁପ୍ରିମକୋର୍ଟ ତିନି ସପ୍ତାହ ମଧ୍ୟରେ ମାମଲାର ଶୁଣାଣି କରିବେ।
ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହେଟ୍ଟା କହିଥିଲେ ଯେ, ଏହି ମାମଲାରେ ତେଲଙ୍ଗାନା ହାଇକୋର୍ଟର କୌଣସି ଅଧିକାର ନାହିଁ। ଅପରାଧ ଏବଂ ଏଫଆଇଆର ଉଭୟ ଆସାମରେ ହୋଇଥିଲା।
ଅଭିଯୁକ୍ତ ଦାବି କରନ୍ତି ଯେ, ସେ ବାରମ୍ବାର ହାଇଦ୍ରାବାଦ ଯାଆନ୍ତି କାରଣ ତାଙ୍କ ପତ୍ନୀ ସେଠାରେ ରୁହନ୍ତି। ପ୍ରକୃତରେ ତାଙ୍କ ପତ୍ନୀ କିନ୍ତୁ ଦିଲ୍ଲୀରେ ରୁହନ୍ତି। ତୃତୀୟ ରାଜ୍ୟରେ ଆବେଦନ ଦାଖଲ କରିବା ଆଇନର ଅପବ୍ୟବହାର।
ସୂଚନାଯୋଗ୍ୟ, ତେଲଙ୍ଗାନା ହାଇକୋର୍ଟ ତାଙ୍କୁ ଏକ ସପ୍ତାହ ପାଇଁ ଆଗୁଆ ଜାମିନ ପ୍ରଦାନ କରିଛନ୍ତି। ଏହି ମାମଲା ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କ ପତ୍ନୀ ରିଙ୍କି ଭୂୟାଁ ଶର୍ମାଙ୍କ ଦ୍ୱାରା ତାଙ୍କ ବିରୋଧରେ ମାନହାନୀ ଏବଂ ଅଯୁକ୍ତିକର ଅଭିଯୋଗ ଆଣିବା ପାଇଁ ଦାୟର କରାଯାଇଥିବା ଏକ ଏଫଆଇଆର ସହିତ ଜଡିତ। ସେ ଆସାମ ପୋଲିସ ଦ୍ୱାରା ତାଙ୍କ ବିରୋଧରେ ଦାୟର ମାମଲାରେ ଗିରଫଦାରୀରୁ ରକ୍ଷା ପାଇବା ପାଇଁ ମଧ୍ୟବର୍ତ୍ତୀକାଳୀନ ସୁରକ୍ଷା ମାଗିଥିଲେ।
ଆସାମ ପୋଲିସ ପବନ ଖେରାଙ୍କ ବିରୋଧରେ ଗୌହାଟି କ୍ରାଇମ ବ୍ରାଞ୍ଚ ପୋଲିସ ଷ୍ଟେଶନରେ ମାନହାନି, ଜାଲିଆତି ଏବଂ ଆପରାଧିକ ଷଡଯନ୍ତ୍ର ପାଇଁ ମାମଲା ପଞ୍ଜିକୃତ କରିଛି। ରିଙ୍କି ଭୂୟାଁଙ୍କ ପାଖରେ ଅନେକ ବିଦେଶୀ ପାସପୋର୍ଟ ଅଛି ଏବଂ ବିଦେଶରେ ଅଘୋଷିତ ସମ୍ପତ୍ତି ଅଛି ବୋଲି ସେ ଦାବି କରିବା ପରେ ଏହି ମାମଲା ଦାୟର କରାଯାଇଥିଲା। ଆସାମ ପୋଲିସର ଏକ ଦଳ ପବନ ଖେରାଙ୍କ ଦିଲ୍ଲୀସ୍ଥିତ ଘରେ ପହଞ୍ଚିଥିଲା। କିନ୍ତୁ ସେତେବେଳେ ଖେରା ଉପସ୍ଥିତ ନ ଥିଲେ।
ମୁଖ୍ୟମନ୍ତ୍ରୀ ଶର୍ମାଙ୍କ ପତ୍ନୀଙ୍କ ବିରୋଧରେ ଚାଞ୍ଚଲ୍ୟକର ଅଭିଯୋଗ ଆଣିବା ପରଠାରୁ କଂଗ୍ରେସ ନେତା ଆସାମ ପୋଲିସର ନଜରରେ ଅଛନ୍ତି। ତାଙ୍କ ବିରୋଧରେ ମାନହାନି, ଜାଲିଆତି ଏବଂ ଅପରାଧିକ ଷଡ଼ଯନ୍ତ୍ର ସମେତ BNSର ୧୪ଟି ଧାରା ଅଧୀନରେ ଏକ ମାମଲା ରୁଜୁ କରାଯାଇଛି।
ପବନ ଖେରାଙ୍କ ସାମ୍ବାଦିକ ସମ୍ମିଳନୀ ପରେ ବିବାଦ ଆରମ୍ଭ ହୋଇଥିଲା। ଏଥିରେ ସେ ଦାବି କରିଥିଲେ ଯେ, ରିଙ୍କି ଭୂୟାଁ ସର୍ମାଙ୍କ ପାଖରେ ତିନୋଟି ପାସପୋର୍ଟ, ଦୁବାଇରେ ଅଘୋଷିତ ବିଳାସପୂର୍ଣ୍ଣ ସମ୍ପତ୍ତି ଏବଂ ଆମେରିକାରେ ସେଲ କମ୍ପାନୀ ଅଛି।
Dharitri – Odisha’s No.1 Odia Daily
