ଚେକ୍ ଗଣରାଜ୍ୟର ପ୍ରାଗ ବିଶ୍ୱବିଦ୍ୟାଳୟର ଗବେଷକମାନେ ସ୍ବୟଂଚାଳିତ ସୋଲାର ସିଷ୍ଟମ୍ ଦ୍ୱାରା ପବନରୁ ପାଣି ସଂଗ୍ରହ କରିବାର ଏକ ପଦ୍ଧତି ପାଇଛନ୍ତି। ଏହାକୁ ସୋଲାର ଏୟାର ଓ୍ବାଟର ଆର୍ଥ ରିସୋର୍ସ( ଏସ୍ଏଡବ୍ଲ୍ୟୁଇଆର ବା ସାଓ୍ବେର )କୁହାଯାଉଛି। ଏହି ପଦ୍ଧତିରେ ସେମାନେ ଦିନକୁ ୧୦୦ ଲିଟର ପାନୀୟ ଜଳ ସଂଗ୍ରହ କରିପାରୁଛନ୍ତି। ପୃଥିବୀର ଯେକୌଣସି ସ୍ଥାନରେ ଏମିତି କି ମରୁଭୂମିରେ ମଧ୍ୟ ସାଓ୍ବେର ମାଧ୍ୟମରେ ଏହି ପରିମାଣର ଜଳ ସଂଗ୍ରହ କରାଯାଉଛି। ସାଓ୍ବେରର ପ୍ରଥମ ମଡେଲ ବା ପ୍ରତିକୃତିକୁ ଗବେଷକମାନେ ଆରବ ଏମିରେଟ୍ସର ଆବୁଧାବିଠାରୁ ୭୦ କିଲୋମିଟର ଦୂର ସ୍ବିହାନ ସହରରେ ଲଗାଯାଇଛି। ବିଭିନ୍ନ ଋତୁରେ ଏହା କିଭଳି ଜଳ ସଂଗ୍ରହ କରିପାରୁଛି ତାହା ଜାଣିବା ପାଇଁ ଏହାକୁ ୬ ମାସ ଯାଏ ସେଠାରେ ଲଗାଯାଇ ପରୀକ୍ଷା କରାଯିବ। ଲାବରେଟୋରିରେ ମଧ୍ୟ ଏହାର ପରୀକ୍ଷା ଜାରି ରହିବ ବୋଲି କୁହାଯାଇଛି। ସାଓ୍ବେର୍ରେ ଦୁଇଟି କଣ୍ଟେନର ରହିଛି। ଡିସ୍ଟିଲ୍ଡ ଓ୍ବାଟର ସହ ଏକ ପ୍ରଡକ୍ସନ ୟୁନିଟ ରହିଛି ଓ ଆଉ ଗୋଟିଏ କଣ୍ଟେନର୍ରେ ହିଟ୍ ଆଣ୍ଡ୍ କୋଲ୍ଡ ପ୍ରୋସେସ୍ ଲାଗି ଆକ୍ୟୁମୁଲେଟର ଲଗାଯାଇଛି। ଏଥିରେ ସୋଲାର ଶକ୍ତିକୁ ନିୟନ୍ତ୍ରଣ କରାଯିବାର ପଦ୍ଧତି ମଧ୍ୟ ରହିଛି । ସାଓ୍ବେର ମୂଲ୍ୟ ୪ ଲକ୍ଷ ଡଲାର ପାଖାପାଖି ରହିବ ଓ ଏଥିରୁ ଯେଉଁ ପାଣି ମିଳିବ ତାହାର ମୂଲ୍ୟ ପ୍ରଥମ ବର୍ଷ ୧ ଲିଟରକୁ ୧୦ ଡଲାର ରଖାଯିବ। ଏହି ପ୍ରୋଜେକ୍ଟକୁ ଦୁବାଇ ଏକ୍ସପୋରେ ୨୦୨୦ ଅକ୍ଟୋବରରୁ ଏପ୍ରିଲ ୨୦୨୧ ମଧ୍ୟରେ ପ୍ରଦର୍ଶନ କରାଯିବାର ଯୋଜନା କରାଯାଇଛି।
