ନୂଆଦିଲ୍ଲୀ, ୧୮ା୪ (ପି.ଟି.)-କ୍ରୀଡ଼ା ମନ୍ତ୍ରଣାଳୟର ନିର୍ଦ୍ଦେଶକ୍ରମେ ସର୍ବଭାରତୀୟ ଟେନିସ ଆସୋସିଏଶନ (ଆଇଟା) କେତୋଟି ପଦବୀ ଉଚ୍ଛେଦ କରିବାକୁ ରାଜି ହୋଇଛି। ଏହି ଅବେଅତନିକ ପଦବୀଗୁଡ଼ିକ ହେଲା ଆଜୀବନ ସଭାପତି, ଆଜୀବନ ଉପସଭାପତି ଓ ଆଜୀବନ କନସେଲର। ଏହି ପଦବୀଗୁଡ଼ିକ ନ୍ୟାଶନାଲ ସ୍ପୋଟର୍ସ କୋଡ୍ର ଉଲ୍ଲଂଘନ କରୁଛି। ଏହି ନିଷ୍ପତ୍ତି ଦ୍ୱାରା ସିନିୟର କ୍ରୀଡ଼ା ପ୍ରଶାସକ ଅନିଲ ଖାନ୍ନା ଓ ପୂର୍ବତନ ବହିର୍ବ୍ୟାପାର ମନ୍ତ୍ରୀ ଯଶବନ୍ତ ସିହ୍ନା ପ୍ରମୁଖ ଫେଡେରେଶନର ଆଜୀବନ ସଭାପତି ପଦବୀ ହରାଇବେ। ମନ୍ତ୍ରଣାଳୟର ନିର୍ଦ୍ଦେଶ ଦ୍ୱାରା ପୂର୍ବତନ ଡେଭିସ୍ କପ୍ ଅଧିନାୟକ ଜୟଦୀପ ମୁଖାର୍ଜୀ ଓ ନରେଶ କୁମାରଙ୍କ ସମେତ ୮ଜଣ ବ୍ୟକ୍ତି ଉପସଭାପତି ପଦବୀ ହରାଇବେ। ଅନ୍ୟ ୬ଜଣ ଆଜୀବନ ଉପସଭାପତି ପଦବୀ ହରାଇବେ। ସେମାନେ ହେଲେ ଡି.ଭି ଭାଟିଆ, ଘନଶ୍ୟାମ ପଟେଲ, ନରେନ୍ଦ୍ର କୁମାର, ନଟଓ୍ବର ସିଂ, ବଲିଉଡ ଅଭିନେତାରୁ ରାଜନେତା ବନିଥିବା ଶତ୍ରୁଘ୍ନ ସିହ୍ନା ଓ ୟୁସୁଫ୍ ହମିଦ। ଟି.ଡି. ଫ୍ରାନ୍ସିସ୍ ଆଜୀବନ କାଉନ୍ସିଲର ପଦବୀରେ ରହିଛନ୍ତି। ମନ୍ତ୍ରଣାଳୟ ପକ୍ଷରୁ ଗତ ମାର୍ଚ୍ଚ ୧୬ରେ ଆଇଟା ନିକଟକୁ ଚିଠି ପଠାଯାଇଥିଲା। ଏଭଳି ପଦବୀ ସୃଷ୍ଟି କରିବା ନ୍ୟାଶନାଲ ସ୍ପୋଟର୍ସ ଡେଭଲପମେଣ୍ଟ କୋଡ୍ ଅଫ୍ ଇଣ୍ଡିଆ (ଏନ୍ଏସ୍ଡିସିଆଇ)-୨୦୧୧ର ନିୟମ ବାହାରେ ଏଥିରେ ଉଲ୍ଲେଖ କରିଥିଲା। ନିର୍ଦ୍ଦେଶକୁ ୬ ସପ୍ତାହ ଳମଧ୍ୟରେ କାର୍ଯ୍ୟକାରୀ କରିବାକୁ କୁହାଯାଇଛି। କ୍ରୀଡ଼ା ମନ୍ତ୍ରଣାଳୟର ନିର୍ଦ୍ଦେଶକୁ ସେମାନେ କାର୍ଯ୍ୟକାରୀ କରିବା ଲାଗି ନୀତିଗତ ନିଷ୍ପତ୍ତି ନେଇଥିବା ଆଇଟା ସିଇଓ ଆଖୋରି ବିଶ୍ୱଦୀପ ପ୍ରକାଶ କରିଛନ୍ତି।
