ଖଣ୍ଡପଡ଼ା,୪ା୬(ସ୍ବ.ପ୍ର.)-ଜ୍ୟେଷ୍ଠ ଅମାବାସ୍ୟା ତିଥିରେ ସାବିତ୍ରୀ ବ୍ରତ ପାଳନ କରାଯାଏ । ପରମ ପତିବ୍ରତା, ସାଧ୍ୱୀ ସାବିତ୍ରୀ ତପସ୍ୟା ଓ ପତିଭକ୍ତି ଦ୍ୱାରା ମୃତ୍ୟୁଦେବ ଯମରାଜଙ୍କ କବଳରୁ ସ୍ବାମୀ ସତ୍ୟବାନଙ୍କ ଜୀବନ ରକ୍ଷା କରିବା ସହ ଅନେକ ବର ପ୍ରାପ୍ତ କରିଥିଲେ। ଏହାକୁ ହିନ୍ଦୁ ମହିଳାମାନେ ନିଷ୍ଠାର ସହ ସ୍ବାମୀଙ୍କ ଶୁଭକାମନା କରି ପାଳନ କରନ୍ତି। ସୋମବାର ଖଣ୍ଡପଡ଼ା ଓ ଏହାର ଆଖପାଖ ମର୍ଦ୍ଦରାଜପୁର, ବେଣାଗାଡିଆ, ଖଳିସାହି, କୋସକା, ଢୋଲମରା, ସିଧାମୂଳା ଆଦି ଅଞ୍ଚଳର ବିବାହିତା ନାରୀମାନେ ଲକ୍ଷ୍ମୀନାରାୟଣଙ୍କୁ ପୂଜାର୍ଚ୍ଚନା କରିବା ପାଇଁ ଗ୍ରାମ ନିକଟସ୍ଥ ବିଭିନ୍ନ ମନ୍ଦିରକୁ ଯାଇଥିଲେ । ବ୍ରତଧାରିଣୀମାନେ ଶୁଦ୍ଧପୁତ ହୋଇ ନୂଆ ଶାଢି, ଶଙ୍ଖା ଓ ପୂଜା ସାମଗ୍ରୀମାନ ଧରି ଶୈବ ପୀଠମାନଙ୍କରେ ଭିଡ଼ ଲଗାଇଥିଲେ । କଣ୍ଟିଲୋ ଅଞ୍ଚଳର ବ୍ରତ ଧାରିଣୀମାନେ ମଧ୍ୟ ନୂଆ ଶାଢି, ଶଙ୍ଖା, ଚୁଡି, ସିନ୍ଦୂର ପରିଧାନ କରି ଫଳ ଆଦି ପୂଜା ସାମଗ୍ରୀ ଧରି ନୀଳମାଧବ ମନ୍ଦିର ପରିସରସ୍ଥ ଲକ୍ଷ୍ମୀନାରାୟଣ ପାଖରେ ପୂଜାର୍ଚ୍ଚନା କରିଥିଲେ । ସ୍ବାମୀଙ୍କ ଦୀର୍ଘ, ନିରାମୟ ଜୀବନ କାମନା କରି ବ୍ରତ ପାଳନ କରୁଥିବା ମହିଳାମାନେ କହିଥିଲେ।
