କାକଟପୁର,୨୭।୬(ଡି.ଏନ୍.ଏ.): ପ୍ରାଥମିକ ବିଦ୍ୟାଳୟରେ ୧୦ରୁ କମ୍ ଛାତ୍ରୀଛାତ୍ର ପାଠ ପଢ଼ୁଥିଲେ, ଉକ୍ତ ବିଦ୍ୟାଳୟକୁ ବନ୍ଦ କରିଦିଆଯିବାକୁ ସରକାର ନିଷ୍ପତ୍ତି ନେଇଛନ୍ତି। ବନ୍ଦ କରିଦିଆଯାଇଥିବା ବିଦ୍ୟାଳୟର ଛାତ୍ରୀଛାତ୍ର, ଶିକ୍ଷୟତ୍ରୀଶିକ୍ଷକମାନଙ୍କୁ ନିକଟସ୍ଥ ବିଦ୍ୟାଳୟକୁ ପଠାଯିବାକୁ ବ୍ୟବସ୍ଥା ହୋଇଛି। ଏପରିକି ଛାତ୍ରୀଛାତ୍ରମାନଙ୍କୁ ସେମାନଙ୍କ ଉପସ୍ଥାନ ହାର ଅନୁସାରେ ଗସ୍ତ ଖର୍ଚ୍ଚ ଦିଆଯିବାକୁ ସ୍ଥିର କରାଯାଇଛି। ଏହି ପରିପେକ୍ଷୀରେ କାକଟପୁର ବ୍ଲକର ୪ଟି ଓ ଅସ୍ତରଙ୍ଗ ବ୍ଲକର ୩ଟି ବିଦ୍ୟାଳୟକୁ ବନ୍ଦ କରି ଦିଆଯିବାକୁ ନିଷ୍ପତ୍ତି ନିଆଯାଇଥିବା କାକଟପୁର ବ୍ଲକ ଶିକ୍ଷାଧିକାରୀ ଶାନ୍ତନୁ କୁମାର ପରିଡ଼ା ଗୁରୁବାର କହିଛନ୍ତି।
ଶିକ୍ଷାଧିକାରୀଙ୍କ ସୂଚନାନୁଯାୟୀ, କାକଟପୁର ବ୍ଲକର ଦାସିଆଠେଙ୍ଗ ପ୍ରୋଜେକ୍ଟ ପ୍ରାଥମିକ ବିଦ୍ୟାଳୟକୁ ବନ୍ଦ କରାଯାଇ ଶୁକପୋଖରୀ ପ୍ରାଥମିକ ବିଦ୍ୟାଳୟରେ, କୁଷ୍ଠି ପ୍ରାଥମିକ ବିଦ୍ୟାଳୟକୁ ମହାଦେବବସ୍ତ ନୋଡାଲ ବିଦ୍ୟାଳୟରେ, ତରତ ପ୍ରାଥମିକ ବିଦ୍ୟାଳୟକୁ ବାଁବରଡ଼ା ପ୍ରାଥମିକ ବିଦ୍ୟାଳୟରେ, ଆରୁହାଁ ପ୍ରାଥମିକ ବିଦ୍ୟାଳୟକୁ କୋତାଙ୍ଗ ପ୍ରାଥମିକ ବିଦ୍ୟାଳୟରେ ମିଶ୍ରଣ କରିଦିଆଯାଇଛି। ସେହିପରି ଅସ୍ତରଙ୍ଗ ବ୍ଲକ ଅନ୍ତର୍ଗତ ସୋଲ ପାଟିଆ ପ୍ରାଥମିକ ବିଦ୍ୟାଳୟକୁ କନ୍ତପଏରା ପ୍ରାଥମିକ ବିଦ୍ୟାଳୟରେ, ଝାରିଆ ପ୍ରାଥମିକ ବିଦ୍ୟାଳୟକୁ ଅସ୍ତରଙ୍ଗ ନୋଡାଲ ବିଦ୍ୟାଳୟରେ, ଅସନ ଭିଆର୍ପି କଲୋନୀ ପ୍ରାଥମିକ ବିଦ୍ୟାଳୟକୁ ଅସନ ଉଚ୍ଚ ପ୍ରାଥମିକ ବିଦ୍ୟାଳୟରେ ମିଶ୍ରଣ କରିଦିଆଯାଇଥିବା ସେ ସୂଚନା ଦେଇଛନ୍ତି।
