ନୟାଗଡ଼ ଅଫିସ,୨୭।୭: ଗତ ଜୁନ୍ ମାସ ୨୫ ତାରିଖରେ ଜିଲାପାଳଙ୍କ କାର୍ଯ୍ୟାଳୟ ପରିସରରେ ଜଣେ ଯୁବକ ମହିଳାଙ୍କୁ ପକ୍କା ଘର କରାଇଦେବାକୁ କହି ସୁନା ଚେନ୍ ଓ ଟଙ୍କା ଠକି ନେଇ ଫେରାର୍ ହୋଇଯିବା ଘଟଣାକୁ ମାସେ ପୂରିଲାଣି। ହେଲେ ନୟାଗଡ଼ ଟାଉନ ପୋଲିସ ଏ ପର୍ଯ୍ୟନ୍ତ ଯୁବକ ଜଣଙ୍କର ପତ୍ତା ପାଇନାହିଁ। ଅନ୍ୟପକ୍ଷେ ଯେପରି ପୁନର୍ବାର ଜିଲାପାଳଙ୍କ କାର୍ଯ୍ୟାଳୟ ପରିସରରେ ଏଭଳି ଘଟଣା ନ ଘଟିବ ସେଥିପାଇଁ ଜିଲା ପ୍ରଶାସନ ପକ୍ଷରୁ କାର୍ଯ୍ୟାଳୟ ପରିସରରେ ଲୋକମାନେ ସଚେତନ ହେବା ପାଇଁ ବୋର୍ଡ ମରାଯାଇଛି। ବୋର୍ଡରେ ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନା ଯେପରିକି ପକ୍କାଘର, ଭତ୍ତା, ଜମିପଟ୍ଟା ଆଦି ବିଭିନ୍ନ ଯୋଜନା ବିଷୟରେ ଜାଣିବାକୁ ହେଲେ ସିଧାସଳଖ ସମ୍ପୃକ୍ତ ଅଧିକାରୀଙ୍କୁ ଯୋଗାଯୋଗ କରିବା ପାଇଁ କୁହାଯାଇଛି। କୌଣସି ଦଲାଲ୍ଙ୍କ କଥାରେ ଭରସା ନ କରିବା ସହିତ ସେମାନଙ୍କୁ ଟଙ୍କା ନ ଦେବା ପାଇଁ ଦର୍ଶାଯାଇଛି। ଯଦି କେହି ସରକାରୀ ଯୋଜନା ପାଇଁ ଟଙ୍କା ମାଗନ୍ତି, ତାହା ହେଲେ ତୁରନ୍ତ ଜିଲାପାଳଙ୍କୁ ଅବଗତ କରାଇବା ପାଇଁ ବୋର୍ଡରେ ଦର୍ଶାଯାଇଛି। ଏହି ଘଟଣାକୁ ବୁଦ୍ଧିଜୀବୀ ମହଲରେ ପ୍ରଶଂସା କରାଯାଇଛି।
ଯେ, ଗତ ମାସ ୨୫ ତାରିଖରେ ରଣପୁର ବ୍ଲକ ବାରଙ୍ଗଗାଡ଼ିଆ ଗ୍ରାମରେ ମମତା ଛୁଆଳସିଂଙ୍କ ଘରେ ଜଣେ ଯୁବକ ପହଞ୍ଚତ୍ ନିଜ ଗ୍ରାମ ଏକତାଳରେ ବୋଲି କହିବା ସହ ମମତାଙ୍କ ବିଜୁ ପକ୍କା ଘର ଯୋଜନାରେ କୋଠାଘର ଆସିଥିବା କହିଥିଲେ। ଘର କରିବା ପାଇଁ ତୁମକୁ ୨ ଲକ୍ଷ ୩୦ ହଜାର ଟଙ୍କା ମିଳିବ। ଆଉ ସେଥିପାଇଁ ଜିଲପାଳଙ୍କ କାର୍ଯ୍ୟାଳୟରେ କିଛି ଟଙ୍କା ଲାଞ୍ଚ ଦେବାକୁ ପଡ଼ିବ ବୋଲି କହିଥିଲେ। ଏହା ପରେ ମମତା କେତେ ଟଙ୍କା ପଚାରିବାରୁ ଯୁବକ ଜଣଙ୍କ ୨୦ରୁ ୩୦ ହଜାର ଟଙ୍କା ଦେବାକୁ ପଡ଼ିବ ବୋଲି କହିଥିଲେ। ତାଙ୍କ ପାଖରେ ଏତେ ଟଙ୍କାନାହିଁ ବୋଲି ମମତା କହିବାରୁ ତୁମ ପାଖରେ ଯେତେ ଟଙ୍କା ଅଛି ଆଣ ଆଉ କିଛି ସୁନା ଜିନିଷ ଦିଅ ତାକୁ ବିକ୍ରି କରି ଟଙ୍କା ଦେବା ବୋଲି ଯୁବକ କହିଥିଲେ। ପରେ ମମତା ଓ ତାଙ୍କ ଝିଅ ଚୁଲବୁଲି ଯୁବକଙ୍କ ବାଇକ୍ରେ ବସି ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ଜିଲାପାଳଙ୍କ କାର୍ଯ୍ୟାଳୟ ପରିସରରେ ପଡ଼ିଥିବା ବେଞ୍ଚରେ ବସି ଯୁବକ ଜଣଙ୍କ ଚୁଲବୁଲିଙ୍କୁ ରାଶନ କାର୍ଡ ଓ ଭୋଟର କାର୍ଡର ଜେରକ୍ସ କରି ଆଣିବା ପାଇଁ କହିଥିଲେ। ଝିଅ ଜେରକ୍ସ କରିବା ପାଇଁ ବଜାରକୁ ଆସିଥିଲେ। ଏହି ସମୟରେ ଯୁବକ ଜଣଙ୍କ ମମତାଙ୍କୁ ଟଙ୍କା ଓ ସୁନାଚେନ୍ ଦେବାକୁ କହିଥିଲେ। ମମତା ତାଙ୍କ ପାଖରେ ଥିବା ୩୨୦୦ ଟଙ୍କା ଓ ପାଖାପାଖି ୧.୫ ଭରି ଓଜନର ସୁନାଚେନ୍କୁ ଯୁବକଙ୍କ ହାତକୁ ବଢାଇ ଦେବାରୁ ତାକୁ ନେଇ ଯୁବକ ଫେରାର୍ ହୋଇ ଯାଇଥିଲେ। ଯୁବକଙ୍କୁ ଅପେକ୍ଷା କରି ନ ପାଇବାରୁ ସେ ଠକାମିର ଶିକାର ହୋଇଥିବା ଜାଣିପାରିଥିଲେ। ଏ ନେଇ ମମତା ଟାଉନ ଥାନାରେ ଅଭିଯୋଗ କରିଥିଲେ। ପୋଲିସ ଥାନାରେ ଏକ ମାମଲା ରୁଜୁ କରି ୨୬ ତାରିଖରେ ଜିଲାପାଳଙ୍କ କାର୍ଯ୍ୟାଳୟକୁ ଯାଇ ଯୁବକଙ୍କର ସିସିଟିଭ ଫୁଟେଜ ଆଣିଥିଲା। ହେଲେ ବର୍ତ୍ତମାନ ସୁଦ୍ଧା ପୋଲିସ ଯୁବକଙ୍କୁ ଧରିବାରେ ସଫଳ ହୋଇପାରିନାହିଁ।
