ନୂଆଦିଲ୍ଲୀ,୧୫।୧୨: ଭାରତର ୫ ରାଜ୍ୟରେ ନୂଆ ସରକାର ଗଠନ ହେବା ପରେ ୬ ଲକ୍ଷ ୭୦ ହଜାର କୋଟି ଟଙ୍କାର ପ୍ରକଳ୍ପ ଅଟକି ରହିଛି। ସେଥିମଧ୍ୟରୁ ଆନ୍ଧ୍ରପ୍ରଦେଶରେ ଲକ୍ଷେ ୯ ହଜାର କୋଟି, ମହାରାଷ୍ଟ୍ରରେ ୫ ଲକ୍ଷ ୪୬ ହଜାର ୧୨୮ କୋଟି, ଛତିଶଗଡ଼ରେ ୧୩ ହଜାର କୋଟି, ମଧ୍ୟପ୍ରଦେଶରେ ୪୩୦ କୋଟି ଏବଂ ଉତ୍ତରପ୍ରଦେଶରେ ୧୫ ଶହ ୧୩ କୋଟି ଟଙ୍କାର ପ୍ରକଳ୍ପ ଅଟକି ରହିଥିବା କୁହାଯାଉଛି। ଆନ୍ଧ୍ର ପ୍ରଦେଶରେ ମେ ୩୦ରେ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀଙ୍କ ସରକାର ଆସିବା ପରେ ପ୍ରାୟ ସମସ୍ତ ନିର୍ମାଣ କାର୍ଯ୍ୟ ଅଧାରେ ଅଟକି ରହିଛି। ପ୍ରସ୍ତାବିତ ନୂଆ ରାଜଧାନୀ ଅମରାବତୀର କାମ ଆଉ ଆଗେଇ ପାରୁନି। ଅମରାବତୀ ରାଜଧାନୀ ହେବ କି ନାହିଁ ସେ ନେଇ କିଛି ନିଷ୍ପତ୍ତି ନିଆଯାଇ ପାରୁନି ବୋଲି ଅଭିଯୋଗ ହେଉଛି। କାମ ଅଧାରେ ରହିଯିବାରୁ ବିଲ୍ଡରମାନେ ଚିନ୍ତାରେ ପଡ଼ିଛନ୍ତି। ନିବେଶ ହୋଇଥିବା ଟଙ୍କା ଫେରି ପାଇବା ନେଇ ଆଶଙ୍କା ଦେଖାଦେଇଛି। ସେହିପରି ମହାରାଷ୍ଟ୍ରରେ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କ ସରକାର ଗଠନ ପରେ ମୋଟ୍ରୋ-୩ କାର ରୋଡ୍ ପ୍ରକଳ୍ପ ଅଟକି ଯାଇଛି। ଏସବୁର ସମୀକ୍ଷା କରାଯାଉଛି। ଛତିଶଗଡ଼ରେ ମୁଖ୍ୟମନ୍ତ୍ରୀ ଭୁପେଶ ବାଘେଲା ସରକାର ପୁରୁଣା ସରକାରଙ୍କ ବହୁ ଯୋଜନାକୁ ଅଟକାଇ ଦେଇଛନ୍ତି। ୯ ହଜାର କୋଟି ଟଙ୍କାର ରେଳ ପରିଯୋଜନା ସମେତ ଅନ୍ୟ ପ୍ରକଳ୍ପ ଗୁଡ଼ିକର ସମୀକ୍ଷା ଜାରି ରହିଛି। ସେହିପରି ମଧ୍ୟପ୍ରଦେଶରେ ମୁଖ୍ୟମନ୍ତ୍ରୀ କମଳ ନାଥ ଶାସନ ଡୋରି ଧରିବା ପରେ ସମସ୍ତ ନିର୍ମାଣ କାର୍ଯ୍ୟ ବନ୍ଦ ରହିଛି। ଉତ୍ତରପ୍ରଦେଶରେ ଯୋଗୀ ଆଦିତ୍ୟନାଥ ମୁଖ୍ୟମନ୍ତ୍ରୀ ହେବା ପରେ ଅଖିଳେଶ ଯାଦବ ସରକାରଙ୍କ ବହୁ ପ୍ରକଳ୍ପକୁ ଅଧାରେ ବନ୍ଦ କରିଛନ୍ତି। ଏହାର ସିଧାସଳଖ ପ୍ରଭାବ ଠିକାଦାରଙ୍କ ଉପରେ ପଡୁଥିବାରୁ ଅସନ୍ତୋଷ ବୃଦ୍ଧି ପାଉଥିବା କୁହାଯାଉଛି।
