ଭୁବନେଶ୍ୱର,୧୮-୪: ପୂର୍ବତଟ ରେଳପଥ ପରିସୀମା ମଧ୍ୟ ଦେଇ ପୁଣି ଏକ ନୂଆ ଗ୍ରୀଷ୍ମକାଳୀନ ସ୍ବତନ୍ତ୍ର ଟ୍ରେନର ଶୁଭାରମ୍ଭ କରାଯାଇଛି। ଜୁନ ମାସ ମାସ ଶେଷ ପର୍ଯ୍ୟନ୍ତ ସାନ୍ତ୍ରାଗାଛି-ଚେନ୍ନାଇ ସେଣ୍ଟ୍ରାଲ ଟ୍ରେନ ଚଳାଚଳ କରାଇବାକୁ ରେଲଓ୍ବେ ପକ୍ଷରୁ ଘୋଷଣା କରାଯାଇଛି। ଯାତ୍ରୀ ଭିଡକୁ ଏଡାଇବା ଦିଗରେ ଏହି ସ୍ବତନ୍ତ୍ର ଟ୍ରେନ ସହାୟକ ହେବ ବୋଲି ରେଲଓ୍ବେ ପକ୍ଷରୁ ସୂଚନା ରହିଛି। ଯାତ୍ରୀ ଭିଡକୁ ନଜରରେ ରଖି ଏହାର ପରିସୀମା ମଧ୍ୟରୁ ଏବଂ ଏହା ମଧ୍ୟ ଦେଇ ଦେଶର ବିଭିନ୍ନ ସ୍ଥାନକୁ ସ୍ବତନ୍ତ୍ର ଟ୍ରେନ ଚଳାଚଳ କରାଯାଉଛି। ଅଧିକ ବର୍ଥ ସଂଯୋଗ କରାଯିବା ସହ ଭିଡ କମାଇବାକୁ ପଦକ୍ଷେପ ନିଆଯାଇଛି। ପୂର୍ବରୁ ପୂର୍ବତଟ ରେଳପଥ ୧୫ ଯୋଡା ସ୍ବତନ୍ତ୍ର ଟ୍ରେନ ଚଳାଇବା ଲାଗି ଘୋଷଣା କରିଥିବା ବେଳେ ନୂଆ କରି ଆଉ ଏକ ଯୋଡା ଟ୍ରେନ ଚଳାଇଛି। ଏହି ସ୍ବତନ୍ତ୍ର ଟ୍ରେନରେ ଚାରଟି ଏସି ଟାୟାର, ପାଞ୍ଚଟି ୩ଏସି ଟାୟାର, ୪ଟି ସ୍ଲିପର କ୍ଲାସ, ୨ଟି ଗାର୍ଡ ଏବଂ ଲଗେଜ ଭ୍ୟାନ ରହିଛି। ଏହା ଖଡକପୁର, ଭଦ୍ରକ, ଯାଜପୁର, କେନ୍ଦୁଝର ରୋଡ, ବ୍ରହ୍ମପୁର, ବିଜୟ ନଗରମ, ଦୁଭାଦା, ରାଜମହେନ୍ଦ୍ରୀ, ବିଜୟଓ୍ବାଡା, ନେଲୋର ଏବଂ ଗୁଡୁର ଷ୍ଟେଶନଠାରେ ରହିବ।
ହିରାଖଣ୍ଡ, ରାଉରକେଲା-ଜଗଦଲପୁର ଏକ୍ସପ୍ରେସ ଜୟପୁର ଯାଏ ଚାଲିବ
ପୂର୍ବତଟ ରେଳପଥ ଓ୍ବାଲଟିୟର ରେଳମଣ୍ଡଳ ଅନ୍ତର୍ଗତ ଜୟପୁର-ଜଗଦଲଗୁର ରେଳ ସେକ୍ସନର ୩ଟି ସେକ୍ସନରେ ନିରାପତ୍ତା ସଂକ୍ରାନ୍ତ ଆଧୁନିକିକରଣ କାର୍ଯ୍ୟ ଯୋଗୁ ଟ୍ରେନ ଚଳାଚଳ ବାଧାପ୍ରାପ୍ତ ହେବ ବୋଲି ସୂଚନା ରହିଛି। ଭୁବନେଶ୍ୱରରୁ ଜଗଦଲପୁର ଯାଉଥିବା ହୀରାଖଣ୍ଡ ଏକ୍ସପ୍ରେସ ଓ ରାଉରକେଲାରୁ ଜଗଦଲପୁର ଯାଉଥିବା ଏକ୍ସପ୍ରେସ ଚଳିତ ମାସ ୨୨ ତାରିଖ ପର୍ଯ୍ୟନ୍ତ ଜୟପୁର ପର୍ଯ୍ୟନ୍ତ ଚଳାଚଳ କରିବ। ଏହି ଟ୍ରେନ ଦୁଇଟିକୁ ଜୟପୁର ଏବଂ ଦଗଦଲପୁର ମଧ୍ୟରେ ଆଂଶିକ ବାତିଲ କରାଯିବାକୁ ନିଷ୍ପତ୍ତି ହୋଇଛି।
