ନୂଆଦିଲ୍ଲୀ,୧୫।୮(ପି.ଟି.)- ଟିମ୍ ଇଣ୍ଡିଆ ଆଡମିନିଷ୍ଟ୍ରେଟିଭ ମ୍ୟାନେଜର ସୁନୀଲ ସୁବ୍ରମଣ୍ୟମ କ୍ଷମା ମାଗିବା ପରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତା’ର ନିଷ୍ପତ୍ତି ବଦଳାଇଛି। ଫଳରେ ସୁବ୍ରମଣ୍ୟମ ଚଳିତ ଓ୍ବେଷ୍ଟଇଣ୍ଡିଜ ଗସ୍ତରେ ପୂର୍ବପରି ଦାୟିତ୍ୱ ବଜାୟ ରଖିବା ସ୍ପଷ୍ଟ ହୋଇଛି। କାରିବିୟାନସ୍ଥିତ ଭାରତୀୟ ଦୂତାବାସର ବରିଷ୍ଠ ଅଧିକାରୀଙ୍କୁ ଦୁର୍ବ୍ୟବହାର କରିଥିବାରୁ, ଏଥିରେ କ୍ଷୁବ୍ଧ ହୋଇ ବିସିସିଆଇ ତାଙ୍କୁ ପ୍ରଥମେ ସ୍ବଦେଶ ଫେରିଆସିବାକୁ ନିର୍ଦ୍ଦେଶ ଦେଇଥିଲା। ତେବେ ନିଜ ଆଚରଣ ପାଇଁ ସୁବ୍ରମଣ୍ୟମ ନିଃସର୍ତ୍ତ କ୍ଷମା ମାଗିବା ପରେ ବୋର୍ଡ ନିଷ୍ପତ୍ତି ବଦଳାଇଛି। ଭାରତୀୟ କ୍ରିକେଟରେ ପ୍ରଥମଥର ପାଇଁ ଏଭଳି ବିଡମ୍ବନା ଦେଖିବାକୁ ମିଳିଥିଲା। ଗସ୍ତ ଅଧାରୁ ଟିମ୍ର ଜଣେ ବରିଷ୍ଠ ଅଧିକାରୀଙ୍କୁ ସ୍ବଦେଶ ଫେରିଆସିବାକୁ କୁହାଯାଇଥିଲା। କ୍ଷମାପ୍ରାର୍ଥନା କରିବା ପରେ କ୍ରିକେଟ ପ୍ରଶାସକ କମିଟି (ସିଓଏ) ମୁଖ୍ୟ ବିନୋଦ ରାୟ ତାଙ୍କୁ ତାଗିଦ୍ ଓ ସତର୍କ କରାଇବା ସହ ପୂର୍ବପରି ଦାୟିତ୍ୱ ବହନ କରିବାକୁ ସୁଯୋଗ ଦେଇଛନ୍ତି। ଏବେ ସେ ଓ୍ବେଷ୍ଟଇଣ୍ଡିଜ ଗସ୍ତ ପୂରା କରିବେ ବୋଲି ବିନୋଦ ସ୍ପଷ୍ଟ କରିଛନ୍ତି।
ଗୁୟାନା ଓ ତ୍ରିନିଦାଦ ଏବଂ ଟବାଗୋସ୍ଥିତ ଭାରତୀୟ ଦୂତାବାସର ବରିଷ୍ଠ ଅଧିକାରୀଙ୍କ ସହ ଦୁର୍ବ୍ୟବହାର କରିଥିବାରୁ ସେ କ୍ଷମା ମାଗିଛନ୍ତି ବୋଲି କହିଥିଲେ। ଷ୍ଟ୍ରେସ୍ ତଥା ଚାପ କାରଣରୁ ସେ ଏଭଳି ଭୁଲ କରିଛନ୍ତି ବୋଲି କହିଥିଲେ। ୫୨ ବର୍ଷୀୟ ସୁବ୍ରମଣ୍ୟମ ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କର ପୂର୍ବତନ କୋଚ୍ ହିସାବରେ ବେଶ୍ ଜଣାଶୁଣା। ସେ ୭୪ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳି ୨୫୮ଟି ଉଇକେଟ ଅକ୍ତିଆର କରିଛନ୍ତି।
ଆଇସିସି ଦିନିକିଆ ବିଶ୍ୱକପ୍ ପରେ ସୁବ୍ରମଣ୍ୟମ ଏବଂ ରବି ଶାସ୍ତ୍ରୀଙ୍କ ନେତୃତ୍ୱାଧୀନ ସହଯୋଗୀ ଷ୍ଟାଫ୍ଙ୍କ କାର୍ଯ୍ୟକାଳ ୪୫ଦିନ ପାଇଁ ବୃଦ୍ଧି କରାଯାଇଥିଲା। ଏହି ପଦବୀଗୁଡ଼ିକ ଲାଗି ସାନି ସାକ୍ଷାତ୍କାର ପ୍ରକ୍ରିୟା ଚାଲିଛି। ଭାରତୀୟ କ୍ରିକେଟ ଖେଳାଳିଙ୍କୁ ନେଇ ‘ଜଳ ସଂରକ୍ଷଣ’ ବିଷୟକ ଏକ କ୍ଷୁଦ୍ର ବିଜ୍ଞାପନର ଶୁଟିଂ ପାଇଁ ସରକାରୀ ନିର୍ଦ୍ଦେଶ ଥିଲା। ବିସିସିଆଇ ପକ୍ଷରୁ ଓ୍ବେଷ୍ଟଇଣ୍ଡିଜରେ ଅବସ୍ଥାପିତ ହାଇକମିଶନର ଦୁଇ ଉଚ୍ଚ ପଦାଧିକାରୀଙ୍କୁ ସୂଚାଇ ଦିଆଯାଇଥିଲା ଯେ, ଟିମ୍ ଇଣ୍ଡିଆର ପ୍ରଶାସନିକ ଅଧିକାରୀ ସୁବ୍ରମଣ୍ୟମଙ୍କ ସହ ଯୋଗାଯୋଗ କଲେ ଶୁଟିଂ ପାଇଁ ଖେଳାଳିଙ୍କ ସହାୟତା ମିଳିଯିବ। ମାତ୍ର ଗୁୟାନା ଏବଂ ତ୍ରିନିଦାଦ୍ ଏବଂ ଟବାଗୋସ୍ଥିତ ଭାରତୀୟ ହାଇକମିଶନ କାର୍ଯ୍ୟାଳୟର ଦୁଇ ଉଚ୍ଚ ପଦାଧିକାରୀ ଯେତେବେଳେ ସୁବ୍ରମଣ୍ୟମଙ୍କ ସହିତ ଯୋଗାଯୋଗ କଲେ, ସେତେବେଳେ ମୋତେ ବାରମ୍ବାର କାହିଁକି କଲ୍ କରୁଛ ବୋଲି ସେ କହି ଦୁର୍ବ୍ୟବହାର କରିଥିଲେ।
