ନିର୍ମାଣ ଶ୍ରମିକ ସଂଘ ସମନ୍ବୟ କମିଟି ବୈଠକ
8:32 amSeptember 22, 2019 / 21

ଅନୁଗୋଳ ଅଫିସ, ୨୨।୯ – ଅନୁଗୋଳ ଜିଲା ନିର୍ମାଣ ଶ୍ରମିକ ସଂଘ ସମନ୍ବୟ କମିଟି ପକ୍ଷରୁ ଏକ ଜରୁରୀ ବୈଠକ ଅନୁଷ୍ଠିତ ହୋଇଯାଇଛି। ସ୍ଥାନୀୟ ଶିଶୁ ଉଦ୍ୟାନ ଠାରେ ଶନିବାର ଅପରାହ୍ନରେ ଅନୁଷ୍ଠିତ ଉକ୍ତ ବୈଠକରେ ବିଭିନ୍ନ ପ୍ରସଙ୍ଗରେ ଆଲୋଚନା ହୋଇଥିଲା। ଓଡ଼ିଶା କୋଠାବାଡ଼ି ନିର୍ମାଣ ଶ୍ରମିକଙ୍କ ପଞ୍ଜୀକରଣ ପୂର୍ବରୁ ଦୁଇ ଥର ଖାରଜ ହୋଇଥିବାରୁ ସଂଘ କାର୍ଯ୍ୟକର୍ତ୍ତାଙ୍କୁ ଏ ନେଇ ଆବେଦନ କରିଥିବା ଶ୍ରମିକମାନଙ୍କ ଆକ୍ରୋଶର ଶିକାର ହେବାକୁ ପଡ଼ୁଛି ବୋଲି ସଂଘ ସଭାପତି ବିଭୂତି ଭୂଷଣ ସାହୁ କହିଥିଲେ। ସେ କହିଥିଲେ ଯେ, ୨୦୧୮ ମେ ୧୩ରେ ଡିଆର୍‌ଡିଏ ହଲ୍‌ରେ ଅନୁଷ୍ଠିତ ସଭାରେ ତତ୍‌କାଳୀନ ଶ୍ରମ ଅଧିକାରୀଙ୍କୁ ପଞ୍ଜୀକରଣ ସଂଖ୍ୟା ବୃଦ୍ଧି କରିବାକୁ କୁହାଯାଇଥିଲା। କିନ୍ତୁ ପଞ୍ଜୀକରଣ ବନ୍ଦ କରାଯାଇଛି। ସେହିପରି ୨୦୧୬ରୁ ଆବେଦନ କରାଯାଇଥିବା ନିର୍ମାଣ ଶ୍ରମିକଙ୍କୁ ସାଇକେଲ, ଶ୍ରମ ଯନ୍ତ୍ରପାତି ଓ ସୁରକ୍ଷା ପୂର୍ବକ ସାମଗ୍ରୀ ବଣ୍ଟନ ବନ୍ଦ ରଖାଯାଇଛି। ୨୦୧୮-୧୯ରେ ମୃତ୍ୟୁକାଳୀନ ସହାୟତା, ବାହାଘର ଓ ଶିକ୍ଷା ସହାୟତା ମଧ୍ୟ ଅଦ୍ୟାବଧି ଦିଆଯାଇ ନ ଥିବା ସଂଘ ପକ୍ଷରୁ ଅଭିଯୋଗ ହୋଇଛି। ଏ ନେଇ ନିର୍ମାଣ ଶ୍ରମିକମାନଙ୍କ ମଧ୍ୟରେ ଅସନ୍ତୋଷ କୁହୁଳିବାରେ ଲାଗିଛି। ତୁରନ୍ତ ଦାବି ଗୁଡ଼ିକ ପୂରଣ କରା ନ ଗଲେ ଶ୍ରମିକ ଓ ଶ୍ରମିକ ସଂଘ ଆନ୍ଦୋଳନକୁ ଓହ୍ଲାଇବ ବୋଲି ବୈଠକରେ ଚେତାବନୀ ଦିଆଯାଇଥିଲା। ଅନ୍ୟମାନଙ୍କ ମଧ୍ୟରେ ସମ୍ପାଦକ ରଶ୍ମୀରଞ୍ଜନ ଶ୍ରୀକୁମାର, ସଂଯୋଜକ ପ୍ରିୟବ୍ରତ ବେହେରା ପ୍ରମୁଖଙ୍କ ସହ ବହୁ ଶ୍ରମିକ ଉପସ୍ଥିତ ଥିଲେ।