ନୂଆଦିଲ୍ଲୀ,୨୭। ୩: ଗତ ୩ ଦିନ ଧରି ଦେଶର ପୁଞ୍ଜି ବଜାର କାରବାର ଉନ୍ନତ ରହିବା ଯୋଗୁ ଏହି ସମୟରେ ନିବେଶକଙ୍କୁ ୧୧.୧୨ ଲକ୍ଷ କୋଟି ଟଙ୍କାର ଲାଭ ହୋଇଛି। ଗୁରୁବାର ବମ୍ବେ ଷ୍ଟକ ଏକ୍ସଚେଞ୍ଜର କାରବାର ୧୪୧୦.୯୯ ପଏଣ୍ଟ ବା ୪.୯୪% ଉଚ୍ଚରେ ରହି ୨୯,୯୪୬.୭୭ ପଏଣ୍ଟରେ ବନ୍ଦ ହୋଇଥିଲା। ଗତ ୩ ଦିନରେ ସୂଚକାଙ୍କ ୩୯୬୫.୫୩ ପଏଣ୍ଟ ବଢିଛି। ଉକ୍ତ ସମୟ ମଧ୍ୟରେ ବିଏସ୍ଇ ସୂଚୀଭୁକ୍ତ କମ୍ପାନୀଗୁଡିକର ବଜାର ପୁଞ୍ଜୀକରଣ ୧୧.୧୨ ଲକ୍ଷ କୋଟି ଟଙ୍କା ଛୁଇଁଥିବା ଷ୍ଟକ ବଜାର ଡିପୋଜିଟୋରୀ ଡାଟାରୁ ସାମ୍ନାକୁ ଆସିଛି। ସରକାର ଘୋଷଣା କରିଥିବା ୧.୭୦ ଲକ୍ଷ କୋଟି ଟଙ୍କାର ଆର୍ଥତ୍କ ପ୍ୟାକେଜ ବଜାର ଉପରେ ସକାରାତ୍ମକ ପ୍ରଭାବ ପକାଇଥିବା ବିଶେଷଜ୍ଞମାନେ କହିଛନ୍ତି। ଏହି ସମୟରେ ଇଣ୍ଡସଇଣ୍ଡ ବ୍ୟାଙ୍କର ଶେୟାର କାରବାରରେ ପ୍ରାୟ ୪୫.୦୭% ବୃଦ୍ଧି ଘଟିଛି। ଏହବାଦ ଭାରତୀ ଏୟାରଟେଲ, ଲାର୍ସନ ଆଣ୍ଡ ଟୁବ୍ରୋ, ବଜାଜ ଫାଇନାନ୍ସ, କୋଟାକ ମହିନ୍ଦ୍ରା ବ୍ୟାଙ୍କ ଏବଂ ବଜାଜ ଅଟୋର ଶେୟାର ଉନ୍ନତ ସ୍ଥିତିରେ ରହିଛି। ବମ୍ବେ ଷ୍ଟକ ଏକ୍ସଚେଞ୍ଜର ୧୫୦୮ କମ୍ପାନୀର କାରବାର ଅତି ଭଲ ରହିଛି। ୭୬୯ କମ୍ପାନୀର କାରବାର ନିମ୍ନରେ ରହିଥିବା ବେଳେ ୧୭୨ଟିର କାରବାର ଅପରିବର୍ତ୍ତିତ ରହିଛି। ବିଏସ୍ଇର ମିଡ୍ କ୍ୟାପ ଏବଂ ସ୍ମଲ କ୍ୟାପ୍ ସୂଚୀ ଯଥାକ୍ରମେ ୩.୪୯% ଏବଂ ୩.୭୩% ବୃଦ୍ଧି ଘଟିଛି।
