କୋମନା,୧୯।୯(ଡି.ଏନ.ଏ.) ଲୋକଙ୍କ ଗମନାଗମନ ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। କିନ୍ତୁ ଅଧିକାରୀମାନଙ୍କ ଅବହେଳା ଯୋଗୁ ଯୋଜନାଗୁଡିକ ସବୁବେଳେ ଫେଲ ମାରୁଛି। ଫଳରେ ଜଙ୍ଗଲ ରାସ୍ତାରେ ୟାତାୟାତ କରିବା ଲୋକଙ୍କ ପ୍ରତି ବିପଦପୂର୍ଣ୍ଣ ହେଉଛି। ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ଅନୁପଗଡ ଗ୍ରାମରେ ବାସ କରୁଥିବା ୪୦ ଆଦିବାସୀ ପରିବାର ଜଙ୍ଗଲ ରାସ୍ତାରେ ସବୁବେଳେ ଯିବା ଆସିବା କରିଥାନ୍ତି । ଏ ନେଇ ଅନେକ ଥର ପ୍ରଶାସନକୁ ରାସ୍ତାର ଏଭଳି ଅବସ୍ଥା ନେଇ ଅବଗତ କରିଥିଲେ ମଧ୍ୟ ପ୍ରଶାସନ ଗୁରୁତ୍ୱ ଦେଉନାହିଁ । ଯଦ୍ୱାରା ଗ୍ରାମବାସୀ ନିଜ ଉଦ୍ୟମରେ ଅଧ କି.ମି. ରାସ୍ତା ନିର୍ମାଣ କରି ଅଞ୍ଚଳରେ ଏକ ଉଦାହରଣ ସୃଷ୍ଟି କରିଛନ୍ତି। ଏହି ରାସ୍ତା ନିର୍ମାଣ ହେବା ଯୋଗୁ ଲୋକେ ସୁବିଧାରେ ୟାତାୟାତ କରୁଥିବା ଦେଖିବାକୁ ମିଳିଛି ।
ପଏଁର ହେଉଛି କୋମନା ବ୍ଲକର ନୂଆ ଗ୍ରାମପଞ୍ଚାୟତ। ପଞ୍ଚାୟତ ମୁଖ୍ୟରୁ ଅନୁପଗଡକୁ ମାତ୍ର ୨ କିଲୋମିଟର ରାସ୍ତା। ଏହି ରାସ୍ତାରେ ପୂର୍ବରୁ ବହୁ ଟଙ୍କା ଖର୍ଚ୍ଚ କରାଯାଇଥିଲେ ମଧ୍ୟ ରାସ୍ତା ଅତି ଶୋଚାନୀୟ ହୋଇ ପଡିଥିଲା। ଅନେକ ଥର ପ୍ରଶାସନକୁ ରାସ୍ତା ନିର୍ମାଣ ପାଇଁ ଗାଁବାସୀ ଦାବି କରି ଆସୁଥିଲେ। ତଥାପି ଏହି ରାସ୍ତା ଉପରେ କାହାରି ନଜର ପଡୁ ନ ଥିଲା। ଶେଷରେ ଗ୍ରାମବାସୀ ଏକଜୁଟ ହୋଇ ୨୫ ଜଣଙ୍କ ପାରିଶ୍ରମିକରେ ରାସ୍ତା ନିର୍ମାଣ କରିଛନ୍ତ। ଏହି ରାସ୍ତା ନିର୍ମାଣରେ ଗ୍ରାମର କୌଳାସ ମାଝି, ପରମାନନ୍ଦ ମାଝି, ଲୋଚନ ମାଝି, ତୁକାରାମ ମାଝି, ଗୋବିନ୍ଦ ମାଝି, ଉଧବ ମାଝି, ଟିକମନ ମାଝି ପ୍ରମୁଖ ସହଯୋଗ କରି ସମତୁଳ କରିଥିଲେ।
