ମାଲକାନଗିରି, ୫।୯(ସ୍ବ.ପ୍ର.): ଶିକ୍ଷାର ବିକାଶ ତଥା ଗୁଣାତ୍ମକ ଶିକ୍ଷା ନିମନ୍ତେ କେନ୍ଦ୍ରଠାରୁ ଆରମ୍ଭ କରି ରାଜ୍ୟ ପର୍ଯ୍ୟନ୍ତ ଯୋଜନା ପରେ ଯୋଜନା ପ୍ରସ୍ତୁତ କରୁଛନ୍ତି। ମଧ୍ୟାହ୍ନ ଭୋଜନ, ପୋଷାକ, ଜୋତା ଏବଂ ସାଇକେଲ ଇତ୍ୟାଦି ପ୍ରଦାନ କରାଯାଇ ପିଲାଙ୍କୁ ବିଦ୍ୟାଳୟ ପ୍ରତି ଆକୃଷ୍ଟ କରାଯାଉଛି। ଶିକ୍ଷକମାନଙ୍କୁ ପ୍ରଶିକ୍ଷଣ ପରେ ପ୍ରଶିକ୍ଷଣ ଦେଲା ପରେ ଗୁଣାତ୍ମକ ଶିକ୍ଷାର ବିକାଶ ହୋଇପାରୁନାହିଁ। ଏହାକୁ ଲକ୍ଷ୍ୟ କରି ମାଲକାନଗିରି ଜିଲା ତାର୍ଲାକୋଟା ସରକାରୀ ଉଚ୍ଚ ବିଦ୍ୟାଳୟରେ ଛାତ୍ରକୈନ୍ଦ୍ରିକ ଶିକ୍ଷା ପାଇଁ ଏକ ନୂତନ ଯୋଜନା କରିଛନ୍ତି। ଯାହାର ନାମ ରଖାଯାଇଛି ‘ନିଜେ ପଢିବି, ନିଜକୁ ଗଢିବି’। ଅର୍ଥାତ୍ ପିଲାଟି କେମିତି ନିଜେ ପାଠ ପଢିବା ପାଇଁ ଆଗ୍ରହ ପ୍ରକାଶ କରିବ ସେଥିପାଇଁ ପିଲାମାନଙ୍କୁ କେତୋଟି ସାଧାରଣ ନିୟମାବଳୀ ଦିଆଯାଇଛି। ଯେଭଳି ନିୟମିତ ବିଦ୍ୟାଳୟକୁ ଅସିବା, ପାଠ ପଢାବେଳେ ମନଯୋଗ ସହକାରେ ଶୁଣିବା, ଅବୁଝା ପାଠକୁ ସାଥୀ ପିଲା କିମ୍ବା ଶିକ୍ଷକଙ୍କୁ ପଚାରି ବୁଝିବା, ପ୍ରଶ୍ନୋତ୍ତର ବହି ପଢି ନିଜେ ଉତ୍ତର ଲେଖିବା, ସାଥୀ ବହି ବହି ବଦଳରେ ଖାତାରୁ ଉତ୍ତର ପଢିବା, ପାଠପଢା ବହିକୁ ସବୁଠାରୁ ଭଲ ସାଙ୍ଗ ମନେ କରିବା, ପାଠପଢା କାର୍ଯ୍ୟକୁ ମୁଖ୍ୟକାର୍ଯ୍ୟ ରୂପେ ଗ୍ରହଣ କରିବା ଇତ୍ୟାଦି ନିୟମମାନ ପବିତ୍ର ଗୁରୁଦିବସରେ ପିଲାମାନଙ୍କୁ ଶପଥ ପାଠ କରାଯାଇଛି। ଯଦି ପିଲାଟି ନିଜେ ପାଠ ପଢିବା ପାଇଁ ଆଗ୍ରହ ସୃଷ୍ଟି କରିବ ତେବେ ପାଠ କେବେ ବି କଷ୍ଟ ଲାଗିବନି, ସେଥିପାଇଁ ପାଠ ପଢିବା ପ୍ରତି ଆଗ୍ରହ ସୃଷ୍ଟି କରିବା ପାଇଁ ଏହା ଏକ ନୂତନ ପ୍ରୟାସ ବୋଲି ପ୍ରଧାନଶିକ୍ଷକ କରୁଣାକର ମଲିକ କହିଛନ୍ତି।
