ଗୁଆହାଟି,୧୦।୬: ଭାରତୀୟ ବାୟୁସେନା ବିମାନ ଏଏନ୍-୩୨ ନିଖୋଜ ହେବାର ୮ ଦିନ ବିତିଯାଇଥିଲେ ମଧ୍ୟ ଏବେ ପର୍ଯ୍ୟନ୍ତ ତା’ର ପତ୍ତା ମିଳିପାରିନାହିଁ। ସୋମବାର ପାଗ ଖରାପ ଥିବାରୁ ସର୍ଚ୍ଚ ଅପରେସନ୍ରେ ବାଧା ସୃଷ୍ଟି ହୋଇଛି। ଅପରପକ୍ଷରେ ନିଖୋଜ ବିମାନକୁ ଖୋଜିବା ପାଇଁ ଏବେ ସର୍ଚ୍ଚ ଅପରେସନ୍ରେ ସାମିଲ ହୋଇଛନ୍ତି ପର୍ବତାରୋହୀ। ପର୍ବତାରୋହୀଙ୍କ ୭ ଜଣିଆ ଦଳ ବିମାନର ପତ୍ତା ଲଗାଇବେ ବୋଲି ଜଣାପଡ଼ିଛି। ଏହି ସଦସ୍ୟଙ୍କ ଭିତରେ ୨ଜଣ ମାଉଣ୍ଟ ଏଭରେଷ୍ଟ ଚଢ଼ାଳି ରହିଛନ୍ତି। ରବିବାର ସକାଳ ୬ଟାରୁ ସେମାନେ ସର୍ଚ୍ଚ ଅପରେସନ୍ରେ ଲାଗି ପଡ଼ିଛନ୍ତି। ଯେଉଁ ଯେଉଁ ସ୍ଥାନରେ ବିମାନ ଦୁର୍ଘଟଣାଗ୍ରସ୍ତ ହେବାର ସମ୍ଭାବନା ରହିଛି ସେହିଗୁଡ଼ିକ ସ୍ଥାନରେ ସର୍ଚ୍ଚ ଅପରେସନ୍ ଆରମ୍ଭ କରାଯାଇଛି। ଅରୁଣାଞ୍ଚଳ ପ୍ରଦେଶ ସିୟାଙ୍ଗ ଜିଲାର ପାୟୁମ ସର୍କଲରେ ଥିବା ଘନ ଜଙ୍ଗଲ ଓ କାୟିଙ୍ଗ ସର୍କଲରେ ପର୍ବତାରୋହୀମାନେ ନିଖୋଜ ବିମାନକୁ ଖୋଜିବାରେ ଲାଗିପଡ଼ିଛନ୍ତି।
