ବାରଙ୍ଗ,୩୧ା୧୨(ଡି.ଏନ୍.ଏ.)- ବାରଙ୍ଗ ଥାନା ଅଞ୍ଚଳର ଜଣେ ନାବାଳିକାଙ୍କୁ ଅନ୍ତଃସତ୍ତ୍ୱା କରିବା ଅଭିଯୋଗରେ ପୋଲିସ ଜଣେ ଯୁବକଙ୍କୁ ସୋମବାର ଗିରଫ କରି କୋର୍ଟଚାଲାଣ କରିଛି। ସେ ହେଲେ ଉକ୍ତ ଥାନା ଅଞ୍ଚଳର ସୁବ୍ରତ ନାୟକ (୨୪)। ଏ ନେଇ ପୋଲିସ ନଂ. ୨୨୫/୧୯ରେ ଏକ ମାମଲା ରୁଜୁ କରିଥିବାବେଳେ ଉଭୟଙ୍କୁ ଡାକ୍ତରୀମାଇନା କରିବା ପରେ ନାବାଳିକାକୁ ତାଙ୍କ ପରିବାରକୁ ହସ୍ତାନ୍ତର କରାଯାଇଛି। ସୂଚନାଯୋଗ୍ୟ, ସୁବ୍ରତ ଏହି ଅଞ୍ଚଳରେ ଏକ ଜଳଖିଆ ଦୋକାନ କରିଥିଲେ। କିଛିଦିନ ମଧ୍ୟରେ ଉକ୍ତ ନାବାଳିକାଙ୍କ ସହ ଦେଖାହୋଇ ପ୍ରେମ କରିଥିଲେ। ବିବାହର ପ୍ରଲୋଭନ ଦେଖାଇ ନାବାଳିକାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ପରେ ସେ ଗର୍ଭବତୀ ହୋଇଥିବା ଜାଣି ବିବାହ ପାଇଁ ସୁବ୍ରତ ମନା କରିଦେଇଥିଲେ। ଏହି କଥା ନାବାଳିକାଙ୍କ ପରିବାର ଲୋକ ଜାଣିବା ପରେ ଅନୁରୋଧକ୍ରମେ ଗ୍ରାମବାସୀ ସୁବ୍ରତକୁ ଡକାଇ ଘଟଣାର ସମାଧାନ ପାଇଁ ବିବାହ ଲାଗି କହିଥିଲେ ମଧ୍ୟ ସେ ଗୁରୁତ୍ୱ ଦେଇ ନ ଥିଲେ। ଶେଷରେ ନାବାଳିକାଙ୍କ ପରିବାର ଲୋକ ସୋମବାର ଥାନାର ଦ୍ୱାରସ୍ଥ ହୋଇଥିଲେ। ଅଭିଯୋଗକ୍ରମେ ପୋଲିସ ସୁବ୍ରତଙ୍କୁ ଧରିଥିଲା।
