ନୀଳଗିରି, ୧୭ା୬(ଡି.ଏନ.ଏ.)-ନାଗାଲାଣ୍ଡକୁ ଦାଦନ ଖଟିବାକୁ ଯାଇଥିବା ବାଲେଶ୍ୱର ଜିଲା ନୀଳଗିରି ବ୍ଲକ ଅଧୀନ ବିଭିନ୍ନ ଗାଁର ୭ଜଣ ଶ୍ରମିକ ସୋମବାର ଗଁାକୁ ଫେରିଛନ୍ତି। ସେଠାରେ ସେମାନେ ନିର୍ଯାତନାର ଶିକାର ହେଉଥିବା ଅଭିଯୋଗ ହୋଇଥିଲା। ପ୍ରଶାସନର ହସ୍ତକ୍ଷେପ ପରେ ଶ୍ରମିକମାନେ ଫେରିଥିବା ସ୍ଥାନୀୟ ସହକାରୀ ଶ୍ରମ ଅଧିକାରୀ ଦୀପ୍ତି ରଞ୍ଜନ ସାହୁ କହିଛନ୍ତି ା ଉକ୍ତ ଶ୍ରମିକମାନେ ହେଲେ ତେଲିପାଳ ପଞ୍ଚାୟତର ଚନ୍ଦନସାହି ଗାଁର ଛୁଟରାୟ ମାଝି (୨୨), ଭୂଜୁ ମାରାଣ୍ଡି(୨୧), ଜାମୁଡିହା ପଞ୍ଚାୟତ ରାଜସ୍ବ ଗାଁର ଚନ୍ଦୁ ମୁଖୀ(୧୯), ଦୀପକ ମୁଖୀ(୨୦), ଭୁଳଗଡିଆ ଗାଁର ପରେଶ ମାଝି(୧୮), ମଙ୍ଗଲ ମାଝି(୧୯) ଓ ଛତ୍ରପୁର ପଞ୍ଚାୟତ ରାଜସ୍ବ ଗାଁର ଶଙ୍କର ହେମ୍ବ୍ରମ (୧୯)।
କେନ୍ଦ୍ରାପଡା ଜିଲା ରାଜକନିକା ଅଞ୍ଚଳର ରଞ୍ଜନ ଜେନା ନାମକ ଦଲାଲ ସ୍ଥାନୀୟ ବ୍ଲକର ବେକାର ଯୁବକଙ୍କୁ ବାହାର ରାଜ୍ୟରେ ଅଧିକ ଦରମା ଦେବାର ପ୍ରଲୋଭନ ଦେଖାଇ ନାଗାଲାଣ୍ଡର ଡିନପୁର ଅଞ୍ଚଳରେ କୌଣସି କମ୍ପାନୀରେ ରଖାଇ ଦେଇଥିଲେ। କମ୍ପାନୀରେ ଶ୍ରମିକଙ୍କୁ ନିର୍ଯାତନା ଦେବା ସହ ଘରକୁ ନ ଛାଡିବାରୁ ଯୁବକମାନେ ପରିବାର ଲୋକଙ୍କୁ ଫୋନରେ ଜଣାଇଥିଲେ। ପରିବାର ଲୋକ ମେ’ ୨୫ତାରିଖରେ ସ୍ଥାନୀୟ ସହକାରୀ ଶ୍ରମ ଅଧିକାରୀଙ୍କ ନିକଟରେ ଦଲାଲ ରଞ୍ଜନ ଜେନାଙ୍କ ବିରୋଧରେ ଅଭିଯୋଗ କରିଥିଲେ। ଏନେଇ ଶ୍ରମ ଅଧିକାରୀ ୧୦ଦିନ ଭିତରେ ନିର୍ଯାତିତ ଶ୍ରମିକଙ୍କୁ ଛାଡିଦେବା ପାଇଁ ଦଲାଲଙ୍କୁ ନୋଟିସ ଜାରି କରିଥିଲେ। ଶୁକ୍ରବାର ୭ଜଣ ଶ୍ରମିକ ଆସି ସେମାନଙ୍କ ଘରେ ପହଞ୍ଚିଥିଲେ। ପୂର୍ବାହ୍ନରେ ସହକାରୀ ଶ୍ରମ ଅଧିକାରୀ ଫେରାନ୍ତା ଶ୍ରମିକଙ୍କ ବୟାନ ରେକର୍ଡ କରିଥିଲେ ା ଶ୍ରମିକମାନେ ପାଇ ନ ଥିବା ପାରିଶ୍ରମିକ ବାବଦ ଅଭିଯୋଗ କଲେ ଦଲାଲଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଶ୍ରମ ଅଧିକାରୀ ସାହୁ କହିଛନ୍ତି ା
