ନୂଆଦିଲ୍ଲୀ,୨୦ା୧୦: ନାଗାମାନଙ୍କ ଲାଗି ସ୍ବତନ୍ତ୍ର ସମ୍ବିଧାନ ଓ ପତାକା ଦାବିକୁ କେନ୍ଦ୍ର ସରକାର ଅଗ୍ରାହ୍ୟ କରିଦେଇଛନ୍ତି। ଏନ୍ଏସ୍ସିଏନ୍-ଆଇଏମ୍ ପକ୍ଷରୁ ଏଥିପାଇଁ ଦାବି ହୋଇଆସୁଥିଲା। ଦୀର୍ଘ ଦଶନ୍ଧି ଧରି ଚାଲିଥିବା ଶାନ୍ତି ପ୍ରକ୍ରିୟା ଅବିଳମ୍ବେ ଶେଷ କରିବାକୁ ସରକାର ପ୍ରତିଶ୍ରୁତିବଦ୍ଧ ବୋଲି ନାଗା ଆଲୋଚନାର ମଧ୍ୟସ୍ଥ ତଥା ନାଗାଲାଣ୍ଡ ରାଜ୍ୟପାଳ ଆର୍.ଏନ୍. ରବି କହିଛନ୍ତି। ଚିଠା ବୁଝାମଣାରେ ସରକାର ରାଜି ହୋଇଛନ୍ତି ଓ ଖୁବ୍ଶୀଘ୍ର ଚୂଡ଼ାନ୍ତ ରାଜିନାମା ସ୍ବାକ୍ଷର ହେବ ବୋଲି ରାଜ୍ୟପାଳ କହିଛନ୍ତି।
ଏଭଳି ସମୟରେ ସମାଧାନ ପ୍ରକ୍ରିୟାକୁ ବିଳମ୍ବିତ କରିବା ଲାଗି ଏନ୍ଏସ୍ସିଏନ୍-ଆଇଏମ୍ ଟାଳଟୁଳ ମନୋଭାବ ପୋଷଣ କରିବା ଦୁର୍ଭାଗ୍ୟଜନକ। ବୁଝାମଣାକୁ ବିଳମ୍ବିତ କରିବା ଲାଗି ସେମାନେ ସ୍ବତନ୍ତ୍ର ଜାତୀୟ ପତାକା ଓ ସମ୍ବିଧାନ କଥା କହୁଛନ୍ତି। ଏହା କେବେ ସମ୍ଭବ ନୁହେଁ, ଏକଥା ନାଗାମାନେ ଭଲଭାବେ ଜାଣନ୍ତି ବୋଲି ରାଜ୍ୟପାଳ ଏକ ବିବୃତିରେ କହିଛନ୍ତି। ଏନ୍ଏସ୍ସିଏନ୍-ଆଇଏମ୍ର କେତେକ ନେତାଙ୍କ ପ୍ରତିକୂଳ ମନୋଭାବ ସତ୍ତ୍ୱେ ଶୁକ୍ରବାର ରାଜ୍ୟପାଳ କୋହିମାରେ ନାଗା ସୋସାଇଟିର କେତେଜଣ ନେତାଙ୍କ ସହ ଆଲୋଚନା କରିଥିଲେ। ସମସ୍ତ ୧୪ ନାଗା ଜନଜାତିର ନେତାଙ୍କ ସମେତ ଅଣନାଗା ନେତାମାନେ ମଧ୍ୟ ଯୋଗଦେଇଥିଲେ।
