କଣ୍ଟାପଡା, ୧୮।୪(ଡି.ଏନ୍.ଏ.): କରୋନାର ଗୋଷ୍ଠୀ ସଂକ୍ରମଣରୁ ସୁରକ୍ଷିତ ରହିବା ପାଇଁ କେନ୍ଦ୍ର ଓ ରାଜ୍ୟସରକାର ଲକ୍ଡାଉନ୍ କଟକଣା ଲଗାଇଛନ୍ତି। ଏହି ସମୟରେ କେବଳ କିଛି ନିର୍ଦ୍ଦିଷ୍ଟ ଦୋକାନ ଖୋଲାଯିବ ବୋଲି ନିର୍ଦ୍ଦେଶ ରହିଛି। ବିଶେଷକରି ଅତ୍ୟାବଶ୍ୟକ ସାମଗ୍ରୀ ଯଥା ଔଷଧ, ପନିପରିବା, ଗ୍ରୋସରୀ, ମାଛମାଂସ ଆଦି ଦୋକାନ ଖୋଲା ରଖିବାପାଇଁ ଗାଇଡ୍ ଲାଇନ୍ ଜାରି କରାଯାଇଛି। ତେବେ ଏହି ଗାଇଡ୍ ଲାଇନ୍କୁ କଣ୍ଟାପଡା ବ୍ଳକ ଅଞ୍ଚଳରେ ବହୁ ଅସାଧୁ ବ୍ୟବସାୟୀ ପାଳନ କରିବା ପରିବର୍ତ୍ତେ ଉଲ୍ଲଂଘନ ପାଇଁ ନୂଆ କୌଶଳ ଆପଣାଇଛନ୍ତି। ଏବେ ଏହି ବ୍ୟବସାୟୀମାନେ ନିଜ ଦୋକାନ ସମ୍ମୁଖରେ ପରିବା ଡାଲାରଖି ସେଥିରେ ଅଳ୍ପ ପରିମାଣର ପରିବା ରଖି ଅନ୍ୟାନ୍ୟ ସାମଗ୍ରୀ ବିକ୍ରି କରୁଛନ୍ତି। ଏହି ଅଞ୍ଚଳରେ କେତେକ ଚା’ ଦୋକାନ ମଧ୍ୟ ବଢ଼ିଭୋରୁ ଖୋଲୁଥିବା ଦେଖାଯାଉଛି। ଫଳରେ ଉକ୍ତ ଦୋକାନରେ ବିଭିନ୍ନ ଗ୍ରାମରୁ ଯୁବକମାନେ ଆସି ଖଟି କରୁଥିବା ଦେଖାଯାଉଛି। ସେହିପରି ଗ୍ରୋସରୀ ଦୋକାନ ଖୋଲା ରଖବାକୁ ନିର୍ଦ୍ଦେଶ ଥିବାରୁ ବ୍ୟବସାୟୀମାନେ ଗ୍ରୋସରୀ ସହ ସେଥିରେ ଅନ୍ୟାନ୍ୟ ସାମଗ୍ରୀ ରଖି ବିକ୍ରି କରୁଛନ୍ତି। ସେହିପରି ବିଭିନ୍ନ ବଜାରରେ ଥିବା ଜଳଖଆ ଦେକାନ ବନ୍ଦ ଥିବାରୁ ଏହି ବ୍ୟବସାୟୀ ମାନେ ଗଁାଭିତରେ ପସରା ଖୋଳିବା ଆରମ୍ଭ କରିଛନ୍ତି। ଫଳରେ ଗାଁ ଭିତରକୁ ବାହାର ଲୋକ ଅବାଧରେ ପ୍ରବେଶ କରୁଛନ୍ତି। ସାମାଜିକ ଦୂରତ୍ୱକୁ ଗୁରୁତ୍ୱ ଦେବାପାଇଁ ସତର୍କ କରାଯାଉଥିଲେ ମଧ୍ୟ ଉକ୍ତ ଅଞ୍ଚଳରେ ପ୍ରଶାସନ ପକ୍ଷରୁ କୌଣସି ଗାଇଡ୍ ଲାଇନ୍ ଜାରି କରାଯାଉ ନଥିବାରୁ ବ୍ୟବସାୟୀ ମାନେ ବେଧଡକ ଭାବେ ନିଜର ବ୍ୟବସାୟ ଚଳାଇଛନ୍ତି। ପ୍ରଶାସନ ଏଥିରେ ତୁରନ୍ତ ହସ୍ତକ୍ଷେପ ନ କଲେ ଆଗାମୀ ଦିନରେ ଲକ୍ଡାଉନ୍ର ଉଦ୍ଦେଶ୍ୟ ଗୁରୁତ୍ୱହୀନ ହୋଇପଡିବ ବୋଲି ସାଧାରଣରେ ଆଲୋଚନା ହେଉଛି।
