ମୁମ୍ବାଇ, ୨୨ା୫ (ପି.ଟି.)- ଆଇସିସି ବିଶ୍ୱକପ୍ରେ ମହେନ୍ଦ୍ର ସିଂ ଧୋନୀ ପ୍ରମୁଖ ଭୂମିକା ଗ୍ରହଣ କରିବେ। ଭାରତୀୟ କ୍ରିକେଟ ଦଳର ମୁଖ୍ୟ କୋଚ୍ ରବି ଶାସ୍ତ୍ରୀ ପ୍ରକାଶ କରିଛନ୍ତି। ଜଣେ କିପର ହିସାବରେ ସେ ବର୍ଷ ବର୍ଷ ଧରି ତାଙ୍କର ଦକ୍ଷତା ପ୍ରତିପାଦନ କରିଆସିଛନ୍ତି। ଏହି ଫର୍ମାଟରେ ତାଙ୍କଠାରୁ କେହି ଉନ୍ନତ ନୁହନ୍ତି। ସେ କେବଳ ଉଇକେଟ ପଛରେ କ୍ୟାଚ୍ ନେଇ ନ ଥାନ୍ତି। ରନ୍ ଆଉଟ ଓ ଷ୍ଟମ୍ପିଂରେ ମଧ୍ୟ ତାଙ୍କର ବିଶେଷ ଭୂମିକା ରହିଥାଏ। ବିଶ୍ୱକପ୍ ଖେଳିବା ଲାଗି ଇଂଲଣ୍ଡ ପ୍ରସ୍ଥାନ ପୂର୍ବରୁ ଶାସ୍ତ୍ରୀ କହିଛନ୍ତି, ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଧୋନୀଙ୍କ ଫୁଟ୍ଓ୍ବର୍କ ତାଙ୍କୁ ପ୍ରଭାବିତ କରିଥିଲା। ତାଙ୍କ ଚତୁର୍ଥ ବିଶ୍ୱକପ୍ ଖେଳିବାକୁ ଯାଉଥିବା ଏହି ଭେଟେରାନ ଉଇକେଟକିପର ବ୍ୟାଟ୍ସମ୍ୟାନ ଆଇପିଏଲରେ ୮୩.୨ ଆଭରେଜରେ ୪୧୬ ରନ ସଂଗ୍ରହ କରିଥିଲେ। ତାଙ୍କ ଅଧିନାୟକତ୍ୱରେ ଚେନ୍ନାଇ ସୁପର କିଙ୍ଗ୍ସ ଫାଇନାଲରେ ପ୍ରବେଶ କରିପାରିଥିଲା। ଶାସ୍ତ୍ରୀ କହିଛନ୍ତି, ବିପକ୍ଷ ଦଳଗୁଡ଼ିକର କ୍ୱାଲିଟି ଦୃଷ୍ଟିରୁ ଏଥର ବିଶ୍ୱକପ୍ ସବୁଠାରୁ ଚ୍ୟାଲେଞ୍ଜିଂ ହେବ ବୋଲି ଶାସ୍ତ୍ରୀ କହିଛନ୍ତି। ଯଦି ୨୦୧୪ ଏବଂ ବର୍ତ୍ତମାନ ୨୦୧୯ ସଂସ୍କରଣକୁ ତୁଳନା କରି ଦେଖାଯାଏ ତେବେ ଦଳଗୁଡ଼ିକ ମଧ୍ୟରେ ବ୍ୟବଧାନ ଖୁବ୍ କମ୍ ରହିଛି। ୨୦୧୪ରେ ଆଫଗାନିସ୍ତାନ ଏବଂ ବାଂଲାଦେଶ ଯେପରି ଖେଳୁଥିଲେ। ସେଥିରେ ଅନେକ ପରିବର୍ତ୍ତନ ଲକ୍ଷ୍ୟ କରାଯାଇଛି। ଯେକୌଣସି ଦଳକୁ ଚ୍ୟାଲେଞ୍ଜ ଦେବାଭଳି କ୍ଷମତା ସେମାନଙ୍କ ନିକଟରେ ଅଛି। କାଗଜପତ୍ରରେ ଓ୍ବେଷ୍ଟଇଣ୍ଡିଜ ଅନ୍ୟ କୌଣସି ତୁଳନାରେ କମ୍ ନୁହେଁ। ଇଂଲଣ୍ଡ ପିଚ୍ଗୁଡ଼ିକ କ୍ରମେ ଅଧିକରୁ ଅଧିକ ଫ୍ଲାଟ ହେବାରେ ଲାଗିଥିବା ଲକ୍ଷ୍ୟ କରାଯାଉଛି। ଫଳତଃ ପାକିସ୍ତାନକୁ ନେଇ ଆୟୋଜକ ଦେଶ ନିକଟରେ ଖେଳିଥିବା ଦିନିକିଆ ସିରିଜରେ ପ୍ରାୟ ସ୍କୋର ୩୫୦ ଅତିକ୍ରମ କରିଥିଲା। ଭାରତ ବିଶ୍ୱକପ୍ରେ ସ୍ଥିର ପ୍ରଦର୍ଶନ ବଜାୟ ରଖିବାକୁ ଚାହିଁବ ବୋଲି ଶାସ୍ତ୍ରୀ ପ୍ରକାଶ କରିଛନ୍ତି।
