ଯୋଡ଼ା, ୨୫।୧୨(ଡି.ଏନ.ଏ.)-କେନ୍ଦୁଝର ଜିଲା ଯୋଡା ସହରର ୫୨୦ନଂ ଜାତୀୟ ରାଜପଥରେ ପ୍ରବଳ ମାତ୍ରାରେ ଧୂଳି ଉଡିବା ପ୍ରତିବାଦରେ ମଙ୍ଗଳବାର ଯୋଡା ଟଲକ ହଟିଂବାସୀ ୫୨୦ନଂ ଜାତୀୟ ରାଜପଥ ଅବରୋଧ କରିଥିଲେ। ମଙ୍ଗଳବାର ସକାଳ ୭ଟାରୁ ୮ଟା ପର୍ଯ୍ୟନ୍ତ ହଟିଂବାସୀ ଏହି ଅବରୋଧ କରିଥିଲେ। ଖବର ପାଇ ଯୋଡା ଥାନା ଆଇଆଇସି ରାଇସେନ୍ ମୁର୍ମୁ ଘଟଣାସ୍ଥଳରେ ପହଞ୍ଚି ଲୋକମାନଙ୍କୁ ବୁଝାଶୁଝା କରି ରାସ୍ତାରେ ପାଣି ସିଞ୍ଚନ କରିବା ପାଇଁ ପ୍ରତିଶ୍ରୁତି ଦେବା ପରେ ହଟିଂବାସୀ ରାସ୍ତା ଅବରୋଧରୁ ହଟିଥିଲେ। ହଟିଂବାସୀ ସେମାନଙ୍କ ଅଭିଯୋଗରେ କହିଥିଲେ ଯେ, କିଛି ଦିନ ପୂର୍ବେ ଏହି ଅଞ୍ଚଳକୁ ଷ୍ଟାଣ୍ଡିଂ କମିଟି ଓ ମୁଖ୍ୟ ଶାସନ ସଚିବ ଆସିଥିବା ସମୟରେ ରାସ୍ତାରେ ଥିବା ଖାଲଖମାରେ ମାଟି ପକାଇ ଦିଆଯାଇଥିଲା। ଯାହାକି ବର୍ତ୍ତମାନ ଜନସାଧାରଣଙ୍କ ପାଇଁ ଅସୁବିଧା ସାଜିଛି ା କାରଣ, ଖାଲଖମାରେ ପକାଯାଇଥିବା ମାଟିରୁ ଧୂଳି ଉଡି ରାସ୍ତା ସମ୍ପୂର୍ଣ୍ଣ ଧୂଳିରେ କୁହୁଡି ପରି ଆଚ୍ଛାଦିତ ହୋଇଯାଉଛି ା ଗତ ରବିବାର ସନ୍ଧ୍ୟା ସମୟରେ ଏହି ରାଜପଥରେ ବହୁ ମାତ୍ରାରେ ଧୂଳି ଯୋଗୁ ଏକ ମାରୁତି କାର୍ର ଚାଳକ ଦେଖି ନ ପାରି ଗାଡିଟିକୁ ରାସ୍ତାର ତଳ ପାର୍ଶ୍ୱକୁ ଖସାଇଦେଇଥିଲେ ା ସେଠାରେ ଉପସ୍ଥିତ ଥିବା ମନୋଜ ବେହେରା ଓ ସାଥୀମାନେ ଗାଡିଟିକୁ ଠେଲି ସେଠାରୁ ବାହାର କରିଥିଲେ ା ବହୁ ମାତ୍ରାରେ ଧୂଳି ଉଡିବା ଦ୍ୱାରା ଘରବାଡି, ଗଛପତ୍ର ଏପରିକି ଖାଦ୍ୟପଦାର୍ଥରେ ମଧ୍ୟ ଧୂଳି ଜମି ଯାଉଛି। ଫଳରେ ସ୍ଥାନୀୟ ହଟିଂବାସୀଙ୍କ ଜୀବନ ଦୁର୍ବିସହ ହୋଇପଡିଥିବା ସେମାନେ ଅଭିଯୋଗ କରିଛନ୍ତି। ରାସ୍ତାରେ ପ୍ରତିଦିନ ପାଣି ସିଞ୍ଚନ କରିବା ପାଇଁ ସେମାନେ ଦାବି କରିଛନ୍ତି।
