ନୂଆପଡା ଅଫିସ,୧ା୭
ରାଜ୍ୟ ସରକାର ନୂଆପଡ଼ା ଜିଲାରୁ ଧାନକିଣା ପାଇଁ ଜୁନ ୩୦ ତାରିଖକୁ ଶେଷ ଦିନ ଭାବେ ଲକ୍ଷ୍ୟ ଧାର୍ଯ୍ୟ କରି ଘୋଷଣା କରିଥିଲେ। ସେହି ଦିନ ସୁଦ୍ଧା ବଣ୍ଟନ କରାଯାଇଥିବା ଟୋକନରୁ ଧାନ ଉଠାଣ କରିବା ସିଦ୍ଧାନ୍ତ ନିଆଯାଇଥିଲା। ଟୋକନ ମିଳିଥିଲେ ହେଁ ଚାଷୀଙ୍କ ହଜାର ହଜାର ବସ୍ତା ଧାନ ବିକ୍ରି ନ ହୋଇ ପଡିରହିଛି। ଏପଟେ ଛତିଶଗଡରୁ ଧାନ ଆସି ମିଲର୍ସଙ୍କ ଗୋଦାମରେ ପଡି ରହିଛି ବୋଲି ଅସନ୍ତୋଷ ଚାଷୀମାନେ ସୋମବାର ନୂଆପଡା ଆସି ଜିଲାପାଲଙ୍କ ଅଫିସ ଘେରାଉ କରିବା ସହ ସଦଭାବନା ସଭାଗୃହରେ ଅଭିଯୋଗ ଶୁଣାଣି ଶିବିର ଚାଲିଥିବା ବେଳେ ଭିତରକୁ ପଶି ଦାବି ଜଣାଇଥିଲେ। ବାହାରେ ଶତାଧିକ ଚାଷୀ ଘେରାଉ କରି ରହି ଥିବାବେଳେ ଅଧିକାରୀମାନଙ୍କ ସହ ଦୀର୍ଘ ଘଣ୍ଟାଏକାଳ ଆଲୋଚନା ହୋଇଥିଲା। ଧାନ ବିକ୍ରି ନ ହେବା ଯାଏଁ ସେମାନେ ଅଭିଯୋଗ ଶୁଣାଣି ଶିବିରରେ ରହିବେ ବୋଲି ଅଡିବସିଥିଲେ। ପରେ ପୋଲିସର ଉପସ୍ଥିତିରେ ଚାଷୀମାନଙ୍କ ତରଫରୁ ପ୍ରସନ୍ନ କୁମାର ପାଢୀ, ଚତୁର୍ଭୁଜ ଶର୍ମା, ରବୀନ୍ଦ୍ର ମଙ୍ଗରାଜ, ହୋମ ସିଂ ମାଝି ପ୍ରମୁଖ ଆଲୋଚନା କରିଥିଲେ। ଅନ୍ୟପକ୍ଷେ ଅତିରିକ୍ତ ଜିଲାପାଳ ସୀତାରାମ ପଟେଲ, ଡିଆରଡିଏ ପିଡି ବୃଷଭ ଚନ୍ଦ୍ର ନାଏକ, ଜିଲା ଯୋଗାଣ ବିଭାଗ ଅଧିକାରୀ ଅଶୋକ ଦାସ, ଏଏସପି ସୁନୀଲ କୁମାର ଆଚାର୍ଯ୍ୟ, ଏସଡିପିଓ ଅଜୟ କୁମାର ପଟ୍ଟନାୟକ ପ୍ରମୁଖ ଦାବିଗୁଡିକ ଉପରେ ଗୋଟି ଗୋଟି କରି ଆଲୋଚନା କରିଥିଲେ। ଚାଷୀ ପକ୍ଷରୁ ତୁରନ୍ତ ଧାନ କିଣା ଯିବା, ମିଲର୍ସଙ୍କ ଗୋଦାମରେ ଭର୍ତ୍ତି ଥିବା ଛତିଶଗଡି ଧାନର ତଦନ୍ତ କରିବା, ଟୋକନ ପାଇଥିବା ଚାଷୀଙ୍କ ଧାନକୁ ମିଲର୍ସ କିଣି ନେବାକୁ ଦାବି କରାଯାଇଥିଲା । ଏହା ଉପରେ ବିଚାର କରି ମିଲର୍ସଙ୍କ ଗୋଦାମର ତନଖୀ କରାଯିବା, ଟୋକନ ଥିବା ଚାଷୀଙ୍କ ଧାନକୁ ତୁରନ୍ତ କିଣାଯିବାକୁ ବ୍ୟବସ୍ଥା କରାଯିବ ବୋଲି ପ୍ରଶାସନ ତରଫରୁ କୁହାଯାଇଥିଲା। ଏହିଭଳି ଜିଲାର ଧାନ କିଣା ଟାର୍ଗେଟକୁ ବୃଦ୍ଧି ସକାଶେ ରାଜ୍ୟ ସରକାରଙ୍କୁ ଜଣାଇଛୁ। ଏହା ବୃଦ୍ଧି କରାଗଲେ ସବୁ ଧାନ କିଣାଯିବ ବୋଲି କୁହାଯାଇଛି । ଏସବୁ ପ୍ରତିଶ୍ରୁତି ପରେ ଚାଷୀମାନେ ମଙ୍ଗଳବାର ପୂର୍ବାହ୍ନ ୧୦ଟା ସୁଦ୍ଧା ଧାନ କିଣା ନ ଗଲେ ହଜାର ହଜାର ବସ୍ତା ଧାନ ଆଣି ଜିଲାପାଳଙ୍କ କାର୍ଯ୍ୟାଳୟରେ ରଖି ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି। ଏଭଳିସ୍ଥିତି ଜିଲାରେ ପ୍ରଥମ ଥର ପାଇଁ ହୋଇଥିବାରୁ ଏହାକୁ ଚାଷୀ ମହଲରେ ଜିଲା ପ୍ରଶାସନର ଅକ୍ଷମତା ବୋଲି କହି ତୀବ୍ର ନିନ୍ଦା କରାଯାଇଛି ।
ସୂଚନାଯୋଗ୍ୟ ଯେ, ଜିଲାରେ ବର୍ତ୍ତମାନ ସୁଦ୍ଧା ୨ ଲକ୍ଷ ୬୨ ହଜାର କୁଇଣ୍ଟାଲ ଧାନ କିଣାଯାଇଛି । ତଥାପି ବିଭିନ୍ନ ମଣ୍ଡିରେ ୩୦ ହଜାରରୁ ଊର୍ଦ୍ଧ୍ୱ କୁଇଣ୍ଟାଲ ଧାନ ପଡିରହିଥିବା ଚାଷୀମାନେ ଦାବି କରୁଛନ୍ତି । ଚାଷୀଙ୍କୁ ଟୋକନ ଦିଆଯାଇଛି। ଟୋକନ ନେଇ ଚାଷୀ ମିଲର୍ସଙ୍କ ଗୋଦାମକୁ ଯାଉଛନ୍ତି। ମିଲର୍ସମାନେ ତାଙ୍କ ମର୍ଜିରେ ୧୦/୨୦ କିଗ୍ରା କଟନି କରିବାକୁ ମୂଲଚାଳ କରୁଛନ୍ତି । ଏପଟେ ବର୍ଷା ଆସୁଥିବାରୁ ଚାଷୀ ବାରଦୁଆର ହେଉଛନ୍ତି। ଜିଲା ଅଫିସକୁ ଆସିଲେ ଟାର୍ଗେଟ ସରିଯାଇଥିବା କୁହାଯାଉଛି। ଏଭଳି ସ୍ଥିତିରେ ବିଶେଷ କରି ପରକୋଡ, ଡୁମେରପାଣି, ଜଡାମୁଣ୍ଡା ମଣ୍ଡି ଅଧୀନ ଚାଷୀମାନେ ବ୍ୟତିବ୍ୟସ୍ତ ହୋଇପଡଛନ୍ତି।
