ବରଗଡ଼ ଅଫିସ,୧୨ା୪: ମହାମାରୀ କରୋନା ଭୂତାଣୁ ପ୍ରତିହତ ପାଇଁ ସାମାଜିକ ଦୂରତ୍ୱକୁ ଗୁରୁତ୍ୱ ଦିଆଯାଉଛି। ଏଥିପାଇଁ ଲକ୍ଡାଉନ୍ କଟକଣା ମଧ୍ୟ ଲାଗୁ କରାଯାଇଛି। ମାତ୍ର ମାଛ, ମାଂସ, ପରିବା ବଜାରଠାରୁ ଆରମ୍ଭ କରି ରାଶନ ବଣ୍ଟନ ପାଇଁ ପ୍ରଶାସନ ପକ୍ଷରୁ ନିର୍ଦ୍ଧାରିତ ଅନେକ ରାଶନ ବିତରଣ କେନ୍ଦ୍ରରେ ସାମାଜିକ ଦୂରତ୍ୱ ଆଦୌ ରହୁ ନ ଥିବା ପରିଲକ୍ଷିତ ହୋଇଛି। ଏହା ଜନସାଧାରଣଙ୍କୁ ଅଡୁଆରେ ପକାଇ ଦେଇଥିବାବେଳେ ପୋଲିସ, ପ୍ରଶାସନ ପକ୍ଷରୁ ମଧ୍ୟ ଠୋସ୍ ପଦକ୍ଷେପ ନିଆଯାଉ ନ ଥିବା ଦେଖିବାକୁ ମିଳିଛି । ଏ ନେଇ ଗତ ୧୧ ତାରିଖ ଧରିତ୍ରୀ ସଂସ୍କରଣରେ ଏକ ଖବର ପ୍ରକାଶ ପାଇଥିଲା। ଉକ୍ତ ଖବରକୁ ଆଧାର କରି ବରଗଡ଼ ଜିଲା ଯୋଖିପାଲିର ଏକ ସାମାଜିକ ଅନୁଷ୍ଠାନ ପକ୍ଷରୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସମେତ ବିଭାଗୀୟ ଅଧିକାରୀଙ୍କୁ ଟୁଇଟ୍ କରାଯାଇଥିଲା। ଏହାର ପ୍ରତ୍ୟୁତ୍ତରରେ ବରଗଡ଼ ପୌର ପରିଷଦ ରାଶନ କେନ୍ଦ୍ରଗୁଡ଼ିକରେ ସାମାଜିକ ଦୂରତ୍ୱ ରଖି ଦୈନିକ ୨୫ରୁ ୫୦ ହିତାଧିକାରୀଙ୍କୁ ପିଡିଏସ୍(ରାଶନ) ସାମଗ୍ରୀ ଯୋଗାଇ ଦେବା ଏବଂ ଏହା ସହିତ ଦିବ୍ୟାଙ୍ଗ ତଥା ଦୁର୍ବଳ ହିତାଧିକାରୀଙ୍କ ଘରକୁ ରାଶନ ସାମଗ୍ରୀ ପହଞ୍ଚାଇ ଦେବା ପାଇଁ ନିର୍ଦ୍ଦେଶ ଦିଆଯାଇଥିବା କହିଛନ୍ତି। ସେହିପରି ରାଶନ କେନ୍ଦ୍ରଗୁଡ଼ିକରେ ପୋଲିସ କର୍ମଚାରୀ ମଧ୍ୟ ମୁତୟନ କରାଯାଇଛି। ଏବଂ ସାମାଜିକ ଦୂରତ୍ୱ ଉପରେ ସଚେତନତା ସୃଷ୍ଟି କରାଯାଉଛି ବୋଲି ପୌର ପରିଷଦ କର୍ତ୍ତୃପକ୍ଷ ଉତ୍ତର ରଖିଛନ୍ତି । ମାତ୍ର ବରଗଡ଼ ପୌର ପରିଷଦ ଅଧୀନ ୧ ନଂ ଓ୍ବାର୍ଡର ଏକ ରାଶନ ବିତରଣ କେନ୍ଦ୍ରରେ ରବିବାର ଅସମ୍ଭାଳ ଭିଡ଼ ହେବା ସହିତ ସାମାଜିକ ଦୂରତ୍ୱ ରହି ନ ଥିବା ଦେଖିବାକୁ ମିଳିଥିଲା। ଏହାର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
