ଭୁବନେଶ୍ୱର,୨୦।୨(ବ୍ୟୁରୋ): ଦୟା ଓ୍ବେଷ୍ଟ ଶାଖା କେନାଲ ଭୁବନେଶ୍ୱର ଓ ଜଟଣୀ ବ୍ଲକର ୨,୪୧୭ ହେକ୍ଟରକୁ ଜଳ ଯୋଗାଇ ଦେବା ଲାଗି ନିର୍ମାଣ କରାଯାଇଥିଲା। କିନ୍ତୁ ଇତି ମଧ୍ୟରେ ସହରୀକରଣ ଯୋଗୁ ବର୍ତ୍ତମାନ ପ୍ରାୟ ୧୩୫୦ ହେକ୍ଟରକୁ ଜଳସେଚନ ଯୋଗାଇ ଦିଆଯାଉଛି। ବୈଷୟିକ ଆବଶ୍ୟକତାକୁ ଦୃଷ୍ଟିରେ ରଖି ଦୟା ଓ୍ବେଷ୍ଟ କେନାଲର ସୁଆଙ୍ଗ ଅଞ୍ଚଳରେ ଲାଇନିଂ କାମ କରାଯାଉଛି। ଏହି କେନାଲର ଅଧିକାଂଶ ଅଞ୍ଚଳ ସହର ମଧ୍ୟରେ ଥିବାରୁ ଏହାର ବାମ ପାର୍ଶ୍ୱରେ ୧୩.୧୨୬ କିମି ଓ ଡାହାଣ ପାର୍ଶ୍ୱରେ ୨୩.୧୫୨ କିମି ରାସ୍ତାକୁ ପୂର୍ତ୍ତ ବିଭାଗ ଓ ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର କରାଯାଇ ଉନ୍ନତୀକରଣ କରାଯାଉଛି। ରାଜ୍ୟର ଜଳସେଚନ ବିଭାଗ ଅଧୀନରେ ପ୍ରାୟ ୧୭,୩୮୮ କିମି କେନାଲ ଓ ନଦୀବନ୍ଧ ରହିଛି। ରାସ୍ତାର ଅବସ୍ଥା, ଗୁରୁତ୍ୱ ଓ ବଜେଟ ବ୍ୟୟବରାଦକୁ ଦୃଷ୍ଟିରେ ରଖି ଉନ୍ନତୀକରଣ କରାଯାଉଛି। ଗୁରୁବାର ପ୍ରଶ୍ନୋତ୍ତର ବେଳେ ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ ଏହି ସୂଚନା ଦେଇଛନ୍ତି।
ମୂଳ ପ୍ରଶ୍ନକର୍ତ୍ତା କଂଗ୍ରେସ ସଭ୍ୟ ସୁରେଶ କୁମାର ରାଉତରାୟ ଅଭିଯୋଗ କରିଥିଲେ ଆଇଏଏସ୍ ଅଫିସର, ଶିଳ୍ପପତି, ନେତା, ବ୍ୟବସାୟୀ କେନାଲ ଚାରିକଡ଼କୁ ବେଆଇନ ଭାବେ ମାଡ଼ି ବସିଲେଣି। ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ମନ୍ତ୍ରୀ କହିଥିଲେ ଯେ, ଏହା ଅନୁସନ୍ଧାନ ସାପେକ୍ଷ। ଦୟା କେନାଲ ଉଭୟପାର୍ଶ୍ୱକୁ କଂକ୍ରିଟ କରାଯାଉଛି। ମହାରଥୀଙ୍କ ପ୍ରସ୍ତାବାନୁଯାୟୀ ଉକ୍ତ ଅଞ୍ଚଳକୁ ପରିଦର୍ଶନରେ ଯିବାକୁ ମନ୍ତ୍ରୀ ପ୍ରତିଶ୍ରୁତି ଦେଇଥିଲେ।
