ଭୁବନେଶ୍ୱର, ୨୯।୨ (ବ୍ୟୁରୋ): ରାଜଧାନୀରେ ଦିନକୁ ଦିନ ଜବରଦଖଲ ବଢ଼ିଚାଲୁଥିବା ବେଳେ ଜବରଦଖଲକାରୀଙ୍କ ଦାଦାଗିରି ମଧ୍ୟ ବହୁ ପରିମାଣରେ ବୃଦ୍ଧି ପାଉଛି। ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ ପାଇଁ ବିଭିନ୍ନ ସମୟରେ ପଦକ୍ଷେପ ନିଆଯାଉଛି। ହେଲେ ଏବେ ଜବରଦଖଲକାରୀଙ୍କ ଦାଦାଗିରି ଚରମସୀମାରେ ପହଞ୍ଚିଛି। କିଛିଦିନ ତଳେ ବାମ ସମାନ୍ତରାଳ (ଲେଫ୍ଟ ପାରାଲାଲ ରୋଡ୍) ରାସ୍ତା ପାର୍ଶ୍ୱରୁ ବେଆଇନ ଜବରଦଖଲ ହଟାଇବା ପାଇଁ ଉଚ୍ଛେଦକାରୀ ଦଳ ଯାଇଥିବା ବେଳେ ସେମାନଙ୍କୁ ବସ୍ତିବାସିନ୍ଦା ବିରୋଧ କରିଥିଲେ। ସେଭଳି ସ୍ଥିତି ଶୁକ୍ରବାର ସମ୍ ହସ୍ପିଟାଲ ସମ୍ମୁଖରେ ଦେଖିବାକୁ ମିଳିଛି। ଉଚ୍ଛେଦ ପାଇଁ ଯାଇଥିବା ଅଧିକାରୀ ଏବଂ ଅନ୍ୟମାନଙ୍କୁ ହସ୍ପିଟାଲ ସମ୍ମୁଖ ରାସ୍ତା ପାର୍ଶ୍ୱସ୍ଥ ଦୋକାନୀମାନଙ୍କ ତୀବ୍ର ବିରୋଧର ସାମ୍ନା କରିବାକୁ ପଡ଼ିଛି। ଆବଶ୍ୟକ ଅନୁଯାୟୀ ପୋଲିସ ଫୋର୍ସ ନ ଥିବାରୁ ଉଚ୍ଛେଦ ଅଧିକାରୀ ଓ ଦୋକାନୀଙ୍କ ମଧ୍ୟରେ ଖଣ୍ଡଯୁଦ୍ଧ ହୋଇଛି। ଦୀର୍ଘ ସମୟ ଧରି ଦୋକାନୀମାନେ ବିରୋଧ ପ୍ରଦର୍ଶନ କରିବା ସହ ଟାୟାର ଜାଳି ରାସ୍ତା ଅବରୋଧ କରିଥିଲେ। ଏପରି କି ସେହି ରାସ୍ତା ଦେଇ ଚଳାଚଳ କରୁଥିବା ଗାଡ଼ିକୁ ଲୁହା ପାଇପ୍ରେ ଭଙ୍ଗାରୁଜା କରିଥିଲେ। ଏଥିଯୋଗୁ ସେଠାରେ ଅଶାନ୍ତକର ପରିସ୍ଥିତି ସୃଷ୍ଟି ହୋଇଥିଲା।
ସୂଚନାଯୋଗ୍ୟ, ସାଧାରଣ ପ୍ରଶାସନ ବିଭାଗ ଓ ଭୁବନେଶ୍ୱର ମହାନଗର ନିଗମ (ବିଏମ୍ସି)ର ଜୋନାଲ କମିଶନରଙ୍କ ଦ୍ୱାରା କଳିଙ୍ଗ ଷ୍ଟୁଡିଓ ଛକରୁ ସମ୍ ହସ୍ପିଟାଲ ପର୍ଯ୍ୟନ୍ତ ଯାଇଥିବା ରାସ୍ତାର ଦୁଇପାର୍ଶ୍ୱରେ ଜବରଦଖଲ ଉଚ୍ଛେଦ କରିବା ପାଇଁ ମିଳିତ ଉଚ୍ଛେଦ ଟିମ୍କୁ ଗତ ୧୪ ତାରିଖରେ ଚିଠି ସଂଖ୍ୟା ୧୩୯୮/ସିଏରେ ପତ୍ର ଲେଖାଯାଇଥିଲା। ଉକ୍ତ ଚିଠିକୁ ଭିତ୍ତିକରି ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ଉଚ୍ଛେଦ ଅଧିକାରୀ-୨ ପ୍ରମୋଦ ପାତ୍ରଙ୍କ ନେତୃତ୍ୱରେ ମିଳିତ ଉଚ୍ଛେଦ ଟିମ୍ ଶୁକ୍ରବାର ପୂର୍ବାହ୍ନରେ ଷ୍ଟୁଡିଓ ଛକରୁ ଉଚ୍ଛେଦ କାର୍ଯ୍ୟ ଆରମ୍ଭ କରିଥିଲା। ଅପରାହ୍ନ ସୁଦ୍ଧା ରାସ୍ତା ପାର୍ଶ୍ୱସ୍ଥ ୧୪୬ ଅସ୍ଥାୟୀ ଓ ବେଆଇନ ନିର୍ମାଣ ସମେତ ଦୋକାନ ଭଙ୍ଗାଯାଇଥିଲା। ତେବେ ପରେ ସମ୍ ହସ୍ପିଟାଲ ସମ୍ମୁଖ ରାସ୍ତା ପାର୍ଶ୍ୱରେ ଉଚ୍ଛେଦ କାର୍ଯ୍ୟ ଆରମ୍ଭ ହେବାରୁ ଏହାକୁ ସ୍ଥାନୀୟ ଦୋକାନୀମାନେ ବିରୋଧ କରିଥିଲେ। ବିନା ନୋଟିସ୍ରେ କାହିଁକି ଉଚ୍ଛେଦ କରୁଛ, ପ୍ରଥମେ ଥଇଥାନ କର ତା’ ପରେ ଭାଙ୍ଗିବ ବୋଲି କହି ହୋହଲ୍ଲା କରିଥିଲେ। ତେବେ ଅଧିକାରୀମାନେ କିଛି ନ ଶୁଣି ଜବରଦଖଲ ହଟାଇବାରୁ ଦୋକାନୀମାନେ ମାରପିଟ୍ ଆରମ୍ଭ କରିଦେଇଥିଲେ। ଫଳରେ ଅଧିକାରୀ ମାନଙ୍କ ସମେତ ସାଧାରଣ ଲୋକ ବି ଏହାର ଶିକାର ହୋଇଥିଲେ। ମାରପିଟ୍ରେ କେତେଜଣ ଲୋକଙ୍କ କାର କାଚ୍ ଓ ବାଇକ୍ ଭାଙ୍ଗିଯାଇଛି। ମାତ୍ର ଏ ନେଇ କୌଣସି ପକ୍ଷରୁ ଥାନାରେ ଅଭିଯୋଗ ହୋଇ ନ ଥିବା ଜଣାପଡ଼ିଛି। ଏହି ଉଚ୍ଛେଦରେ ବିଏମ୍ସି ଏବଂ ବିଡିଏର ଗୋଟିଏ ଲେଖାଏ ଜେସିବି ବ୍ୟବହୃତ ହୋଇଥିଲା। ୧ ପ୍ଲାଟୁନ୍ ଏପିଆର୍ ଫୋର୍ସ ସହ ଖଣ୍ଡଗିରି ଥାନା ଏସ୍ଆଇ ସସ୍ମିତା ଧଳ, ସାଧାରଣ ପ୍ରଶାସନ ବିଭାଗ ଅଧିକାରୀ ଏବଂ ଅନ୍ୟ ସ୍କ୍ବାଡ୍ ଉପସ୍ଥିତ ଥିଲେ ବୋଲି ବିଡିଏ ପକ୍ଷରୁ ସୂଚନା ମିଳିଛି।
ଉଲ୍ଲେଖଯୋଗ୍ୟ, ଆସନ୍ତା ୩ତାରିଖ ପରେ ମିଳିତ ଉଚ୍ଛେଦ ଟିମ୍ ପକ୍ଷରୁ ସାଲିଆ ସାହିରେ ଗୌଡ ବସ୍ତି, ବୀରବସ୍ ବସ୍ତି, ଶ୍ରୀକ୍ରିଷ୍ଣାନଗର ବସ୍ତି ଓ ଲକ୍ଷ୍ମୀପୁର ବସ୍ତି ବାସିନ୍ଦାଙ୍କୁ ଥଇଥାନ କରାଯିବ। ତା’ ପରେ ବିଧାନସଭା ଅଧିବେଶନ ବସୁଥିବାରୁ ଆବଶ୍ୟକ ପୋଲିସ ଫୋର୍ସ ମିଳିବା କଷ୍ଟକର ହୋଇଯିବ। ସେଥିପାଇଁ ଏପ୍ରିଲ ପ୍ରଥମ କିମ୍ବା ଦ୍ୱିତୀୟ ସପ୍ତାହରେ ପାଖାପାଖି ୫ ପ୍ଲାଟୁନ ପୋଲିସ ଫୋର୍ସ ସହ ସମ୍ ହସ୍ପିଟାଲ ସାମ୍ନାରେ ଥିବା ଅସ୍ଥାୟୀ ବ୍ୟବସାୟୀଙ୍କୁ ଉଚ୍ଛେଦ କରାଯିବ ବୋଲି ମିଳିତ ଉଚ୍ଛେଦ ଦଳ ପକ୍ଷରୁ କୁହାଯାଇଛି।
