ବାଲେଶ୍ୱର ଅଫିସ, ୭।୪-କରୋନା ଭୂତାଣୁ ସଂକ୍ରମଣକୁ ପ୍ରତିହତ କରିବା ଓ ଜନସାଧାରଣଙ୍କ ସୁରକ୍ଷାକୁ ସୁନିଶ୍ଚିତ କରିବା ଉଦ୍ଦେଶ୍ୟରେ ସାମାଜିକ ଦୂରତ୍ୱ କଟକଣାକୁ କଡ଼ାକଡ଼ି କରାଯାଇଛି। ଅନେକ ସମୟରେ ଏଥିରେ ବ୍ୟତିକ୍ରମ ସହ ଏହାର ଖୋଲାଖୋଲି ଉଲ୍ଲଂଘନ ହେଉଥିବା ଲକ୍ଷ୍ୟ କରାଯାଉଛି। ଏହାକୁ ଦୃଷ୍ଟିରେ ରଖି ବାଲେଶ୍ୱର ଜିଲାପାଳଙ୍କ କାର୍ଯ୍ୟାଳୟ ତରଫରୁ ସାମାଜିକ ଦୂରତ୍ୱ ପାଇଁ ଜାରି ହୋଇଥିବା ଗାଇଡ଼ଲାଇନର କଡ଼ାକଡ଼ି ଅନୁପାଳନ ପାଇଁ ଆଦେଶନାମା ଜାରି କରାଯାଇଛି। ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ କହିଛନ୍ତି ଯେ, ଗ୍ରସୋରି, ପନିପରିବା, କ୍ଷୀର, ଔଷଧ ସମେତ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ବିକ୍ରି କରୁଥିବା ଦୋକାନଗୁଡ଼ିକ କିଣାବିକା ସମୟରେ ଦୋକାନ ବାହାରେ ଓ ଭିତରେ ଗ୍ରାହକମାନଙ୍କ ମଧ୍ୟରେ ଯେପରି ସାମାଜିକ ଦୂରତା ବଜାୟ ରହେ ତାହା ସୁନିଶ୍ଚିତ କରିବେ। ଏହା ସମ୍ପୂର୍ଣ୍ଣ ଭାବେ ଦୋକାନୀମାନଙ୍କ ଦାୟିତ୍ୱ ବୋଲି ସ୍ପଷ୍ଟ କରାଯାଇଛି । ଦୋକାନ ମାଲିକ ଓ ବ୍ୟବସାୟୀମାନେ ଦୋକାନ ବାହାରେ ସ୍ଥାୟୀ ଗୋଲାକାର ଓ ବର୍ଗାକାର କ୍ଷେତ୍ର ଚିହ୍ନିତ କରିବା ସହିତ ସେଗୁଡ଼ିକ ମଧ୍ୟରେ ଯେପରି ୨ମିଟର ବ୍ୟବଧାନ ରହେ ସେଥିଲାଗି ବ୍ୟବସ୍ଥା କରିବେ ଏବଂ ଗ୍ରାହକମାନେ ଯେପରି ଧାଡ଼ିରେ ଆସନ୍ତି ସେ ଦିଗରେ ପଦକ୍ଷେପ ନେବେ। ଏହି ଆଦେଶର ଅବମାନନା କଲେ ସ୍ଥାନୀୟ ଏକଜିକ୍ୟୁଟିଭ ମାଜିଷ୍ଟ୍ରେଟ, ପୌରାଞ୍ଚଳ ନିର୍ବାହୀ ଅଧିକାରୀ, ଏନଫୋର୍ସମେଣ୍ଟ ଟିମ୍ ଅଥବା ପୋଲିସ ଦ୍ୱାରା ଉକ୍ତ ଦୋକାନକୁ ବନ୍ଦ ବା ସିଲ୍ କରି ଦିଆଯିବ। ଦୋକାନ ସିଲ୍ କରାଯିବା ପରେ ଏ ସଂକ୍ରାନ୍ତରେ ଜିଲାପାଳଙ୍କୁ ଏକ ରିପୋର୍ଟ ପ୍ରଦାନ କରାଯାଇ ଖିଲାପକାରୀ ଦୋକାନ ମାଲିକଙ୍କ ବିରୋଧରେ ମାମଲା ରୁଜୁ କରାଯିବ। ଜିଲା ପ୍ରଶାସନ ପକ୍ଷରୁ ଏନେଇ କଡ଼ା ଚେତାବନୀ ଦିଆଯାଇଛି।
