ନୂଆଦିଲ୍ଲୀ,୧।୫: କରୋନା ଜନିତ ମୃତ୍ୟୁକୁ ବାଦ୍ଦେଲେ ଦେଶରେ ଅନ୍ୟ ମୃତ୍ୟୁସଂଖ୍ୟା ହ୍ରାସ ପାଇଥିବା ଜଣାପଡିଛି। ଲକ୍ଡାଉନ ଯୋଗୁ ଦୁର୍ଘଟଣା ସଂଖ୍ୟା କମିଛି। ସେହିପରି ହସ୍ପିଟାଲକୁ ଆସୁଥିବା ଜରୁରୀ ମାମଲା ଓ ମୃତ୍ୟୁସଂଖ୍ୟାରେ ମଧ୍ୟ ଉଲ୍ଲେଖନୀୟ ହ୍ରାସ ଘଟିଛି। ଏ ନେଇ ଡାକ୍ତରମାନେ ଭିନ୍ନ ଭିନ୍ନ ସମ୍ଭାବ୍ୟ କାରଣ ଦର୍ଶାଇଛନ୍ତି। ଲୋକଙ୍କ ଚିନ୍ତା କମିଥିବା କଥା କେତେକ କହିଥିବାବେଳେ ଅନ୍ୟ କେତେଜଣ ପ୍ରଦୂଷଣ କମିବା କାରଣରୁ ମୃତ୍ୟୁସଂଖ୍ୟା ହ୍ରାସ ପାଇଥିବା ଯୁକ୍ତି ଦର୍ଶାଇଛନ୍ତି।
ବ୍ରିହନ୍ମୁମ୍ବାଇ ମ୍ୟୁନିସିପାଲ କର୍ପୋରେଶନ ତଥ୍ୟ ଅନୁଯାୟୀ ୨୦୧୭ ମାର୍ଚ୍ଚରେ ମଧୁମେହ, ଉଚ୍ଚ ରକ୍ତଚାପ ଓ ହୃଦ୍ରୋଗରେ ୭୨୯ ଜଣଙ୍କ ମୃତ୍ୟୁ ଘଟିଥିବାବେଳେ ୨୦୧୮ରେ ୮୩୩ ଓ ୨୦୧୯ରେ ୯୩୭ ଜଣ ପ୍ରାଣ ହରାଇଥିଲେ। ତେବେ ଚଳିତ ବର୍ଷ ମାର୍ଚ୍ଚରେ ଏହି ରୋଗରେ ୫୯୫ ଜଣଙ୍କ ମୃତ୍ୟୁ ଘଟିଛି। ସେହିପରି ଅଧିକାଂଶ ସହରରେ ଲକ୍ଡାଉନ ବେଳେ ମୃତ୍ୟୁ ସଂଖ୍ୟା ଗତବର୍ଷ ଏହି ସମୟ ତୁଳନାରେ ହ୍ରାସ ପାଇଥିବା ଏକ ରିପୋର୍ଟରେ ପ୍ରକାଶ ପାଇଥିଲା। ଅନେକ ବଡ଼ ହସ୍ପିଟାଲରେ ଜରୁରୀ ବିଭାଗରେ ଆଡମିଶନ ହାର ୫୦ରୁ ୬୦% କମିଛି। ଦୈନନ୍ଦିନ ଜୀବନରେ ଅପ୍ରତ୍ୟାଶିତ ଉତ୍ସାହର ଅଭାବ, କାର୍ଯ୍ୟ ଚାପ ହ୍ରାସ, ପ୍ରଦୂଷଣ କମିଯିବା, ବାହାର ଖାଦ୍ୟ ନ ଖାଇବା ଏବଂ ଖାଦ୍ୟରେ ଟ୍ରାନ୍ସ ଫ୍ୟାଟ୍ କମିବା ତଥା ପରିବାର ସହ ଅବସର ବିନୋଦନ ପାଇଁ ଅଧିକ ସମୟ ମିଳିବା ସୁସ୍ଥ ରଖିବାରେ ସହାୟକ ହୋଇଛି। ଏଥିପାଇଁ ହୃଦ୍ଘାତ ଭଳି ସମସ୍ୟା ହ୍ରାସ ପାଇଛି। ଏହା ସ୍ବୀକାର କରିବାକୁ ପଡ଼ିବ ଯେ ଆମେ ଔଷଧର ଅଧିକ ବ୍ୟବହାର କରୁଛୁ। ରୋଗୀଙ୍କୁ ଚିକିତ୍ସା ସହିତ କ୍ଷତି ବି କରୁଛୁ। ବଡ଼ ହସ୍ପିଟାଲଗୁଡ଼ିକର ଦେୟ ମଧ୍ୟ ଚିକିତ୍ସାକୁ ପ୍ରଭାବିତ କରୁଛି। ତେଣୁ ଏସବୁର ଆତ୍ମସମୀକ୍ଷା କରିବା ଆବଶ୍ୟକ ବୋଲି ପବ୍ଲିକ୍ ହେଲ୍ଥ ଫାଉଣ୍ଡେଶନ ଅଫ୍ ଇଣ୍ଡିଆର ଡ. ଶ୍ରୀନାଥ ରେଡ୍ଡୀ କହିଛନ୍ତି। ଲକ୍ଡାଉନ ବେଳେ ଲୋକେ ଆମ ସହ ଯୋଗାଯୋଗ କମାଇଦେଇଛନ୍ତି। ତେଣୁ ସେମାନେ ଭଲ ଥିବା ଜଣାପଡୁଛି ବୋଲି ଦିଲ୍ଲୀସ୍ଥିତ ନ୍ୟାଶନାଲ ହାର୍ଟ ଇନ୍ଷ୍ଟିଚ୍ୟୁଟ୍ର ଡ. ଓ.ପି. ଯାଦବ କହିଛନ୍ତି। ଆମେରିକାରେ ଚିକିତ୍ସାଗତ ତ୍ରୁଟି ପାଇଁ ବର୍ଷକୁ ୨ ଲକ୍ଷ ଲୋକଙ୍କ ଜୀବନ ଯାଇଥାଏ, ଯାହାକି ସେଠାରେ ମୃତ୍ୟୁର ତୃତୀୟ ବଡ଼ କାରଣ। ଭାରତରେ ମଧ୍ୟ ସେଭଳି ସମସ୍ୟା ରହିଛି। ଲକ୍ଡାଉନ ବେଳେ ସେଭଳି ମୃତ୍ୟୁସଂଖ୍ୟା କମିଥିବା ଡ. ରେଡ୍ଡୀ କହିଛନ୍ତି। ଲଲେକ୍ଟିଭ୍ ସର୍ଜରି ବନ୍ଦ ଥିବାରୁ ମୃତ୍ୟୁସଂଖ୍ୟା ହ୍ରାସ ପାଇଛି। କାରଣ ଇଲେକ୍ଟିଭ୍ ସର୍ଜରିରେ ପ୍ରତି ୧୦୦ ରୋଗୀରେ ୩ ଜଣଙ୍କର ମୃତ୍ୟୁ ହେବା ଆଶଙ୍କା ଥାଏ। ସେହିପରି ପ୍ରଦୂଷଣଜନିତ କୁହୁଡିଆ ପରିବେଶ ଯୋଗୁ ଲଣ୍ଡନରେ ବର୍ଷକୁ ପ୍ରାୟ ୪୦୦୦ ଲୋକଙ୍କ ଜୀବନ ଯାଇଥାଏ। ପ୍ରଦୂଷଣ କମିଥିବାରୁ ଏଭଳି ମୃତ୍ୟୁସଂଖ୍ୟା କମିପାରିଛି। ଦୂରତ୍ୱ ରକ୍ଷା ଫଳରେ ନିମୋନିଆ ଓ ଆନୁଷଙ୍ଗିକ ରୋଗ ଜନିତ ମୃତ୍ୟୁକୁ ରୋକାଯାଇପାରିଛି ବୋଲି ଦିଲ୍ଲୀସ୍ଥିତ ଆଜ୍ମା ଚେଷ୍ଟ ଆଲର୍ଜି ସେଣ୍ଟରନିର୍ଦ୍ଦେଶକ ଡ. ବିକ୍ରମ ଜାଗି କହିଛନ୍ତି।
