ନୂଆଦିଲ୍ଲୀ,୧୫।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ବାଧୀନତା ଦିବସ ଅବସରରେ ଘୋଷଣା କରିଛନ୍ତି କି ଏବେ ଦେଶକୁ ମିଳିବ ଚିଫ୍ ଅଫ୍ ଡିଫେନ୍ସ ଷ୍ଟାଫ୍। ସ୍ଥଳସେନା, ନୌସେନା ଓ ବାୟୁସେନା ମଧ୍ୟରେ ତାଳମେଳ ରକ୍ଷା କରିବାକୁ ଏହି ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ନିଯୁକ୍ତ କରାଯିବ। ସୂଚନାଯୋଗ୍ୟ, ୧୯୯୯ କାରଗିଲ ଯୁଦ୍ଧ ସମୟରେ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ନିଯୁକ୍ତି ଦାବି କରାଯାଇଥିଲା। ଏହାପରେ ଭାଜପା ନେତା ଲାଲକୃଷ୍ଣ ଆଡଭାନୀଙ୍କ ଅଧ୍ୟକ୍ଷତାରେ ଗ୍ରୁପ ଅଫ୍ ମିନିଷ୍ଟର୍ସ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ପଦ ପାଇଁ ସୁପାରିଶ କରିଥିଲେ। ହେଲେ ଏହାପରେ ବାୟୁସେନାର ବିରୋଧ ପାଇଁ ବାଜପେୟୀ ସରକାର ଏହା ଉପରେ ନଜର ଦେଇ ନ ଥିଲେ। କୁହାଯାଏ କାରଗିଲ ଯୁଦ୍ଧ ସମୟରେ ୩ ସେନାଙ୍କ ମଧ୍ୟରେ ସମନ୍ବୟ ନ ରହିବାରୁ ବହୁ ପରିମାଣରେ କ୍ଷତି ହୋଇଥିଲା। ଏବେ ୨୦ ବର୍ଷ ପରେ ମୋଦି ସରକାର ଏହାକୁ କାର୍ଯ୍ୟକାରୀ କରିବାକୁ ଯାଉଛନ୍ତି। ଏଥିରେ ଥିବା ଅଧ୍ୟକ୍ଷଙ୍କର କୌଣସି କ୍ଷମତା ରହିବ ନାହିଁ ସେ କେବଳ ୩ ସେନା ମଧ୍ୟରେ ସମନ୍ବୟ ରକ୍ଷା କରିବେ। ଏବେ ଚିଫ୍ ମାର୍ଶଲ୍ ବିଏସ୍ ଧନଓ୍ବା ଚିଫ୍ ଅଫ୍ ଡିଫେନ୍ସ ଷ୍ଟାଫ୍ କମିଟିର ଚେୟାରମ୍ୟାନ୍ ରହିଛନ୍ତି।
