କାକଟପୁର,୧୧।୧୦(ଡି.ଏନ୍.ଏ.) : ଦେବୀନଦୀ ମହାନଦୀରୁ ବାହାରି କାକଟପୁର ଓ ଅସ୍ତରଙ୍ଗ ବ୍ଲକ ଅଞ୍ଚଳଦେଇ ପ୍ରବାହିତ ହୋଇ ଶେଷରେ ନୂଆଗଡ଼ଠାରେ ସମୁଦ୍ରରେ ମିଶିଛି। ମହାନଦୀର ୬୦ପ୍ରତିଶତ ବନ୍ୟାଜଳ ପ୍ରତିବର୍ଷ ଦେବୀନଦୀ ଦେଇ ପ୍ରବାହିତ ହେଉଥିବା ଜଳସେଚନ ବିଭାଗ ଆକଳନ କରିଛି। କିଛି ବର୍ଷ ହେବ ଦେବୀନଦୀ କାକଟପୁର ବ୍ଲକର ବାଉରିଆକଣଠାରୁ ଅସ୍ତରଙ୍ଗ ବ୍ଲକର କାଳିଆକଣ ପର୍ଯ୍ୟନ୍ତ ପ୍ରାୟ ୯କିମି ଦକ୍ଷିଣ ପାର୍ଶ୍ୱ କୂଳ ଖାଇ ଖାଇ ଚାଲିଛି। ଫଳରେ ଉଭୟ ବ୍ଲକର ଶତାଧିକ ଚାଷୀଙ୍କ ଶହଶହ ଏକ ଚାଷ ଜମି ନଦୀଗର୍ଭକୁ ଚାଲିଯାଉଛି। ନଦୀରେ ବର୍ଷତମାମ ଜଳପୂର୍ଣ୍ଣ ରହୁଥିବାରୁ ଏଥିରୁ ମାଛଧରି ଏବଂ ଏହାର ପାଣିକୁ ଗ୍ରୀଷ୍ମଋତୁରେ ବିଲରେ ମଡ଼ାଇ ଭଲ ଫସଲ କରିଆସୁଥିଲୁ। ଏବେ କିନ୍ତୁ ଦେବୀ ଦାନବୀ ପାଲଟି ଯାଇଛି। ଦକ୍ଷିଣ ପାର୍ଶ୍ୱକୁ ମାଡ଼ିଆସି ଆମମାନଙ୍କ ଚାଷ ଜମିକୁ ତା’ ଗର୍ଭରେ ଲୀନ କରି ଆମକୁ ସର୍ବସ୍ବାନ୍ତ କରିସାରିଲାଣି ବୋଲି କହିଛନ୍ତି, ନଇଗୁଅଁାର ଚାଷୀ ଭିକାରୀ ପ୍ରଧାନ।
ପ୍ରତିବର୍ଷ ବର୍ଷା ରୁତୁରେ ହୀରାକୁଦ ଡ୍ୟାମରୁ ବନ୍ୟାଜଳ ନିଷ୍କାସିତ ହେଲେ ନଦୀରେ ବନ୍ୟା ଜଳ ବୃଦ୍ଧିପାଉଛି। ନଦୀ ମଝିରେ ସ୍ଥାନେସ୍ଥାନେ ବାଲି ଚଡ଼ା ସୃଷ୍ଟି ହୋଇ ନଦୀର ସ୍ରୋତ ଦକ୍ଷିଣଙ୍କୁ ମାଡ଼ିମାଡ଼ି ପ୍ରବାହିତ ହେଉଛି। ଷାଠିବୋଟି, ଓସିଅଁା, ନଇଗୁଅଁା, ଅସନ, ବରପଦା, ବାଲିଡିଆ, କାଳିଆକଣ, ନଗର, ପ୍ରଭୃତିସ୍ଥାନରେ ବନ୍ୟାଜଳ ବନ୍ଧକୁ ଲାଗି ପ୍ରବାହିତ ହେଉଛି। ଏବେଠାରୁ ଉପରୋକ୍ତ ସ୍ଥାନମାନଙ୍କରେ ସ୍ପର ନିର୍ମାଣ ସାଙ୍ଗକୁ ବନ୍ଧରେ ପଥର ପ୍ୟାକିଂ କରା ନ ଗଲେ ଦିନେନାଦିନେ ଏଠାରେ ଘାଇ ସୃଷ୍ଟି ହୋଇ କାକଟପୁର ଓ ଅସ୍ତରଙ୍ଗ ଅଞ୍ଚଳର ବ୍ୟାପକ କ୍ଷତି ଘଟାଇବା ଆଶଙ୍କା ରହିଥିବା କହିଛନ୍ତି, କାଳିଆକଣ ଗ୍ରାମବାସୀ ଲକ୍ଷ୍ମଣ ବେହେରା ଓ ଦେଶବନ୍ଧୁ ବେହେରା। ଗତ ୧୨ତାରିଖରେ ବିଭାଗୀୟ ମନ୍ତ୍ରୀ ରଘୁନନ୍ଦନ ଦାସ ଦେବୀ ନଦୀ ବନ୍ଧ ପରିଦର୍ଶନ କରିବାକୁ ଆସିଥିବାବେଳେ ନଗର ପଞ୍ଚାୟତର ଶତାଧିକ ମତ୍ସ୍ୟଜୀବୀ ତାଙ୍କୁ କାଳିଆକଣଠାରେ ଅଟକାଇ ଦେବୀନଦୀ କିପରି ଦକ୍ଷିଣ ପାର୍ଶ୍ୱକୁ ଖାଇଆସୁଛି ତାହା ଦେଖାଇ ତୁରନ୍ତ ଏ ଦିଗରେ ପ୍ରତିକାର ବ୍ୟବସ୍ଥା କରିବାକୁ ଅନୁରୋଧ କରିଥିଲେ। ଏ ଦିଗରେ ପଦକ୍ଷେପ ଗ୍ରହଣ କରାଯିବ ବୋଲି ମନ୍ତ୍ରୀ ସେମାନଙ୍କୁ ପ୍ରତିଶ୍ରୁତି ଦେଇଥିବା କାଳିଆକଣ ଗ୍ରାମର କୃଷ୍ଣଚନ୍ଦ୍ର ବେହେରା, ସମ୍ପଦ ବେହେରା ସୂଚନା ଦେବା ସହିତ କାଳିଆକଣ ଓ ବାଲିଡିଆଠାରେ ଏକାଧିକ ସ୍ପର ନିର୍ମାଣ ସାଙ୍ଗକୁ ନଦୀଶଯ୍ୟାରେ ସୃଷ୍ଟି ହୋଇଥିବା ବାଲିଚଡାକୁ ଖନନ କରିବାକୁ ଦାବି କରିଛନ୍ତି। ଏ ସମ୍ପର୍କରେ କାକଟପୁର ଜଳସେଚନ ବିଭାଗ ଉପନିର୍ବାହୀ ଯନ୍ତ୍ରୀ ପ୍ରତାପ କୁମାର ବିଶ୍ୱାଳଙ୍କୁ ପଚାରିବାରେ ବିଭାଗୀୟ ମନ୍ତ୍ରୀଙ୍କୁ ଏନେଇ ଅବଗତ କରାଯାଇ ପଦକ୍ଷେପ ଗ୍ରହଣ କରିବାକୁ ସ୍ଥାନୀୟ ବିଧାୟକ ତଥା କ୍ରୀଡ଼ା ଓ ଯୁବବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା ଓ ଅସ୍ତରଙ୍ଗ ବ୍ଲକ ଅଧ୍ୟକ୍ଷ ସ୍ବାଧୀନ କୁମାର ନାୟକ ଅନୁରୋଧ କରିଥିବା କହିଥିଲେ। ଖୁବ୍ ଶୀଘ୍ର ଏ ଦିଗରେ କାର୍ଯ୍ୟ ଆରମ୍ଭ ହେବ ବୋଲି ସେ କହିଥିଲେ।
