କଲ୍ୟାଣସିଂହପୁର, ୨୬।୭(ଦୀପକ କୁମାର ପରିଡା ): ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ଅନ୍ତର୍ଗତ ସେରିଗୁମା ପଞ୍ଚାୟତର କଣାଗାଁରେ ଦେଖିବାକୁ ମିଳିଛି ଏକ ସାମାଜିକ ଓ ସାଂସ୍କୃତିକ ପୁର୍ନମିଳନ ଦୃଶ୍ୟ। ୯ ବର୍ଷର ସାମାଜିକ ବାସନ୍ଦ ପରେ କନ୍ଧକୂଳ ସମାଜର ନିଜସ୍ବ ରୀତିନୀତି ଓ ପରମ୍ପରା ଅନୁସାରେ ୩ଟି ପରିବାରଙ୍କୁ ପୁନର୍ବାର ନିଜ ସମାଜ ଓ ହିନ୍ଦୁ ଧର୍ମରେ ସାମିଲ କରାଯାଇଛି। ଦୀର୍ଘ ବର୍ଷ ତଳର ସାମାଜିକ ବାସନ୍ଦ ଓ ପୃଷ୍ଠଭୂମି ସୂଚନା ଅନୁଯାୟୀ, ପ୍ରାୟ ୯ ବର୍ଷ ପୂର୍ବେ ମିଣିଆକା ଜଗଲୁ, ମାଗୁ ସାରାକା ଏବଂ ରାମଚନ୍ଦ୍ର ସାରାକାଙ୍କ ପରିବାର ଖ୍ରୀଷ୍ଟିଆନ ଧର୍ମ ଗ୍ରହଣ କରିଥିବା ଅଭିଯୋଗ ହୋଇଥିଲା। ଏହି କାରଣରୁ ସ୍ଥାନୀୟ କନ୍ଧକୂଳ ସମାଜର ନିୟମାନୁସାରେ ସେମାନଙ୍କୁ ଗାଁ ଓ ସମାଜରୁ ବାସନ୍ଦ କରାଯାଇଥିଲା। ଝାଙ୍କିରି ଗୁଡ଼ିରେ ପାରମ୍ପରିକ ପୂଜାର୍ଚ୍ଚନା ରବିବାର ଗ୍ରାମର ଝାଙ୍କିରି ଗୁଡ଼ିରେ ବିଶେଷ ପୂଜାର୍ଚ୍ଚନାର ଆୟୋଜନ କରାଯାଇଥିଲା। ସମାଜର ପୁରାତନ ପ୍ରଥା ଅନୁସାରେ ଛେଳି, କୁକୁଡ଼ା, ପାରା, ନଡ଼ିଆ, ଚାଉଳ ଆଦି ସାମଗ୍ରୀ ଅର୍ପଣ କରାଯାଇ ପବିତ୍ର ରୀତିନୀତି ସମ୍ପନ୍ନ ହୋଇଥିଲା। ଏହି ପ୍ରକ୍ରିୟା ପରେ ତିନୋଟି ଯାକ ପରିବାର ଆନୁଷ୍ଠାନିକ ଭାବେ ନିଜ ନିଜର ଗୋଷ୍ଠୀ ଓ ଧର୍ମକୁ ଫେରିଛନ୍ତି। ଗ୍ରାମବାସୀ ଓ ବରିଷ୍ଠ ନେତୃବୃନ୍ଦଙ୍କ ଉପସ୍ଥିତି ଏହି ସାମାଜିକ କାର୍ଯ୍ୟକ୍ରମରେ ସେରିଗୁମା କନ୍ଧକୂଳ ସମାଜର ସଭାପତି ଆପାରଓ କୁଲେସିକାଙ୍କ ସମେତ ସମାଜର ଅନେକ ବରିଷ୍ଠ ସଦସ୍ୟ ଓ ଶତାଧିକ ଗ୍ରାମବାସୀ ଉପସ୍ଥିତ ରହି ଏହି ନିଷ୍ପତ୍ତିକୁ ସ୍ବାଗତ କରିଥିଲେ।
